Ko Molonai mo e Taha Ngaohi Mīsiní
Fai ʻe ʻEletā Claudio R. M. Costa
ʻO e Kau Fitungofulú
“Pea ʻe tataki ʻa kinautolu ʻe ha tamasiʻi siʻi” (2 Nīfai 21:6).
ʻI he ngaahi taʻu lahi kuo hilí ne foki mai homau fāmilí ki Sao Paulo, Palāsila, hili ʻemau ʻeva ki hamau kāinga. ʻI heʻemau lele hake ʻi ha hala naʻe hake lahi, naʻe mate ʻemau kaá.
Ne tuʻo lahi ʻemau feinga ke toe fakamoʻui e kaá. Ka naʻe ʻikai moʻui ia. Naʻe fakalaka hake ha ngaahi kā ʻiate kimautolu. Ka naʻe ʻikai tuʻu ha taha ia ke tokoni.
Fāifai peá u talaange ki hoku fāmilí ʻoku totonu ke mau lotu. Pehē mai leva hoku kiʻi foha taʻu ono ko Molonaí, ”ʻOua te ke hohaʻa koe Teti. Naʻá ku ʻosi lotu au.”
“Ko e hā naʻá ke lotuʻí? Ko ʻeku fehuʻí ange ia.
Naʻá ne pehē mai, “Naʻá ku lotu ki he Tamai Hēvaní ke haʻu ʻa e tokotaha totonú ʻo tokoniʻi kitautolu.”
ʻIkai fuoloa kuo ʻasi mai ha ongo maama ngingila ʻe ua ʻi mui ʻi heʻemau kaá. Ko ha loli toho. Ko e fakaʻulí koha taha ʻenisinia mīsini.
Naʻá ne pehē, “ʻOkú ke mātuʻaki monūʻia.” “Kuo ʻosi ʻeku ngāue ki he ʻaho ní pea ko ʻeku foki ʻeni ki ʻapí.”
Naʻá ne ngaahi ʻemau kaá. Pea toe muimui mai ke fakapapauʻi ʻoku mau aʻu lelei ki ʻapi.
Naʻá ku ʻeke kia Molonai pe naʻá ne ʻilo hono kāfakafa ʻo e aʻusia ko ʻení. Naʻá ne pehē mai, “ʻIo.” “Naʻe ongoʻi ʻe he Tamai Hēvaní ʻeku lotú. ʻOku ou maʻu ʻeni haʻaku fakamoʻoni pē ʻaʻaku! ʻOku ʻikai fie maʻu ia ke u toe kole ki ha taha, Teti.” Naʻe ongo ki hoku lotó e faʻifaʻitakiʻanga lelei ʻa Molonaí.
Kuo fuʻu lahi he taimí ni ʻa Molonai, ka ʻoku ou kei manatuʻi pē ʻene faʻifaʻitakiʻanga lelei ʻi heʻene kei sií. Te ke kei lava pē, neongo hoʻo kei siʻí, ke hoko ko ha faʻifaʻitakiʻanga ki ho fāmilí mo e ngaahi kaungāmeʻá.