Naʻá Ku Fili ke U Moʻui. Ko e Founga ʻEni Te Ke Lava Ai ʻo Tokoniʻi Ha Taha ke Moʻuí

Tuʻo hongofulu mā fā.

Ko e tuʻo hongofulu mā faá, ko e tuʻo lahi ia ʻo e taimi ne hoko fakafokifā ai ha meʻa ʻi hoku ʻatamaí, ʻo tupunga ai ʻeku fakakaukau he ʻikai te u lava ʻo hoko atu ʻi he moʻuí. Naʻe fakamamahi kiate au ʻa e taimi kotoa ko ʻení, ka naʻe fonu ʻi ha ngaahi mana fakahaofi moʻui.

Ko e taha ʻeni ʻo e ngaahi fehuʻi angamaheni ʻoku fehuʻi mai ʻe he kakaí ʻi he taimi ʻoku nau ʻiloʻi ai ʻeku faingataʻaʻiá, “Ko e hā te u lava ʻo fai ke tokoni atu aí?” ʻI he feinga ke tali ʻa e fehuʻi ko ʻení mo tokoniʻi e niʻihi kehé ʻi heʻenau ngāue fakaetauhí, ʻoku ou loto ke u vahevahe atu ʻa e lisi ko ʻeni ʻo e ngaahi meʻa ʻaonga taha ʻe 14 kuo fakahoko ʻe he niʻihi kehé maʻaku ʻo u maʻu ai ʻa e mālohi ke u moʻuí.

1. Vakaiʻi ʻenau malú ʻi he taimi pē ko iá. ʻI he taimi ne u fekumi ai ki ha tokoní, kuo tali vave mai ʻe he kakaí ʻaki ʻenau fai ha ngaahi fehuʻi peheni: “ʻOkú ke nofo toko taha he taimí ni?” “ʻOkú ke fakakaukau nai ke fakahoko ha meʻa?” “ʻE lava nai ke u ʻalu atu ke ta talanoa?” ʻE lava ke ʻoatu ʻe he ngaahi fehuʻi ko ʻení ke nau toe vakaiʻi ai ʻa e meʻa ʻoku hokó pea fili pe ʻoku fie maʻu nai ke nau kau atu ai.

2. Fakapapauʻi ʻoku ʻikai ke nau nofo toko taha. ʻE fakatupu ʻe heʻenau nofo toko tahá, ha ngaahi fakakaukau mo ha ngaahi ongo ʻe kovi angé ʻo aʻu ki he ʻikai ke nau toe lava ʻo makātakiʻi. ʻI he ngaahi momeniti ʻo ʻeku ongoʻi vaivaí, kuo tokoni mai hoku fāmilí mo e ngaahi kaungāmeʻá, te nau omi ki hoku ʻapí ʻo nofo fakataha mo au pe ko ʻenau omi ʻo ʻave au ke mau feohi.

3. Fakahaaʻi ʻa e ʻofá. ʻOku ʻuhinga e foʻi lea faingofua ʻe nima, “‘Oku ou ʻofa ‘iate koe”, ki he “ʻOku ou loto mo fie maʻu ke ke moʻui. Kapau te ke mate, te u loto-mamahi, ko ia ai, ʻoua muʻa te ke loto-foʻí.” ʻOku ʻomi ʻe he ngaahi lea ko ʻení ha mālohi kiate au mo tokoni ki heʻeku malava ko ia ke kātakí.

4. Palōmesi ange ʻe toe lelei ange e meʻa kotoa. ʻI hoku ngaahi momeniti faingataʻaʻia tahá, naʻe lōmekina au ʻe he loto-mafasiá. ʻI hono fakamanatu mai ʻe ha taha ʻoku ʻi ai ha ʻamanaki leleí, ko e ongo ʻoku ou maʻu ʻi he taimi ko iá ʻe ʻikai ke taʻengata ia, ʻokú ne ʻomi ha meʻa ke u toe maʻu ai ha ʻamanaki lelei. ʻOku ʻikai ke u ʻiloʻi ʻe lava ke toe ʻi ai ha meʻa ʻe lelei ange, ka ʻoku lava ke u falala ki he ʻamanaki lelei ʻa ha taha.

