Tuku ke Ulo Hoʻomou Māmá
Fai ʻe Palesiteni Thomas S. Monson
Mei he “Be a Light to the World” (Brigham Young University devotional, Nov. 1, 2011, speeches .byu.edu.
Ne tau takitaha omi ki māmani mo e Maama ʻa Kalaisí. ʻOku ʻatautolu ia ke ʻai ke kei ulo ngingila ʻetau māmá ke mamata mo muimui ki ai e niʻihi kehé. Taha ʻo e ngaahi founga lelei taha ke pukepuke ai e tui ʻoku tau fie maʻú ke ako ʻa e folofolá mo lotu.
ʻI hoʻo pukepuke ko ia ʻa e ulo ʻo e fakamoʻoní ke ulo ngingilá, te ke hoko ai ko ha maama fakatokanga ʻo e māʻoniʻoní ke sio ki ai ʻa e taha kotoa. Naʻe folofola ʻa e Fakamoʻuí, “Tuku ke ulo pehē hoʻomou māmá ʻi he ʻao ʻo e kakaí, koeʻuhí ke nau mamata ki hoʻomou ngāue leleí, pea fakamālōʻia ʻa hoʻomou Tamai ʻa ia ʻoku ʻi he langí” (Mātiu 5:16).
ʻOku taʻe-fakangatangata hotau faingamālie ke ulo atú. ʻOku nau ʻākilotoa kitautolu ʻi he ʻaho kotoa pē. Ko e taimi ʻoku tau muimui ai ki he sīpinga ʻa e Fakamoʻuí, te tau hoko ai ko ha maama ʻi he moʻui ʻa kinautolu ʻoku tau feohí—tatau ai pē pe ko e kau mēmipa hotau fāmilí, ko hatau ngaahi kaungāmeʻa, pe kau sola.
Te tau lava ʻo hoko ko ha maama ki māmani. ʻOku tatau pē hono fakafonu ʻe he māmá ha loki ʻi he taimi ʻoku kamosi ai ha ʻuhila mo e lava ko ia ke fakamaama ʻe he sīpinga ʻo e māʻoniʻoní ha foʻi māmani ʻoku fakautuutu ʻene fakapoʻuí.
ʻE hoku ngaahi kaumeʻa, ʻe lava ke tau hangē ko e lea ʻa e ʻAposetolo ko Paulá, “hoko ko ha faʻifaʻitakiʻanga ʻo e kakai tuí” (1 Tīmote 4:12). ʻE lava ke ʻiloa maʻu pē kitautolu ko e kau muimui ʻo Kalaisi mo hoko ko “ha ngaahi maama ʻi he māmaní” (Filipai 2:15).