Toʻu Tupú
Tukupā ke Fakatomala
Naʻe fakamatala ʻe Palesiteni Monisoni ʻo pehē, “Ko hotau fatongiá ke hiki hake mei he tuʻunga sai peé ki he lelei angé, mei he taʻemalavá ki he lavameʻá. Ko hotau ngafá ke aʻusia hotau tuʻunga lelei tahá.” ʻOku tukutaha ʻe ha kakai tokolahi ʻa Sānuali ke nau fokotuʻu ai ha ngaahi taumuʻa mo ha ngaahi tukupā ke fakalakalaka: ke malimali lahi ange, kai moʻui lelei ange, pe ako ha pōtoʻi ngāue foʻou. Neongo ʻe lava ke tokoniʻi koe ʻe he ngaahi taumuʻá ni ke ke toe lelei ange, ka ko e founga lelei taha ke liliu aí ko e fakatomalá.
Neongo ʻe ala faingataʻa e fakatomalá, ka ko ha meʻaʻofa ia! ʻI heʻetau fakafalala kia Sīsū Kalaisi ʻaki ʻetau fakatomala mei heʻetau ngaahi angahalá, ʻoku tau lava ai ke tupulaki mo fakalakalaka. Ne pehē ʻe Palesiteni Monisoni, “Ko e uho ʻo e palani [ʻo e fakamoʻuí] ko hotau Fakamoʻui ko Sīsū Kalaisí. Naʻe mei mole e meʻa kotoa, ka ne [taʻe-ʻoua] ʻEne feilaulau fakaleleí.” [Tuʻunga ʻi he fakatomalá], ʻe lava ke fakamaʻa koe mei hoʻo ngaahi angahalá mo ke fakalakalaka ke tatau lahi ange mo Ia.
Fakakaukau ki ha meʻa [te ne ala] fakafeʻātungiaʻi koe [ke] ʻoua te ke tatau mo e Fakamoʻuí. Ko hoʻo tōʻonga leá? Ko hoʻo feohi mo ho ngaahi kaungāmeʻá pe fāmilí? Ka hili hoʻo fakakaukau ki he meʻa te ke ala fakaleleiʻí, lotu ki he Tamai Hēvaní ʻo fakahā hoʻo holi ke liliú. Manatuʻi ʻe lava ʻa Sīsū Kalaisi ʻi he mālohi ʻo ʻEne Fakaleleí, ʻo tokoni ke ke ikunaʻi ho vaivaiʻangá. Hangē ko hono akoʻi ʻe Palesiteni Monisoní, “Oku hanga ʻe he meʻaʻofa ʻo e fakatomala ne foaki ʻe hotau Fakamoʻuí, ʻo ʻai ke tau lava ʻo fakatonutonu ʻetau moʻuí.”