Unsa ang naa sa Kahon?

Wala mahimutang si Ava sa iyang lingkuranan. Iyang nadunggan ang iyang titser sa Primary nga nagsulti. Apan dili makahatag og pagtagad si Ava. Ang iya lang mahunahuna mao ang kahon ilawom sa lingkuranan ni Sister Obi.

Giputos kini og sinaw nga asul nga papel. Adunay bulawanong laso sa ibabaw niini. Unsa kaha kini? Giduko pag-ayo ni Ava ang iyang ulo. Mitutok siya sa kahon. Nanghinaut siya nga makakita siya lusot sa sinaw nga papel. Dili siya makahulat nga masayud unsa ang naa sa sulod.

Sa katapusan gikuha ni Sister Obi ang kahon. Gibutang niya kini sa iyang mga paa.

“Sulod niini nga kahon mao ang usa sa labing mahinungdanong nilalang sa Langitnong Amahan,” miingon si Sister Obi. “Tan-awa ang sulod. Dayon ipasa kini nga dili mosulti og bisan unsa.” Gipasa niya ang kahon ngadto ni Noah.

Hinay nga giukab ni Noah ang tabon. Mitan-aw siya sulod sa kahon. Mipahiyum siya. Dayon iyang gipasa ang kahon ngadto ni June.

Gitan-aw ni Ava ang tanan nga nagpuli-puli sa pagtan-aw. Sa tinagsa-tagsa, ang matag usa sa iyang mga higala miabli sa kahon. Mitan-aw sila sa sulod. Mipahiyum sila.

Unsa man ang importante kaayo ngadto sa Langitnong Amahan? Ug sa unsang paagi nga ang butang nga espesyal kaayo mopaigo sa ingon ka gamay nga kahon?

Sa katapusan turno na ni Ava. Iyang gialsa ang sinaw nga tabon ug mitan-aw sa sulod. Usa kadto ka salamin! Mitan-aw si Ava sa salamin sulod sa kahon. Iyang nakita ang iyang kaugalingong nawong nga mitan-aw og balik.

Nakita ni Ava ang iyang mga mata nga midako. Usa ba gayud siya sa labing mahinungdanong mga nilalang sa Langitnong Amahan? Gipangga ba siya sa Langitnong Amahan sa ingon niana ka dako?

Mipahiyom si Ava. Mibati siya og kainit ug kalipay sa sulod. Sama kadto sa usa ka dakong gakos. Dakong gakos gikan sa Langitnong Amahan. Siya nagmahal gayud kaniya! Usa siya sa Iyang labing mahinungdanon nga mga nilalang. ●