Ang Basahon ni Mormon Mao ang Among Misyonaryo
Paghulagway pinaagi ni Eva Vasquez
Human nga seryusong naaksidente ang among pag-umangkon, ang akong asawa, si Ana María, ug ako naghisgot sa among tinguha nga masayud sa kamatuoran tali sa daghang nagkalain-laing mga relihiyon ug tinuohan. Usa ka hapon milingkod ko sa akong higdaanan ug nag-ampo, “Ginoo, palihug tabangi ko nga makakita og paagi nga masayud hain nga simbahan ang tinuod.”
Paglabay sa lima ka minuto, mibagting ang telepono. Nanawag ang usa ka higala aron modapit nako ug sa akong asawa ngadto sa iyang balay aron magkat-on mahitungod sa mga produktong pangnutrisyon. Miadto kami, ug samtang didto kami, ang among higala mihatag kanamo og Basahon ni Mormon. Sa ulohang pahina adunay mubong sulat: “Hinaut nga makatabang kini nga libro aron mas mapaduol kamo sa atong Ginoong Jesukristo.”
Pagkasunod adlaw, mitan-aw ko sa libro ug nag-ampo pag-usab, “Ginoo, sultihi ko kon tinuod kini nga libro. Dili nako gustong masilo ka pinaagi sa pagbasa og butang nga dili maayo.”
Misugod ko sa pagbasa. Samtang nagbasa ko, gibati nako nga daw nakaila ko sa mga tawo diha sa Basahon ni Mormon. Pag-abut nako sa katapusan, gisakitan kaayo ko sa kalaglagan sa mga Nephite nga nakahilak ko. Nakabasa na ko og gatusan ka mga libro, apan walay libro nga nakatandog kanako sama sa nabuhat sa Basahon ni Mormon. Nasayud ko nga tinuod kini.
Usa ka Dominggo gidapit nako si Ana María nga kuyogan ko ngadto sa usa ka duol nga chapel sa Ang Simbahan ni Jesukristo sa mga Santos sa Ulahing mga Adlaw. Abi nako og dili siya gusto nga mokuyog, apan miuyon siya. Giganahan mi sa among nadunggan. Pagkahuman, ang mga miyembro sa ward nangutana kon mahimo ba nilang pabisitahon ang mga misyonaryo. “Siyempre,” mitubag mi.
Miabut ang mga misyonaryo wala madugay dala ang Basahon ni Mormon ug miingon nga duna silay mensahe nga ipaambit kanamo. “Nindot kana nga libro,” miingon ko. “Nakabasa na ko niana.” Nakalitan sila niini. Dayon gisurprisa ko ni Ana María. “Ug nagbasa ko niana karon,” miingon siya. “Naa na ko sa Mosiah.”
Iyang nakit-an ang libro diha sa lamesa diin ako kining gibilin matag adlaw sa dili pa motrabaho ug misugod usab sa pagbasa niini. Sa wala madugay gisurprisa na pud ko niya sa dihang miingon siya nga sa dihang nag-ampo ko og direksyon gikan sa Langitnong Amahan pipila ka semana na ang milabay, namulong siya sa samang pag-ampo sa laing parte sa among balay.
Giingnan nako ang mga misyonaryo nga andam na akong magpabunyag. Gitudloan kami nila sa mga leksyon, ug paglabay sa duha ka semana, ang akong asawa ug ako nabunyagan ug nakumpirmahan. Mapasalamaton kaayo kami nga ang Ginoo mipadala kanamo sa Basahon ni Mormon aron sa pagtabang kanamo nga masayud hain nga simbahan ang tinuod.