“Gusto Ko nga Mopauli”
Paghulagway pinaagi ni Allen Garns
Samtang ang akong bana ug ako naniudto sa lokal nga sandwich shop, usa ka tawo nga makita nga hugaw, nasaag, ug naglibug ang misulod. Sa dihang miadto siya sa among lamesa, nasurprisa ko nga wala siya mangayo og kwarta. Nangayo lamang siya og direksyon padulong sa Flagstaff, Arizona. Ang akong bana ug ako mihatag kaniya og direksyon. Mipasalamat siya namo ug mibiya.
Human maniudto misugod kami sa pagpauli. Wala madugay akong nakita ang tawo nga naglakaw padulong sa gasolinahan. Aduna koy kusog nga impresyon nga tabangan siya ug mihangyo ko sa akong bana nga mosulod sa gasolinahan. Akong nakita ang tawo ug akong gipaila ang akong kaugalingon. Masulub-on ug gikapoy siyang tan-awon tungod sa iyang mga mata. Ang iyang nawong morag nakulitan og lawom nga mga linya tungod sa lisud nga kinabuhi.
Nangutana ko kon unsaon niya sa pag-adto sa Flagstaff. Miingon siya nga iya kining lakwon. Nasayud ko nga imposible kini tungod kay ang Flagstaff sobra sa 120 ka milya (193 km) ang gilay-on. Gihatagan nako siya og kwarta ug gisultihan siya nga moadto sa duol nga fast-food restaurant aron mopalit og makaon ug nga mobalik ko aron sa pagdala kaniya ngadto sa estasyon sa bus ug palitan siya og tiket padulong sa Flagstaff.
Mibalik ko sa trak ug gisultihan ang akong bana unsa ang nahitabo. Tungod sa iyang problema sa panglawas, mitawag ko og higala ug mihangyo kaniya nga kuyogan ko. Miuyon siya. Nanguha kami og pipila ka suplay, pagkaon, ug tubig. Dayon mi-drayb mi padulong sa restaurant ug gikuha ang tawo.
Samtang nagpadulong kami sa estasyon sa bus, kining looy nga tawo misugod sa pagbalik-balik, “Gusto ko nga mopauli.” Nangutana ko kon sa Flagstaff ba siya nagpuyo. Dili, apan ang iyang anak, nga wala niya makasulti sulod sa pipila na ka tuig, nagpuyo didto. Mipasabut siya nga gibuhian siya gikan sa bilanggoan duha ka semana na ang milabay. Siya ug ang laing gibuhian nga binilanggo gihatud ngadto sa estasyon sa bus ug ang matag usa gihatagan og tiket. Ang laing binilanggo mikawat sa iyang tiket ug sa gamay niyang kwarta. Naglatagaw siya sa kadalanan sukad niadto. Walay gustong motabang kaniya.
“Gusto ko nga mopauli,” miusab siya pagsulti.
Naabut mi sa estasyon sa bus. Gipalitan nako siya og tiket ug gihatagan siya og gamayng kwarta ug mga suplay nga among nakuha. Mipasalamat siya kanamo ug milingkod. Sa among pagdrayb palayo, ang mga pulong niining tawhana mibalik-balik sa akong hunahuna: “Gusto ko nga mopauli.”
Dili ba mao kana ang gusto natong tanan? Kitang tanan layo sa mahigugmaong panimalay nga atong gibiyaan sa dihang mianhi kita sa yuta. Kitang tanan mahimong mahisalaag, mao nga si Jesukristo mipakita kanato sa dalan nga sundon ug, pinaagi sa Iyang maulaong sakripisyo, mibayad sa hingpit nga kantidad alang sa atong mga sala. Sama nga kining tawhana dili makabalik sa panimalay nga siya ra, dili usab kita makabalik sa atong langitnong panimalay kon wala ang atong Manluluwas.