Sa Digital Lamang: Mga Young Adult
Usahay ang Langitnong Amahan Mopahulat Kanato sa dili pa makadawat og Pagpadayag—ug OK ra Kana
Ang pagpadayag moabut sigun sa oras sa Langitnong Amahan. Dili sa atoa.
Ako usa ka bag-ong misyonaryo nga hapit na mobiya sa missionary training center, ug wala ko masayud kon tinuod ba ang Basahon ni Mormon.
Ako mituo nga kini tinuod. Ako nakabasa niini sa makadaghang higayon ug balik-balik nga nag-ampo mahitungod niini, ingon sa gisugo ni Moroni (tan-awa sa Moroni 10:3–5). Apan ako wala gayud makadawat og tubag! Kon wala kana nga kahibalo, sa unsang paagi ako mahimong motudlo ug mopamatuod sa mga tawo sa Romania? Kinahanglan kong masayud sa akong kaugalingon, ug kinahanglan kong masayud karon.
Atol sa usa ka gabii sa oras sa pagtuon sa among klasehanan sa MTC, gikuptan nako og hugot ang akong mga kasulatan ug miduko sa akong ulo.
“Langitnong Amahan,” ako nag-ampo sa hilom, “akong nabasa kini nga basahon sa makadaghang higayon. Kon magpadayon ko isip usa ka misyonaryo, kinahanglan nakong mahibaloan: Tinuod ba kini?”
Uban sa akong mga mata nga nagpiyong pa, akong giabli ang basahon.
Ang akong mga tudlo mipunting sa Mosiah 1:6: “O akong anak nga mga lalaki, ako manghinaut nga kamo kinahanglan mahinumdom nga kini nga mga panultihon mga tinuod, ug usab nga kining mga talaan mga tinuod. Ug tan-awa, usab ang mga palid ni Nephi, diin naglangkob sa mga talaan ug mga panultihon sa atong mga amahan gikan sa panahon nga sila mibiya sa Jerusalem hangtud karon, ug sila mga tinuod; ug kita mahibalo sa ilang pagkatinuod tungod kay kita nakakita kanila.”
Kadto nga mga pulong miigo kanako nga wala pa gayud mahimo sa lain nga tudling sa kasulatan kaniadto o sukad. Matag pulong nga tinuod makita dayon gikan sa mga pahina. Sumala sa giingon ni Joseph Smith mahitungod sa iyang kaugalingong kasinatian, ang mga pulong “ingon og misulod uban sa makusog nga gahum ngadto sa matag tipik sa akong kasingkasing” (Joseph Smith—Kasaysayan 1:12). Kalit dayon nakong gibati nga ako napuno sa kalinaw ug katuyoan kay sa kahadlok o kabalaka.
Diha-diha dayon, nasayud ko nga ang Basahon ni Mormon pulong sa Dios ug nga ang Langitnong Amahan mao ang nagpadala kanako niana nga mensahe. Sama og Iya kong gisultian, Nakahibalo na ka ana. Karon trabaho na.
Ug akong gibuhat.
Ngano nga Maghulat?
Nagtuon ko ug nag-ampo mahitungod sa katinuod sa Basahon ni Mormon sa pipila na ka tuig sa wala pa nako sa katapusan nadawat ang tubag. Busa naghunahuna ko, Nganong kinahanglan kong maghulat og dugay alang sa pagpadayag nga kadto tinuod? Dili ba ako sinsero kaayo? Wala ba akoy igong hugot nga pagtuo? Siguro! Apan sa akong pagtuo dili. Nagtuo ako nga ang Ginoo naghulat og hingpit nga oportunidad sa pagtudlo kanako sa usa ka importante nga leksyon: ang pinadayag dili butang nga sayon.
Ang pagpadayag dili moabut lang tungod kay gusto nato kini. Ang pagpadayag moabut kon magkinahanglan kita niini. Ug kini moabut sigun sa oras sa Langitnong Amahan, dili atoa. Siya nasayud sa atong mga panginahanglan, ug kita makasalig sa Iyang plano nga mao ang labing maayo—bisan kon kana nagkinahanglan og pailub.
Si Elder David P. Homer sa Seventy mitudlo nga “ang mga tubag usahay dugay nga moabut . . . tungod kay kini dili husto nga panahon, tungod kay ang tubag wala kinahanglana, o tungod kay ang Dios misalig kanato sa paghimo og desisyon sa atong kaugalingon” (“Ang Pagpaminaw sa Iyang Tingog,” Liahona, Mayo 2019, 43).
Usahay naghunahuna ko nga ang Dios mas adunay salig ngari kanako kay sa ako aduna sa akong kaugalingon mismo! Makahadlok ang paghimo og importanting mga desisyon nga walay direksyon gikan Kaniya. Apan kon ako nabalaka kaayo kabahin niini, akong nahinumduman kini nga saad gikan ni Elder Richard G. Scott (1928–2015) sa Korum sa napulog duha Ka mga apostoles: “Kon kamo nagpuyo nga matarung ug nagbuhat uban sa pagsalig, ang Dios dili motugot nga kamo moabut og layo nga walay pahimangno kon nasayop kamo sa inyong desisyon” (“Ang Paggamit sa Langitnon nga Gasa sa Pag-ampo,” Liahona, Mayo 2007, 10).
Kon atong gibuhat ang unsay atong mahimo aron sa pagpangita og mga tubag ug mohimo og maayo nga mga desisyon, kita makasiguro nga ang Langitnong Amahan mogiya kanato, bisan kon kita wala makamatikod sa Iyang mga pamaagi. Dili kita kinahanglang mahadlok. Ang Langitnong Amahan nagbantay kanato uban sa gugma. Ang pagpadayag moabut—tingali dili kon kanus-a nato gusto, apan kon kanus-a kita nagkinahanglan gayud niini.