Fua Au Filifiliga e Tusa ma Tulaga Masani o le Faavavau, Na Saunoa Atu ai Se Taitai o le Ekalesia i Tagata [Aoga] i le BYU

Sa i ai Elder Jack N. Gerard o le Fitugafulu i ni tauiviga tugā o le olaga o se tagata a’oga i le iunivesite i le 20-ma ona tupu o ona tausaga. Na ia faaipoipo atu ia Claudette o se tagata e le’i uma lana aoga. Sa la amatalia loa se aiga. Mo le isi ono tausaga, sa ia faigaluega, auauna atu i totonu o se pulega a le au epikopo o le lotoifale, ma ave ni vasega po e faauma ai lana aoga ma lana tikeri i mea tau tulafono i le Iunivesite o George Washington i Washington, D.C.

I le lotolotoi o avega, le pisapisaō ma le pisi, o se tagata na te le iloaina sa tusia se tusi mo i la’ua ma lona toalua, ma faitioina le au Gerards mo le faavaivaia o i la’ua lava e ala i le faia o mea e tele i se taimi puupuu. Sa ta’u atu e lea tagata o a la’ua faamuamua e le’o lelei. Faatasi ai ma le popole masani i soo se tagata lava e oo i lenei tulaga, o lenei mea na faatupulaia ai lo la’ua atuatuvale i taimi na latou fesiligia ai a la’ua filifiliga o le olaga.

“Ma te le’i mautinoa o le a tauia a ma’ua taumafaiga,” na saunoa ai Elder Gerard, o le na mulimuli ane auauna atu o se peresitene ma se Pule Sili o ni faalapotopotoga lauiloa mo le tele o tausaga, e aofia ai, lata mai nei, le American Petroleum Institute. “Na ma mafaufau ma le leotetele pe na aogā uma. O aso taitasi e foliga mai o se faatinoga o le faatuatua ao ma taumafai ai e tumau faamaoni i a ma tautinoga ao ma savavali ai i faigata o le olaga. O lea la ua uma le aafiaga, ma te mafaufau loloto i na aso ma le fiafia ma le mafai ona iloa le aao o le Alii o taitaiina i ma’ua i laasaga uma o le olaga.”

O le lesona mo lana au maimoa (tagata aoga o le Iunivesite o Polika Iaga, o e na matamata mamao atu ona o lapataiga o le KOVITI-19) sa faigofie: Afai e te tuu atu lou faamoemoega i le Atua, e le gata o le a lelei mea uma—o le a latou maua faamanuiaga e faavavau.

Na saunoa Elder Gerard, le faatonu sili o le Matagaluega o Fesootaiga a le Ekalesia, o ia ma Claudette ua fuaina filifiliga taua uma o o la olaga e tusa ma tulaga faatonuina o le ola e faavavau (o le tasi mau o loo ta’ua o “le meaalofa silisili lea o meaalofa uma a le Atua”).

“Ma te taulaina i ma’ua lava i le faamoemoe o le ola e faavavau ona ma te manaomia se faailo e tulimatai ai, ae maise lava pe a le manino filifiliga mai lea aso i lea aso ma o nisi taimi e le mautonu lava,” na ia saunoa ai.

O lea faiga e taua tele, na faaopopo atu ai Elder Gerard, e aumaia le tasi “e faasaga i faiga fai fai malie e tau atu i faatusatusaga, lea e toatele i latou e amata ai ona fuaina a latou amio e tusa ma amio a isi, ua le toe saili e faia le finagalo o le Alii ae na o le faia o se mea e sili atu ai nai lo le isi.”

I le faaaogaina ai o lenei auala i le olaga, na saunoa ai Elder Gerard, o le a mafai ai e ana tamaiti aoga o loo matamata mamao mai ona toe tepa i tua i se aso i o latou olaga ma le maofa i mea ofoofogia na faia e le Atua. Na ia faasino atu i upu a Amona, o se faifeautalai sa Nifae tautaua i le Tusi a Mamona. I le faafiafiaina ai i se taunuuga maoae o se misiona na tumu i luitau mo le 14 tausaga ina ia fesoasoani i le au sa Lamana ia iloa atili e uiga ia Iesu Keriso, na fesili ai Amona, “Sa mafai ea ona tatou manatu, ina ua tatou amata . . . o le a tuuina mai e le Atua ia te i tatou ni faamanuiaga tetele faapenei?” (Alema 26:1)

“E pei o Amona, atonu o le a faigata ia i tatou taitoatasi ona tau mafaufau pe o le ā le tele o faamanuiaga ua saunia e le Alii mo i tatou,” na saunoa ai Elder Gerard. “E tusa lava po o le a le masani po o le taua, o filifiliga uma o se filifiliga e ono mafai ona tatou faalatalata atu ai pe taumamao ai foi mai lo tatou taunuuga faamoemoeina. . . . Ou te fautuaina nei oe ao e a’oga ma i lou olaga atoa ia tumau pea lou faamoemoe i le Alii, ia faalogo i Ana fautuaga—e tusa pe le manino le ala—ia iloa faamanuiaga sili o le a Ia tuuina atu ia te oe.”