5. Fāʻofua ʻi he loto ʻofa. ʻOku lava ke ʻomi ʻe he faʻahinga fetuʻutaki fakatuʻasino ko iá ha fakafiemālie ʻi he taimi ko iá ki hoku loto kuo kafó. ʻOku ou ongoʻi malu ʻi he taimi ʻoku fāʻofua mai ai ha taha kiate aú pea kamata ke holo hifo ʻa e mamahi lahi ʻoku ou ongoʻí ʻi ha kiʻi momeniti siʻi.

6. Tokoniʻi kinautolu ke feau ʻenau ngaahi fiemaʻu fakatuʻasinó. ʻI he taimi ʻoku hangē ai kuo fakaʻau ke holofa ʻa e meʻa kotoa ʻi heʻeku moʻuí, ʻoku faingataʻa leva hono feau ʻeku ngaahi fiemaʻu tefitó. ʻOku ngaohi ʻe hoku husepānití ʻa ʻeku meʻatokoní, fakamanatu mai ke u inu e vaí, mo tokoniʻi au ke u fakahoko ʻa e meʻa ʻoku fie maʻú kae lava ke u mohe lelei ʻi he poʻulí. ʻOku fehokotaki ʻa e ngaahi fie maʻu tefito ko ʻení ki hono tokangaʻi hoʻo moʻui lelei fakaeʻatamaí.

7. Toutou lea ʻaki, “He ʻikai tuku ʻeku ʻofa ʻiate koé. ʻOku ʻikai ko ha kavenga koe kiate au.” ʻI he ngaahi taimi faingataʻa ko iá, ʻoku ou saiʻia maʻu pē ʻi he fanongo he ʻikai mole ʻa e tokotaha kotoa pē ʻoku mau feohí ʻo kapau te u kole tokoni.

8. Fakaʻataʻatā ho taimí ke fanongo mo talanoa. ʻI he taimi ʻoku ʻākilotoa ai au ʻe he faingataʻá, ʻoku fihi ha ngaahi fakakaukau lahi ʻi hoku ʻatamaí. Taimi ʻe niʻihi ʻoku fakaʻatā ʻe he talanoá ke u fakatokangaʻi ai ʻoku ʻikai lelei ʻa e ngaahi fakakaukau ko iá. ʻI he ngaahi taimi kehé, ʻoku lava ke u maʻu ha mahino mo ha nonga ʻi he ngaahi tali ʻa e niʻihi kehé.

9. Fakamanatu kiate kinautolu ʻoku fie maʻu pē ke nau ngāue māmālie ʻi he ʻaho kotoa pē pe miniti kotoa pē. ʻI he taimi ʻoku ou fuʻu loto-mafasia lahi aí, ʻoku ʻikai ke u lava ʻo fakakaukau ki he taimi lolotonga ko iá neongo pe ko e hā e lahi taha ʻeku feingá. ʻOku fakafonu ʻeku fakakaukaú ʻi he taimi pē ko iá, ʻaki ʻa e meʻa kotoa pē ʻoku fie maʻu ke u fai ʻi he kahaʻú. ʻOku hoko hono fakamanatu mai ʻe ha taha ke u tukuange ʻa e ngaahi meʻa kotoa pē ko iá, ke fakafiemālieʻi ai ha niʻihi ʻo e ngaahi loto-hohaʻa ko iá.

10. ʻAi ke nau palōmesi atu te nau moʻui pea te nau hokohoko atu ʻi he fekumi ki ha tokoni. ʻOku mālohi ‘a e ngaahi palōmesí. ʻOku ʻomi ha ivi lahi moʻoni ʻe hono lea leʻo lahi ʻaki ʻa e, “‘Oku ou palōmesi atu he ʻikai te u fai ha meʻá”. ʻOku fuʻu faingataʻa moʻoni ke lea ʻaki e ngaahi lea ko iá ʻi he ngaahi momeniti faingataʻa tahá, ka ʻi heʻeku lea ʻaki iá, ʻoku ou ʻilo kuo pau ke ʻoua naʻá ku foʻi. ʻOku ou ʻilo he ʻikai lava ke u maumauʻi ʻeku palōmesí.

11. Tokoniʻi kinautolu ke nau maʻu ʻa e tokoni fakatuʻasino, fakaeloto, fakapalofesinale, mo fakalaumālie ʻoku nau fie maʻú, kau ai hono maʻu ha tāpuaki ʻo e lakanga fakataulaʻeikí, talanoa mo ʻenau pīsopé, sio ki ha toketā pe faifaleʻi, pe ʻalu ki falemahaki, ʻo kapau ʻe fie maʻu.

