Sa Digital Lamang: Mga Young Adult ug ang Nagpadayon nga Pagpahiuli
4 ka Kamatuoran nga Akong Nakat-unan gikan sa Pagtuon kang Joseph Smith isip usa ka Manunulat sa Kasaysayan sa Simbahan
Ang mga young adult dili kinahanglang mahadlok sa kasaysayan sa Simbahan. Sa pagkatinuod, kamo kinahanglan nga magsusi niini.
Sa dihang gamay pa ko, ganahan kong maminaw sa mga istorya nga isulti sa akong mama kanako mahitungod ni Joseph Smith ug sa kasaysayan sa Ang Simbahan ni Jesukristo sa mga Santos sa Ulahing mga Adlaw. Nagtubo ko sa kasadpang Oregon, USA, usa ka dapit nga gilibutan sa mga tamnanan sa twerka [nut] ug agrikultura. Uban sa mga gangis nga hinay nga nagsaba-saba sa palibut, ang among pamilya magpundok diha sa among balkon sa luyo panahon sa ting-init ug maminaw sa akong mama nga mosaysay niini nga mga istorya.
Tingali kadto tungod kay batan-on pa usab ko, apan ako naintriga ilabi na sa mga istorya gikan sa pagkabatan-on ni Propeta Joseph Smith, sama sa iyang giagian nga operasyon sa bitiis aron sa pagkuha sa impeksyon sa bukog sa dihang siyete anyos pa lamang siya. O sa dihang ang pamilyang Smith mibalhin ngadto sa New York sa dihang ang batan-ong si Joseph naggamit pa og crutches tulo ka tuig human niana. Daghan kaayo ko og nakat-unan bahin ni Joseph Smith nga mas nasayud pa gani ko sa ubang makasaysayanong mga kamatuoran kay sa akong Sunday School ug Primary nga mga magtutudlo!
Pagsabut sa mga Baruganan sa Ebanghelyo pinaagi sa Kasaysayan
Samtang nagpadayon ko sa akong edukasyon, nagsugod ko sa seryusong pagtuon sa kasaysayan sa Amerika ug sa Simbahan. Nakakat-on ko og daghan mahitungod sa kultura kon diin nagpuyo si Joseph Smith ug sa konteksto diin ang Simbahan natukod. Kini nga impormasyon mipalambo sa kahulugan sa mga istorya nga akong nakat-unan sa dihang batan-on pa ko. Ang akong edukasyon nakatabang nako nga makakita nga ang pagtuon sa kasaysayan sa gipahiuli nga ebanghelyo mosangput ngadto sa mas lawom nga pagsabut sa importanting mga baruganan sa ebanghelyo. Akong nakat-unan nga kini nga proseso kinahanglan malipayon nga dawaton kay sa kahadlokan.
Niadtong Hulyo 2018, napares nako ang akong hilig sa kasaysayan sa Simbahan uban sa akong pagbansay sa kasaysayan sa dihang miapil ko sa Joseph Smith Papers Project diha sa Church History Department isip usa ka volume editor. Sa akong katungdanan, sutaon nako ang mga transcript sa makasaysayanong mga dokumento ug maghatag sa mga tigbasa og impormasyon aron mas makasabut sa mga teksto.
Sa laing pagkasulti: akong trabaho ang paghunahuna mahitungod sa kinabuhi ni Joseph Smith sa matag adlaw.
Pagtuon sa Kasaysayan uban ang Mata sa Hugot nga Pagtuo
Ang Joseph Smith nga ako labing napamilyar isip usa ka magsusulat sa kasaysayan mao ang usa ka talagsaon ug komplikado nga Amerikanong tawo kinsa nagtinguha sa paghimo og usa ka komunidad sa Zion sa lugar nga kaniadto mao ang kasadpang utlanan sa Estados Unidos. Adunay pipila ka mga aspeto sa kinabuhi ni Joseph Smith nga ang mga magsusulat sa kasaysayan walay daghang mga panabut tungod kay siya wala makahimo og usa ka talaan sa iyang mga kasinatian o mga pakigpulong.
Apan bisan pa sa unsay atong nahibaw-an o wala masayri, kinahanglan gayud aduna kitay hugot nga pagtuo kung mosusi kita sa kasaysayan isip usa ka Santos sa Ulahing mga Adlaw. Ang pagtuo sa Dios ug sa baruganan sa nagpadayon nga pagpadayag—nga ang Dios dili mohunong sa pagpakig-istorya ug paggiya sa Iyang mga anak—ang nagpabilin nga basihanan sa akong pagtuo ug naghimo kanakong nakatutok diha sa ebanghelyo nga gihigugma kaayo nako.
Ang akong detalyado, inadlaw nga mga kasinatian sa pagtuon sa kinabuhi ni Joseph Smith ug sa kasaysayan sa Simbahan sa kinatibuk-an nagtudlo kanako og pipila ka mga butang:
-
Si Propeta Joseph Smith gitawag sa Dios. Tinuod siya nga nahimong himan sa mga kamot sa Ginoo sa pagpahiuli sa Iyang ebanghelyo ngadto sa yuta pag-usab. Ug anaa na kanato ang responsibilidad sa pagpadayon niana nga Pagpahiuli.
-
Ang Dios naggamit sa dili hingpit nga mga tawo—sama kang Joseph Smith—sa pagtuman sa dako nga buhat. Matag usa kanato masayop, ug ang kamatuoran sa mga butang mao nga dili lang kita ang nasayop; bisan ang mga propeta migamit sa Pag-ula ni Jesukristo sa paghinulsol, sama nato.
-
Ang atong Langitnong Amahan personal nga nahibalo sa matag usa kanato—sa tanan nga atong kauban nga mga panglimbasug ug mga pangutana. Ang doktrina nga gipahiuli sa Dios pinaagi ni Joseph Smith nagtudlo kanato nga ang matag tawo kinsa natawo sukad pa kaniadto adunay hilabihan ka tagsa-tagsa nga bili ug walay katapusang mahangturong potensyal nga mahimong sama sa ilang Langitnong mga Ginikanan.
-
Ang personal nga pagtubo ug pagpadayag mahitabo sa tibuok kinabuhi. Si Joseph Smith malagmit mas nakasabut sa iyang Unang Panan-awon samtang nagdako siya tungod sa mapanagnaong mga kasinatian nga iyang naangkon sa tibuok niyang kinabuhi. Sa samang paagi, kita makatan-aw sa mga kasinatian nato sa atong kinabuhi sa pagkahibalo nga kita makapadayon sa pagtinguha og pagpadayag samtang naglig-on kita sa kamatuoran nga atong nakat-unan.
Isip mga young adult, ang pagpangita og mga tubag sa mga pangutana sa kasaysayan sa Simbahan ingon og makapaluya usahay, apan usa kini ka proseso nga angay buhaton. Ang inyong pagtuo malig-on samtang kamo nagkat-on sa mga istorya niadtong nakatabang sa Simbahan nga molambo sa tibuok kalibutan. Nasayud ko nga ang akoa nalig-on.