Walo ka Kamatuoran gikan sa Unang Panan-awon
Mga paghulagway pinaagi ni Christopher Wormell
Sa usa ka hayag nga buntag sa tingpamulak duha ka gatus ka tuig na ang milabay sa banikanhon, amihanang bahin sa New York, sa hilum nga kakahoyan, ang Dios nga Amahan ug ang Iyang Anak, si Jesukristo, mipakita sa batan-ong si Joseph Smith. Kining milagroso nga panghitabo mitapos sa gatusan ka tuig nga walay kasiguroan ug pagpangagpas mahitungod sa kinaiyahan sa Dios, sa panginahanglan sa padayon nga pagpadayag, ug sa ubang mahangturon nga mga kamatuoran nga dugay nang nakalimtan o natabunan sa espirituhanong kangitngit.
Si Presidente James E. Faust (1920–2007), Ikaduhang Magtatambag sa Unang Kapangulohan, kinsa mitawag sa Unang Panan-awon nga “tingali ang labing talagsaong panghitabo nga nahitabo sa yuta sukad sa Pagkabanhaw,” milatid og walo ka kamatuoran nga gipahiuli dinhi sa yuta niining talagsaong panghitabo.1 Samtang atong saulogon ang ika-200 nga anibersaryo sa Unang Panan-awon, ikonsiderar kini nga mga kamatuoran ug ang daghang pagpamatuod sa modernong mga propeta kinsa mihatag og pagsaksi dili lamang sa katinuod sa Unang Panan-awon apan usab sa mga kamatuoran nga gipadayag niini.
1. Ang Dios nga atong Amahan usa ka personal nga binuhat, ug ang mga lalaki ug babaye gihimo diha sa Iyang panagway.
“Si Joseph Smith nakat-on niadtong mga gutloa [sa Unang Panan-awon], unsa man kataas o kamubo, og mas daghan mahitungod sa kinaiyahan sa Dios kay sa nakat-unan sukad sa tanang maalamong eskolar sa relihiyon sa tanang panahon.” —Presidente Gordon B. Hinckley (1910–2008)2
“Ang Dios nga atong Amahan adunay mga dunggan nga makadungog sa atong mga pag-ampo. Siya adunay mga mata nga makakita sa atong mga lihok. Siya adunay ba-ba nga makasulti kanato. Siya adunay kasingkasing nga mobati og kalooy ug gugma. Siya tinuod. Siya buhi. Kita iyang mga anak nga gihimo diha sa iyang panagway.” —Presidente Thomas S. Monson (1927–2018)3
2. Si Jesus usa ka personahe, bulag ug lahi sa Amahan.
“Sa iyang Unang Panan-awon, nakita ni Joseph Smith ang duha ka managlahing personahe, duha ka binuhat, nga nagklaro nga dili tinuod ang nagpatigbabaw nga gituohan mahitungod sa Dios ug sa Dios nga Kapangulohan.
“Sukwahi sa gituohan nga ang Dios dili matugkad ug misteryo nga dili mahibaloan mao ang kamatuoran bahin sa kinaiyahan sa Dios ug ang atong relasyon Kaniya mahibaloan ug mao gayud ang yawe sa tanan natong doktrina.” —Presidente Dallin H. Oaks, Unang Magtatambag sa Unang Kapangulohan4
3. Si Jesukristo gideklarar sa Amahan nga Iyang Anak.
“Kami mopamatuod, ingon nga sa husto nga paagi Iyang gi-orden nga mga Apostoles—nga si Jesus mao ang Buhi nga Kristo, ang imortal nga Anak sa Dios. Siya mao ang gamhanan nga Haring Emmanuel, kinsa nagbarug karon diha sa tuo nga kamot sa Iyang Amahan. Siya mao ang kahayag, ang kinabuhi, ug ang paglaum sa kalibutan. Ang Iyang paagi mao ang dalan nga paingon ngadto sa kalipay dinhi niini nga kinabuhi ug sa kinabuhing dayon sa kalibutan nga moabut.” —“Ang Buhi nga Kristo: Ang Pagpamatuod sa mga Apostoles”5
