Sa Digital Lamang: Mga Young Adult
Giunsa Nako Pag-angkon ang Hugot nga Pagtuo Dihang Gibati Nako nga Nawad-an Ko sa Tanan
Ang pagkawala sa akong kamot ug pagkawala sa mga minahal lisud nga mga hagit, apan ang Langitnong Amahan mitabang kanako nga mausab alang sa mas maayo.
Usa ka gabii nagluhod ako diha sa akong higdaanan, naghangyo sa Langitnong Amahan kon Iya kong tabangan nga makaangkon og dugang nga hugot nga pagtuo, naghinumdom sa usa ka kasulatan sa Bag-ong Tugon diin mihangyo ang usa ka disipulo kang Jesukristo sa “pagpalambo sa atong hugot nga pagtuo” (tan-awa sa Lucas 17:5). Wala koy ideya nga sa dili madugay human niini nga pag-ampo, mag-atubang ako og pipila sa labing lisud nga mga pagsulay sa akong kinabuhi. Mapasalamaton kaayo ko nga ako nang gitinguha ang pagpalambo sa akong pagtuo sa Manluluwas sa dihang miigo kadtong mga pagsulay, tungod kay wala ko kahibalo unsaon kini paglahutay kon wala ang tabang sa akong Langitnong Amahan.
Pipila ka adlaw human niana nga pag-ampo, ako adunay grabe nga aksidente diin hapit ko nawad-an sa akong wala nga kamot ug kinahanglang putlon ang tanan nakong tudlo niana nga kamot. Klaro kaayo nga ang akong kinabuhi mausab na gayud. Bisan og gibati nako ang gugma sa akong Langitnong Amahan ug sa akong pamilya ug mga higala pinaagi sa taas nga proseso sa mga operasyon ug mga therapy, lisud kaayo kadto.
Usa ka adlaw human ang akong doktor misulti kanako nga kinahanglan kong mag-physical therapy sulod sa pipila ka bulan, miuli ako nga naghilak ug nangutana sa Langitnong Amahan, “Hangtud kanus-a ako kinahanglan nga molahutay niini?” Diha-diha dayon, ingon og usa ka malumo ug klaro nga tingog ang miingon nako, “Ikaw dili mouswag kon walay mga pagsulay. Nagkinahanglan pa gani ka og mas daghan pa.”
Dili ko makatuo nga ako nakadawat og tubag sa akong pag-ampo diha-diha dayon. Human nianang higayuna, determinado ako nga mopadayon gamit ang akong pagtuo. Mihukom ko nga isumiter og balik ang akong mga papeles sa misyon ug moserbisyo sa Dios, bisan pa sa akong mga hagit. Pipila ka bulan ang milabay akong nadawat ang akong tawag sa misyon ngadto sa Guatemala Guatemala City South Mission! Apan ang pag-abot niana nga punto dili usab sayon. Nagkinahanglan kini og dakong kaisug ang pagdawat sa akong kahimtang, kalimtan ang akong kaugalingon, ug modapit sa uban nga mosunod kang Kristo.
Paghinumdom nga Makahimo Ko og Lisud nga mga Butang
Nindot kaayo ang akong misyon. Nakat-on ako nga hatagan og mas dakong bili ang mga baruganan sa ebanghelyo, ug nakakita ko og pagsalig sa akong kaugalingon sa pagpakigbahin sa akong pagpamatuod ug pagdala og paglaum ngadto sa daghang mga tawo kinsa wala masayud asa kini pangitaa. Gibati nako ang akong kasingkasing nga giusab sa Langitnong Amahan. Wala pa gayud nako sukad masinati unsa ang bation nga mohigugma sa mga estranghero ug andam nga mohatag sa tanan nga anaa nako alang kanila sa walay pagduha-duha hangtud karon—naglakaw kada adlaw, ulan o init, ang akong mga tiil gikapoy ug nanakit.
Pagkahuman sa akong misyon, kadtong tanan nga mga kasinatian nakatabang kanako nga magpabiling malaumon bisan sa gubot ug mabaw nga kalibutan sa amo. Mipauli ko sa lisud kaayo nga panahon alang sa akong pamilya ug sa akong nasud. Adunay daghang politikal ug ekonomikanhong mga problema, ug daghang mga pamilya ang mibalhin ngadto sa laing mga nasud tungod sa kakulang sa mga oportunidad sa panarbaho ug edukasyon. Dili ko makatuo nga nausab og maayo ang mga butang sa mubo lang kaayong panahon, bisan diha sa akong kaugalingong pamilya. Pipila sa akong mga minahal ug mga higala namatay usab. Hilabihan akong nabug-atan sa mga kalisdanan sa akong palibut.
Usa ka adlaw, nawad-an sa kadasig, akong gidala ang akong gigamit nga notebook sa pagtuon ug misugod sa pagsulat mahitungod sa mga pagbati sa akong kasingkasing. Naghunahuna ko sa daghan nakong mga kasinatian samtang nagserbisyo sa uban sa akong misyon. Ang paghinumdom niadtong espesyal nga mga kasinatian mao gayud ang akong gikinahanglan aron mas labaw pa nga moapil sa Iyang buhat, sa pagserbisyo ug padayon sa pagpalambo sa mga gasa nga Iyang gipanalangin kanako. Nianang adlawa usa ka espesyal kaayo nga hugpong sa mga pulong nga kanunay nga gibalik-balik sa asawa sa akong presidente sa misyon ngadto kanamo nahimong tataw kaayo: “Kamo makahimo sa lisud nga mga butang.” Naningkamot ko nga kanunay kana nga hinumduman, lakip na samtang nagkat-on sa paggamit sa usa ka prosthetic nga kamot ug naningkamot nga magpuyo og normal nga kinabuhi.
Nausab aron Mahimong mas Maayo
Sa tibuok kalisdanan nga akong nasinati, ang akong pagpamatuod mitubo—ilabi na ang akong hugot nga pagtuo sa mga milagro. Ang mga milagro mahitabo kon magpakita kita nga mobuhat og butang uban ang determinasyon, pagkamakanunayon, ug hugot nga pagtuo. Kadtong kinsa nagtuo sa Langitnong Amahan aduna kanunay paglaum sa bisan unsang kahimtang.
Nasayud ko nga magpadayon ang mga pagsulay sa akong kinabuhi, apan dili ako kinahanglang mahadlok tungod kay ang mga pagsulay makapaduol nato ngadto sa Langitnong Amahan, kinsa makatabang kanato nga masayud unsaon sa pag-uswag. Ang akong aksidente ug ang matag lisud nga hagit nga akong naagian sukad nagpahinumdom kanako nga moduol sa Langitnong Amahan alang sa panabang. Ug Siya mitabang kanako nga mausab aron mahimong mas maayo. Nalipay kaayo ko nga ako nag-ampo alang sa dugang nga pagtuo, ug ako nasayud nga pinaagi sa akong mga pagsulay, ako nakahimo sa pagserbisyo sa Langitnong Amahan ug mas napaduol ngadto Kaniya. Bisan kon sa unsang paagi ang akong kinabuhi nausab tungod sa akong mga pagsulay, malipayon kaayo ko ug mapasalamaton kaayo ko nga nakaabut og hangtud niini ka layo uban sa tabang sa Langitnong Amahan. Dili ko makahulat sa adlaw nga ako mabanhaw—kon ako makakita Kaniya pag-usab ug sultihan Siya og, “Salamat! Salamat sa pagpaubos kanako, salamat sa pagtabang kanako nga molambo sa bisan unsang paagi, salamat sa ‘pagpalambo sa akong pagtuo!’”