Ko e Vahevahe ʻo e Meʻakaí mo e Malimalí

Ko e feituʻu ʻokú ma nofo aí, ko Folōlita, USA, pea ʻokú ma sio ai ki ha kakai tokolahi ʻoku ʻikai ke ʻi ai hanau ʻapi nofoʻanga. Naʻá ma fifili pe ʻe founga fēfē haʻama lava ʻo tokoni kiate kinautolu. Naʻe fafanga ʻe Sīsū kinautolu naʻe fiekaiá, pea ʻoku fie maʻu ʻe he taha kotoa ke fafangaʻi! Ko ia ne ma pehē ai ke ma ō mo ha fanga kiʻi meʻakai ki he taimi fakatuʻupakeé.

Naʻe tokoni homa kaungāmeʻa ko Soá ʻi hono fakatau ʻo e koloa ʻi he falekoloa paʻanga ʻe tahá.

Naʻá ma faʻo e ngaahi pā lole sokoletí, fanga kiʻi mā īkí mo e sīsí, pea mo ha fanga kiʻi meʻakai ifo kehe ʻi he kofukofú. Naʻe ʻahiʻahiʻi ʻe Semi ha kiʻi meʻa ʻe taha!

Naʻe ʻai ʻe heʻema tufa ʻema fanga kiʻi kofukofú ke ma malimali. Naʻe pehē ʻe ha kakai ʻe niʻihi, “Mālō!” mo e “Ifo ʻaupito!”

Ne fokotuʻu heʻema faʻeé ʻa e kiʻi ngāué ʻi he ʻinitanetí, pea ʻilo ai ʻe he kolo ʻo e kakai lalahi kei talavoú. Naʻa nau ngaohi ha kofukofu kehe ʻe 100 ki he fale nofoʻanga ʻo e kau liʻekina ʻi homau feituʻú. Naʻe fakaʻaongaʻi kinautolu ʻe he falé ni ke fakaafeʻi e kakaí ke nau kau ʻi ha polokalama ke maʻu ai hanau ʻapi. Ne ma fiefia moʻoni ai!