Pagpangalagad pinaagi sa Family History

Bag-ohay lang sa akong pagpauli sakay sa eroplano, akong nakatapad si Steve, kinsa mipaambit kanako og mga parte sa iyang personal nga istorya. Migradwar siya sa high school, misulod sa U.S. Army isip communications specialist sa edad nga 18 anyos, ug sa wala madugay misugod sa pagtrabaho diha sa White House, nga naghatag og suporta sa komunikasyon sa Presidente sa Estados Unidos. Sa edad nga 18 hangtud 26, nakaserbisyo siya og duha ka Presidente sa U.S. Makalingaw ang iyang mga istorya!

“Steve,” miingon ko, “kinahanglan nimong isulat kini nga mga istorya alang sa imong kaliwatan! Kinahanglang direkta nilang maangkon kini nga mga istorya gikan sa imong panglantaw.” Miuyon siya.

Dayon ang Espiritu miaghat kanako sa pagpangutana kaniya kon unsay iyang nahibaloan mahitungod sa iyang katigulangan. Daghan og nahibaloan si Steve sa habig sa iyang inahan, lakip ang istorya nga nanihapon ang iyang pamilya uban ni Abraham Lincoln samtang nangampanya kini sa kabaranggayan panahon sa presidensyal nga eleksyon sa US sa 1860.

Hinoon, gamay ra kaayo siya og nahibaloan mahitungod sa habig sa iyang amahan. Gusto gayud niyang masayud pa og dugang. Akong gipagawas ang akong telepono ug giablihan ang FamilySearch nga app. “Steve, mahimo natong pangitaon ang imong pamilya karon dayon!”

Mikonektar ko sa Wi-Fi sa eroplano. Gibutang nako ang akong telepono sa tray table sa akong atubangan aron pareho mi nga makakita. Gisiksik namo ang FamilyTree. Sa pipila lang ka minuto nagtutok na kaming duha sa sertipiko sa kaminyoon sa iyang lolo sa tuhod ngadto sa iyang lola sa tuhod.

“Mao na sila!” miingon siya. “Nakahinumdom nako ron sa iyang apelyido!”

Ang diwa sa kahinam mipatigbabaw namong duha. Naningkamot kami nga momugna og mga profile alang sa iyang wala kaayo mailhi nga katigulangan sa misunod nga 45 minutos. Mihangyo siya nako nga mosaad kaniya nga among ipadayon ang pagsiksik og dungan didto sa Colorado. Nagbinayloay mi og impormasyon sa pagkontak samtang padulong na og tugpa ang eroplano.

Ania kami, naglupad og 30,000 ka piye (9,144 m) sa kahanginan, gamit ang usa ka himan nga sama ka gamay sa akong kamot, nagsiksik sa usa ka lalaki ug babaye nga naminyo 100 ka tuig na ang milabay kinsa nawagtang na kaniya ug sa iyang pamilya. Pagkatalagsaon! Apan nakit-an namo sila. Nasumpay ang mga pamilya. Ang mga istorya nahinumduman. Mibati ko og pagpasalamat alang sa teknolohiya ug sa mga himan. Usa gayud kadto ka milagro.

Imahe

women hugging

Si Maria dili kaayo aktibo sa sobra na 20 ka tuig. Pipila ka bulan ang milabay, migahin kami og pipila ka oras uban kaniya sa among panimalay, nagsusi sa iyang pamilya pinaagi sa census ug sa ubang mga rekord. Sa usa ka higayon nakahilak siya nga mituaw, “Mas daghan ko og nakat-unan kalabut sa akong pamilya sulod sa duha ka oras kay sa akong nahibaloan sa tibuok nakong kinabuhi!”

Sa katapusan sa among panag-uban, among gipakita kaniya ang Relatives Around Me [Kabanay sa Akong Palibut] nga parte sa FamilyTree nga app. Among nasayran nga ang akong bana ug ako paryente diay ni Maria nga medyo layo na. Nakahilak na usab siya, nag-ingon nga nagtuo siya nga siya rang usa. Wala gayud siya masayud nga aduna siyay pamilya diha sa dapit. Paglabay sa pipila ka semana nakigkita si Maria sa among bishop. Naningkamot siya karon nga mahimong takus alang sa templo, ug daghan siyang nahimamat nga “bag-o” nga mga ig-agaw sa among ward!

Si Ashley, usa ka sister nga akong gipangalagaran, ug ako adunay mga talamdan sa pagluto [cookbook] gikan sa among mga lola. Ang iyaha gikan sa iyang apohan sa tuhod, ug ang akoa usa ka basahon nga akong gihugpong sa dihang akong napanunod ang kahon sa mga resipe ni Lola Greenwood human kini namatay.

Si Ashley ug ako parehong mipili og resipe gikan sa among mga talamdan sa pagluto, ug nag-uban kami usa ka gabii human sa trabaho aron sulayan kini. Gipili niya ang resipe nga blondie dessert, mao nga kini ang una namong gihimo ug gibutang kini sulod sa hudno. Akong gipili ang “pink chip dip”—ang kanunayng giandam nga pagkaon sa matag party sa pamilyang Greenwood. Ang anak ni Ashley nga si Alice mitabang kanamo sa pagtilaw sa pagkaon. Dayon, tungod kay dili gusto ni Ashley nga kaonon sa iyang mga anak ang tanang blondie, gihiwa-hiwa niya kini ug gihatud ngadto sa mga sister nga iyang gialagaran.

Ang labing ganahan nako sa among gabii sa resipe mao nga samtang nagluto kami, naghisgut kami sa tanang regular nga mga hilisgutan sa pagpangalagad—ang iyang mga panlimbasug ug ang ako. Apan naghisgut usab kami sa among mga lola ug mga mama, nga emosyonal alang kanamong duha.

Ang family history makahatag og mga oportunidad sa pagpangalagad kon daw wala nay laing mosalir. Ania ang pipila ka mga ideya nga mahimo nimong sulayan.

• Tabangi sila sa pag-upload og mga litrato sa pamilya ngadto sa FamilySearch.

• Tabangi sila sa pagrekord ug pag-upload og mga audio recording sa mga istorya sa family history, ilabi na niadtong motakdo sa mga litrato.

• Paghimo og fan chart o ubang ma-imprinta nga dokumento sa family history nga mahimo nimong mahatag isip gasa.

• Pagtudlo og mga paagi sa pagrekord og ilang kaugalingong kasaysayan pinaagi sa paghimo og journal sa paagi nga malingaw sila. Audio nga journal? Litrato nga journal? Mga video log? Adunay daghang opsyon alang niadtong dili ganahan sa naandang mga format sa journal.

• Pagdungan og adto sa templo aron sa pagbuhat sa mga ordinansa alang sa katigulangan. O tanyagi sa pagbuhat sa mga ordinansa alang sa mga ngalan sa ilang pamilya kon daghan ra ang anaa kanila kay sa ilang mahimo.

• Pakigpundok aron sa pagpaambit og mga tradisyon sa pamilya.

• Pagtambong og dungan sa klase sa family history.