12. Vahevahe ange hoʻo loto-falala kiate kinautolú. Naʻe pehē mai ʻe ha tokotaha kiate au, “Kuo tuʻo lahi hoʻo aʻusia ha tuʻunga fakamamahi moʻoni kimuʻa, ka kuó ke ikuna ʻi he taimi kotoa pē. Te ke toe lava pē ʻo fai ia.” Naʻe toe fakapapauʻi mai ʻe haku kaungāmeʻa ʻe taha, “He ʻikai ke ke fakahoko ha meʻa kehe. Te ke lavaʻi ʻeni.” Kuo ʻomi ʻe heʻenau falala kiate aú ha mālohi. ʻOkú ne tokoniʻi au ke u ʻiloʻi ʻoku ou mālohi ange ʻi he loto-mafasiá.

13. Fakamanatu ange te ke loto-mamahi kapau te nau mate. ʻOku tokoni ʻeni ke u fakakaukau ki he niʻihi kehé kae ʻikai ko au pē pea manatuʻi kinautolu ʻoku ou ʻofa taha aí pea mo ʻenau loto-mamahi kapau te u mate.

14. Tokoniʻi kinautolu ke nau ʻiloʻi ʻoku malava maʻu pē ʻa e fakamoʻuí. Ko e meʻa fakafiemālie taha kuo talamai ʻe ha taha kiate au ko e, “Kuo teʻeki ke ke fuʻu mamaʻo ʻaupito mei he moʻuí. He ʻikai ke ke fuʻu mamaʻo ʻaupito kapau ʻokú ke kei ʻi heni.” ʻOku ou faʻa fakakaukau ki ai he taimí ni, tautautefito ki he taimi ʻoku talamai ai ʻe he ngaahi fakakaukau loi ʻi hoku ʻatamaí, ʻoku ou fuʻu faingataʻa ʻaupito ke fakamoʻui.

Neongo kuo ʻahiʻahiʻi ʻe he ngaahi taʻu kuo hilí ʻa ʻeku tuí mo fakamamahiʻi hoku laumālié, ka kuó u mātā foki ha ngaahi mana. Kuo liliu ʻa ʻeku moʻuí ʻe he ngaahi sīpinga taʻefaʻalaua mo mālohi kuó u mātā ʻi he “tangi fakataha mo kinautolu ʻoku tangí … pea fakafiemālieʻi ʻa kinautolu ʻoku ʻaonga ki ai ʻa e fakafiemālié” (Mōsaia 18:9). Kuó u maʻu ʻa e manavaʻofá mo e mahinó ʻi heʻeku ʻiloʻi ʻa e ngaahi faingataʻaʻia ʻo e niʻihi kehé pea ʻi heʻeku ongoʻi honau ngaahi loto-mamahí ʻi ha ngaahi founga fakaʻofoʻofa. ʻOku ou maʻu ha ʻamanaki lelei ʻi he ngaahi lea ʻa Sisitā Leina I. ʻApētó, “ʻOku ou fakamoʻoni kiate kimoutolu ‘lolotonga e ngaahi faingataʻá,’ te tau kei feʻao pē mo e ʻEikí, koeʻuhí ke lava ʻo, ‘folo hifo [hotau] faingataʻaʻiá ʻe he fiefia ʻia Kalaisí,’ pea ‘ʻoku ʻi he ʻaloʻofá ʻa [hotau] fakamoʻuí, ʻo ka hili [ʻetau] fai ʻa e meʻa kotoa pē ʻe ala faí’” (“[Lolotonga e Ngaahi Faingataʻá, ʻEiki, Ta Feʻao Pē]!” Ensign pe Liahona, Nōvema 2019, 59).

Kuó u fakamoʻoniʻi ʻa e mālohi faifakamoʻui ʻo Sīsū Kalaisí ʻi heʻeku moʻuí, ʻo ne ʻomi kiate au ʻa e mālohi ke kātakí mo e malava ke maʻu ha fakamoʻuí. ʻE lava ke ke hoko ko e tokotaha ʻokú ne tokoniʻi ha taha kehe ke ne maʻu ʻa e mālohi ke moʻuí.