4. Si Jesus mao ang tighatag sa pagpadayag sama sa gitudlo sa Biblia.
“Ang tanang pagpadayag sukad pa sa pagkapukan miabut pinaagi ni Jesukristo, kinsa mao si Jehova sa Daang Tugon. … Ang Amahan [si Elohim] wala gayud sukad makigsabut sa tawo sa direkta ug personal nga paagi sukad sa pagkapukan, ug wala gayud siya mopakita gawas lang sa pagpaila ug paghatag og pamatuod sa Anak.” —Presidente Joseph Fielding Smith (1876–1972)6
5. Ang saad ni Santiago nga mangayo sa Dios og kaalam natuman.
“Si Propeta Joseph Smith mipahiluna og sumbanan nga atong sundon sa pagtubag sa atong mga pangutana. Naaghat sa panaad ni Santiago nga kon kita nakulangan og kaalam kita makapangayo sa Dios, ang batang si Joseph midala sa iyang pangutana direkta ngadto sa Langitnong Amahan. …
“Sa sama nga paagi, unsa ang maabli diha kaninyo sa inyong pagpangita? Unsa nga kaalam ang kulang kaninyo? Unsa ang inyong gibati nga maoy dinaliang panginahanglan nga mahibaloan o masabtan? Sunda ang ehemplo ni Propeta Joseph. Pangita og mingaw nga lugar diin kamo kanunay makaadto. Ipaubos ang inyong kaugalingon atubangan sa Dios. Ibubo ang inyong kasingkasing ngadto sa inyong Langitnong Amahan. Dangop Kaniya alang sa mga tubag ug alang sa kahupayan.” —Presidente Russell M. Nelson7
6. Si Joseph nakakat-on sa reyalidad sa usa ka tinuod nga binuhat gikan sa dili makita nga kalibutan kinsa naningkamot sa paglaglag kaniya.
“Si Satanas, o Lucifer, o ang amahan sa mga bakak—bisan unsay itawag ninyo kaniya—tinuod gayud, siya gayud ang representasyon sa dautan. Ang iyang mga motibo sa tanang paagi dautan, ug siya mangurog sa presensya sa makatubos nga kahayag, sa paghunahuna bahin mismo sa kamatuoran. … Hangtud sa hangtud supak siya sa gugma sa Dios, sa Pag-ula ni Jesukristo, ug sa buhat sa kalinaw ug kaluwasan. Makigbatok siya niini bisan kanus-a ug bisan asa kutob sa iyang mahimo.” —Elder Jeffrey R. Holland sa Korum sa Napulog Duha ka mga Apostoles8
7. Adunay pagsupil sa Simbahan nga gitukod ni Jesukristo—si Joseph gisultihan nga dili moapil sa bisan unsa nga mga tinuohan, kay sila nagtudlo sa mga doktrina sa mga tawo.
“Ang Apostasiya, o pagsupil sa orihinal nga Simbahan nga giorganisar sa Ginoo, … gipanagna niadtong kinsa mitabang sa pag-establisar sa Simbahan sa unang higayon. Si Pablo misulat sa mga Kristiyano nga taga-Tesalonica kinsa mahinamong nagpaabut sa Ikaduhang Pag-anhi sa Manluluwas nga ‘kadtong adlawa dili pa moabut hangtud nga mahitabo una ang pagsupil’ (2 Tes. 2:3).” —Presidente M. Russell Ballard, Akting nga Presidente sa Korum sa Napulog Duha ka mga Apostoles9
8. Si Joseph Smith nahimong usa ka saksi sa Dios ug sa Iyang Anak, si Jesukristo.
“Ang pagpamatuod ni Joseph Smith nga si Jesus buhi, ‘kay [siya] nakakita kaniya, gani diha sa tuo nga kilid sa Dios; ug [siya] nakadungog sa tingog nga nagpamatuod nga siya mao ang Bugtong Anak sa Amahan’ (D&P 76:23; tan-awa usab sa bersikulo 22). Mohangyo ko sa tanang makadungog o makabasa niini nga mensahe sa pagpangita sa sama nga saksi sa pagkabalaan sa Pag-ula, ug Pagkabanhaw ni Jesukristo.” —Elder D. Todd Christofferson10