Ngaahi ʻAta ʻo e Tuí
ʻAmanitā Sili:
Cape Town, Saute ʻAfilika
ʻI he fakaʻau ko ia ke faingataʻa ʻa e moʻuí ʻi he taʻu kei hongofulu tupu ʻa ʻAmanitaá, naʻe mavahe leva mei he Siasí ʻo kumi ha ngaahi aʻusia foʻou. Hili ha ngaahi taʻu, naʻe ongoʻi liʻekina ʻa ʻAmanitā. Naʻe kamata ʻa e fekumi ki he fiefiá ʻaki ha fehuʻi mahuʻinga.
taha faitaá, Cody Bell
Naʻe papitaiso hoku fāmilí ʻi he 1993. Hili ha ngaahi taʻu siʻi mei ai kuo vete ʻeku ongomātuʻá, pea mavahe māmālie atu leva ʻemau fānaú mei he Siasí. ʻI heʻeku kalasi 11 he 1998, naʻe ʻikai ke u toe maʻulotu mo au.
Naʻá ku palōmesi te u aʻusia ha ngaahi meʻa foʻou pea mo vakaiʻi e ngaahi siasi kehé. Naʻe fakaafeʻi au ʻe haku ngaahi kaungāmeʻa ki honau siasí, ka naʻe ʻikai ke u faʻa ʻalu ki ai. Naʻe ʻikai ʻuhinga ia naʻe toe ʻi ai haʻaku ongoʻi fekauʻaki mo e Siasí. Naʻe tuʻunga pē ia ʻi ha ngaahi ʻuhinga faikehe, naʻe taʻofi au ʻe ha meʻa. Ko e ʻikai pē ke u fie ʻā hake, pe ʻi ai haʻaku palani ke fai ha meʻa kehe pe ko haʻaku kumi ʻuhinga pē.
Naʻá ku māmālohi ʻi ha taʻu ʻe valu. Lolotonga e taimi ko ʻení, ne u feohi mo ha ngaahi kaungāmeʻa hala. Naʻe puke lahi ʻeku fineʻeikí. Naʻá ku fuʻu loto mamahi. Naʻá ku ongoʻi liʻekina. Naʻá ku kamata fakakaukau leva, “Ko e fē taimi fakamuimui taha naʻá ku fiefia aí?”
Kapau te ke vakai mai ki heʻeku moʻuí mahalo te ke pehē, “ʻOkú ne maʻu ʻe faʻahinga moʻui fiefia tahá!” Naʻá ku feohi mo ha kakai manakoa naʻe hangē naʻe moʻui fiefiá. Ka naʻá ku kei ongoʻi liʻekina mo tuēnoa pē.
Fāifai peá u fakakaukau ki he taimi naʻá ku ʻi he Kau Finemuí aí. Naʻá ku fakatokangaʻi ko e taimi ia naʻá ku ongoʻi fakamuimui taha ai ʻa e fiefia moʻoní. Naʻá ku pehē leva ke u foki ki he lotú he Sāpate hokó. Naʻá ku talanoa mo e palesiteni fakakoló pea kamata leva ʻeku fakatomalá.
Hili ha taimi nounou mei ai, kuo ui au ke u ngāue mo e Kau Finemuí. Ko e taimi ne mau lau ai e moto ʻa e Kau Finemuí, naʻá ku manatuʻi ia he taimi pē ko iá! Ko e ʻaho ní, ko e taimi pē ʻoku ou lau ai ʻa e motó, ʻoku ou maʻu ha fakamoʻoni ko e Siasí ʻa e feituʻu ʻoku totonu ke u ʻi aí.