Mga Hulagway sa Hugot nga Pagtuo
Esther Cox
Louisiana, USA
Usa lang kadto ka laing adlaw sa pagbaha human mibundak ang kusog nga mga pag-ulan sa habagatang Louisiana. Apan sa dihang ang dos anyos nga anak ni Esther Cox, si Matthew, nahulog sa lawom, kusog nga sulog sa duol nga kanal, nahimo kining labing ngil-ad nga adlaw sa iyang kinabuhi. Sa dihang nakaplagan na si Matthew sa bana ni Esther, nga si George, nag-ubog siya sa tubig sulod na sa 15 minutos.
Leslie Nilsson, Litratista
Sa hulatanan nga lawak sa ospital napuno sa mga miyembro nga nagsuporta kanamo. Sa dihang ang among bishop miabut sa ospital ug mihatag og panalangin kang Matthew, ang ako lamang nahinumduman mao ang mga pulong nga si Matthew “mamaayo ra”—apan dili sumala sa akong panahon, sa panahon sa Dios. Mibati ko nga nahupay. Nag-ampo kami ug nasayud gayud kami nga ma-OK ra ang tanan. Bisan unsa pa ang posibleng mga problema ni Matthew, aduna kami pagtuo nga mamaayo ra kini.
Gitawag nila ang kahimtang ni Matthew nga “hapit malumos nga adunay hypoxia,” nga nagpasabut og kadaot sa utok tungod sa kakulang sa oxygen. Mao kini ang labing ngil-ad nga adlaw sa akong kinabuhi, apan ang Langitnong Amahan mihatag kaniya og balik ngari kanako. Anak gihapon nako siya. Nag-atiman ko niya sulod sa 20 ka tuig. Aduna kami nindot ug ngil-ad nga mga adlaw, apan usa siya ka panalangin. Talagsaon siya. Ug ang Langitnong Amahan mitabang kanako lahos niining tanan.
Namatay ang akong bana, si George, lima ka tuig na ang milabay tungod sa kanser sa atay. Gibati nako nga giandam ko sa Langitnong Amahan alang sa iyang pagkamatay. Dili na ko gusto og dugang nga bata human ni Matthew tungod kay naghunahuna ko nga magkinahanglan siya sa tanan nakong pagtagad, apan lahi ang hunahuna sa Langitnong Amahan, ug Iyang gihatag kanako si Lilian. Mapasalamaton kaayo ko tungod kaniya. Mitabang siya kanako kang Matthew.
Dili makasulti si Matthew, apan nagtuo ko nga makasabut siya sa tanan. Ganahan siya nga maanaa sa gawas. Pasagdan nako siya nga magkamang-kamang sa palibut. Mao na ang gusto niyang buhaton. Gibati nako nga malimitahan siya sa wheelchair. Gusto nako siya nga mahimong gawasnon.
Walay gugma nga sama sa gugma gikan sa usa ka tawo nga dunay espesyal nga panginahanglan. Gimahal kaayo namo ang usag usa. Kami adunay espesyal kaayo nga kasuod. Ang Dios mipanalangin kanako. Gibuhat gayud Niya kana.
“Dili na ko gusto og dugang nga bata human ni Matthew tungod kay naghunahuna ko nga magkinahanglan siya sa tanan nakong pagtagad, apan lahi ang hunahuna sa Langitnong Amahan, ug Iyang gihatag kanako si Lillian. Mapasalamaton kaayo ko tungod kaniya. Mitabang siya kanako kang Matthew.”
“Anak gihapon nako siya,” miingon si Ester mahitungod kang Matthew. “Nag-atiman ko niya sulod sa 20 ka tuig.”
“Bisan unsa pa ang posibleng mga problema ni Matthew, aduna kami pagtuo nga mamaayo ra kini. Ug namaayo gayud kini,” miingon si Ester. “Ang Langitnong Amahan mitabang kanako lahos niining tanan.”
Si Matthew mogamit og espesyal nga wheelchair samtang anaa sa eskwelahan, diin motambong siya hangtud nga mag-22 anyos siya.