Itulau i le lotoifale
O Auaunaga Faalevaega o le Tali Atu i Mafatiaga o Tagata Samoa Faanoanoa
E 83 na maliliu, e toatele lava o tamaiti, mai le pipisi ai o le misela i Samoa.
Mai ia Setema 2019 e oo atu i le amataga o le 2020, na aafia ai Samoa i le faama’i pipisi o le misela.
E ui na aafia isi atumotu, ae lei tutusa lagona ma Samoa i le aafia ai o le 5,707 o tagata ma le 83 na maliliu.
O le toatele o e na maliliu o tamaiti e i lalo ifo o le fa tausaga, na tuua ai le tele o aiga e tauivi ma le loloto o faanoanoaga.
I le tali atu i manaoga o aiga na motusia mafutaga ma e pele i le misela, na auina atu ai e Le Ekalesia a Iesu Keriso o le Au Paia o Aso e Gata Ai le vaega o Auaunaga e Tali Atu i Mafatiaga (ATM) e aofia ai tagata tomai faapitoa mai Niu Sila, Samoa, Amerika Samoa ma Toga.
O lenei vaega o tomai-eseese o foma’i o le mafaufau, tagata faigaluega laiseneina i falema’i, auaunaga i aiga, pule o uelefea ma le ola tutoatasi, foma’i ma faifeautalai na vaevaeina i vaega e tolu. O vaega e lua na auauna atu i le motu o Upolu e sili ona toatele ai tagata ma le isi vaega na malaga atu i Savaii, o se motu mamao atu o Samoa.
O le latou matafaioi o le auauna atu lea i aiga mafatia taitasi, e tuuina atu le alofa, faamafanafanaga, ma lagolagoina i le aoao atu o auala e taulimaina ai mafatiaga ma amata ona faamalolo.
Na ta’ua e le Peresitene o le Siteki Adney Reid le faamatalaga a le Aposetolo o Robert D.Hales e faapea “E oo i tagata uma mafatiaga; o le ala tatou te tali atu ai e taitoatasi.”
O Elder ma Sister Edwards, o se ulugalii matutua e auauna atu faamisiona i le Uelefea ma le Ola Tutoatasi i Amerika Samoa, o e na avea ma se vaega o le Auaunaga e Tali Atu i Mafatiaga, na saunoa mai, “O se faamanuiaga lava, le vaiaso ao lumanai le Kerisimasi, le i ai faatasi ma aiga na tele mafatiaga, e tuuina atu savali o le talalelei o le olioli sili.”
O Elder Galu ma Sister Misirita Matagi, o ni Samoa uma, na auauna atu o ni faifeautalai i le motu o Savaii. Na galulue o ni faaliliu upu mo le au Edwards ao feiloai atu ai i aiga i Savaii.
“O le tali sa matuai lofituina lava i le tele o asiasiga e faaiu lava i loimata ma ni opo,” na fai mai ai Sister Edwards.