Kinsa Si Isaias?

Imahe

Isaiah

Paghulagway pinaagi ni Allen Garns

Ang Manluluwas mitudlo, “Mahinungdanon ang mga pulong ni Isaias,” ug misugo Siya kanato sa pagtuon niini (tan-awa sa 3 Nephi 23:1). Daghan sa mga pagtulun-an ni Isaias nagsimbolo sa mortal nga pangalagad ug Ikaduhang Pag-anhi ni Jesukristo. Ang iyang mga pulong bililhon kaayo nga, diha sa 2 Nephi 12–24, gisulat kini ni Nephi aron ang mga tawo nga mobasa niini unta “mobayaw sa ilang mga kasingkasing ug magmaya” (2 Nephi 11:8).

• Mialagad si Isaias isip propeta gikan sa 740–701 BC. Mga 40 kana ka tuig! Sa panahon sa iyang calling, si Isaias dili tingali ang puti og buhok nga tigulang nga kasagaran natong mahunahuna. Makabasa ka mahitungod sa iyang calling diha sa 2 Nephi 16.

• Aduna siyay pamilya. Makabasa ka mahitungod sa iyang asawa, “babaye nga propeta,” ug ang pagngalan sa Ginoo sa iyang bag-ong natawo nga anak diha sa 2 Nephi 18:3.

• Siya ang labaw nga tigtambag ni Haring Ezechias. Si Isaias adunay dakong impluwensya sa Jerusalem. Sa unsang paagi kaha nakatabang kana kaniya sa iyang tahas isip propeta?

• Si Isaias mao ang labing kanunay nga gikutlo nga propeta diha sa kasulatan. Trayntay dos porsyento sa basahon ni Isaias gikutlo diha sa Basahon ni Mormon; laing tulo ka porsyento gisulti sa lahi nga pagkahan-ay. (Tan-awa sa Old Testament Student Manual, 3rd ed. [Church sa Church Educational System, 2003], 131.) Unsa ang imong paborito nga bersikulo gikan sa Isaias?

• Ang ngalan nga Isaias nagpasabut nga “ang Ginoo mao ang kaluwasan.” Siguradong mitudlo siya niana! Sa unsang paagi ang imong pagdala sa ngalan ni Jesukristo mogiya sa imong mga desisyon?