Dali, Sunod Kanako: Basahon ni Mormon
Himamata ang Upat ka Joseph sa 2 Nephi 3
Nasayud ka ba nga usa ka propeta nga ginganlan og Joseph namulong mahitungod ni Joseph Smith dul-an sa 4,000 ka tuig ang milabay?
Tan-awa kon masubay ba nimo ang tanang Joseph nga nahisgutan diha sa 2 Nephi 3: si Lehi misulti sa iyang anak nga si Joseph mahitungod sa pipila ka panagna nga gihimo ni Joseph [Jose] sa Ehipto mahitungod ni Joseph Smith, kinsa gipangalanan sunod sa iyang amahan, si Joseph.
Tan-awa ang time line sa ubos aron mas makasabut kinsa kadto nga mga Joseph ug kanus-a sila nabuhi.
Mga paghulagway pinaagi ni Melissa Manwill
Mga 1700 BC
Si Joseph [Jose], anak ni Jacob (kinsa giusab ang ngalan ngadto sa Israel), mipuyo sa Ehipto. Siya adunay duha ka anak, ginganlan og Ephraim ug Manases.
Mga 600 BC
Si Lehi, usa ka kaliwat ni Manases, mibiya sa Jerusalem ug mipanaw sa kamingawan sulod sa daghang katuigan. Didto, siya ug ang iyang asawa, si Sariah, nakaangkon og anak nga ginganlan og Joseph.
AD 1771
Si Joseph Smith Sr. natawo sa Massachusetts.
AD 1805
Si Joseph Smith Jr. natawo niadtong Disyembre 23, 1805, sa Vermont. Sa Unang Panan-awon niadtong 1820, nakakita siya sa Langitnong Amahan ug ni Jesukristo. Iyang gihubad ug gimantala ang Basahon ni Mormon paglabay sa pipila ka tuig, sama sa gisulti ni Joseph sa Ehipto nga iyang buhaton (tan-awa sa 2 Nephi 3:11).
Unsa ang Gisulti ni Joseph sa Ehipto mahitungod ni Joseph Smith?
Ang Ginoo midasig ni Joseph sa Ehipto aron makakita sa daghang mga siglo ngadto sa umaabut. Mipaambit siya sa mosunod nga mga kamatuoran mahitungod ni Joseph Smith:
-
“Usa ka manalagna ang pasanayon sa Ginoo nga akong Dios, kinsa mao ang usa ka pinili nga manalagna ngadto sa bunga sa akong mga kaliwat” (bersikulo 6).
-
“Siya mahimo nga bantugan sama ngadto kang Moises, kinsa Ako nag-ingon nga Ako mopasanay nganha kanimo, sa pagluwas sa akong mga katawhan” (bersikulo 9).
-
“Ngadto kaniya Ako mohatag og gahum sa pagdala sa akong pulong ngadto sa binhi sa imong mga kaliwat—ug dili lamang sa pagdala sa akong pulong, miingon ang Ginoo, apan ngadto sa pagdani kanila sa akong pulong, diin maanaa kanila [sama sa Biblia]” (bersikulo 11).
-
“Gikan sa kahuyang siya pagalig-unon, niana nga adlaw nga ang akong buhat pagasugdan taliwala sa tanan kong mga katawhan, ngadto sa pagpahiuli kanimo, O balay ni Israel, miingon ang Ginoo” (bersikulo 13).
-
“Kana nga manalagna panalanginan sa Ginoo; ug sila nga nagtinguha sa pagpakaulaw kaniya pagalaglagon sa hingpit” (bersikulo 14).
-
“Ang iyang ngalan pagatawgon sama kanako; ug kini sama sa ngalan sa iyang amahan” (bersikulo 15).
Sa Unsang Paagi si Joseph Smith Sama ni Joseph sa Ehipto?
Si Joseph sa Ehipto gitudlo sa paraon sa pagdumala sa pagpundok og pagkaon aron makapangandam alang sa usa ka gutom. Sa dihang miabut ang kagutom, ang mga tawo sa Ehipto ug sa laing mga dapit miadto kang Joseph aron mopalit og pagkaon. Bisan ang iyang mga igsoong lalaki miadto sa Ehipto gikan sa Balaan nga Yuta alang sa pagkaon. Ang paraon mitugot nga ang mga igsoon ug amahan ni Joseph makaangkon og pagkaon ug mopuyo sa Ehipto. Miluwas kini kanila gikan sa kagutom.
Sa panahon ni Joseph Smith, ang mga tawo nag-atubang og usa ka “kagutom” sa pulong sa Dios; gipanggutom sila alang sa tinuod nga ebanghelyo ni Jesukristo. Si Joseph Smith ang propeta nga gitawag sa Ginoo sa pagluwas kanato gikan niana nga kagutom—pinaagi sa pagpahiuli sa Iyang ebanghelyo ug pagkapari aron makadawat kita sa mga ordinansa nga gikinahanglan alang sa atong espirituhanong kaluwasan.