Ne Ma Tuʻu ʻi he ʻao ʻo e Fale Aleá
Naʻá ma nofo mo hoku husepānití ʻi Nuʻusila lolotonga e 2012 ʻi he taimi naʻe tālangaʻi ai ʻe he Fale Aleá ha lao fakaangaanga te ne fakaʻuhingaʻi foʻou ʻa e nofo-malí mo e fāmilí. Naʻá ma lau ʻa e lao fakaangaangá pea naʻá ma hohaʻa ki he founga te ne uesia ʻa e tauʻatāina fakalotú pea mo e toputapu ʻo e tuʻunga fakaefaʻeé, tuʻunga fakaetamaí, mo e nofo-malí.
Naʻe fakaafeʻi ʻe he Fale Aleá ʻa e tokotaha kotoa pē ʻi he fonuá, ko ha konga ʻo e ngāué, ke nau ʻomi ʻenau fakakaukau ki he lao fakaangaangá. Naʻá ma ʻiloʻi naʻe mahino ʻa e tokāteline ʻa e ʻEikí ki he nofo-malí mo e fāmilí ʻi he palopalemá ni, pea naʻá ma ongoʻi naʻe fie maʻu ke ma lea. Naʻá ma fakatokangaʻi ha kiʻi puha ʻi he fōmú ʻe lava ke ma fakaʻilongaʻi ʻo kapau ne ma loto-fiemālie ke tuʻu ʻi he ʻao ʻo e Fale Aleá ke taukaveʻi homa tuʻungá. Naʻá ma fesiofaki mo hoku husepānití peá ma pehē, “Ta fakaʻilongaʻi e kiʻi puhá!”
ʻI he hili ha ngaahi māhina mei ai, ne ma maʻu ha tala naʻe fili kimaua ke fai ha fakamatala ʻi ha kōmiti Fale Alea. Hili ha lotu mo e ʻaukai lahi, naʻe ongoʻi ʻe hoku husepānití ne tataki ia ke ne vahevahe ha ngaahi fakakaukau meia ʻEletā Tieta F. ʻUkitofa,1 pea ne u ongoʻi ha ueʻi mālohi ke u foki ki he taimi naʻe fakahaaʻi ai ʻe Palesiteni Kōtoni B. Hingikelī (1910–2008) ʻa e “Ko e Fāmilí: Ko ha Fanongonongo ki Māmani” ʻi he fakataha lahi ʻa e Fineʻofá ʻi he 1995.2 Naʻá ma fakatou ongoʻi ne tataki kimaua ke ma ʻiloʻi ʻa e meʻa ke lea ʻakí; naʻe ʻikai lava ke fakaʻikaiʻi ia. Naʻá ma ʻiloʻi foki ʻe faingataʻa ʻaupito ia. Naʻá ma fakakaukau ke tuku ʻa e meʻa kotoa pē ʻi he toʻukupu ʻo e ʻOtuá mo pehē, “Te ma fai ʻa e meʻa ʻokú ke finangalo ki aí; te ma lea ʻaki ʻa e meʻa ʻokú ke finangalo ke ma lea ʻakí,”3 neongo kapau ʻe ʻikai manakoa ia. Ne fakaʻau ke ma hohaʻa ange ki he meʻa ʻe lekooti ʻi he langí ʻi he meʻa ʻe lekooti ʻi he Fale Aleá.
ʻI he aʻu ki he ʻaho ko iá pea ʻi heʻenau ui mai homa hingoá, naʻa nau talamai ke ma fili pe te ma fakamatala māvahevahe pe fakataha. Naʻá ma fakakaukau ʻi he taimi pē ko iá, “He toki fakataipe ia! ʻIo kuo pau ke ma ʻalu fakataha ke taukaveʻi e tokāteline ʻo e fāmilí.”
Hili ʻema fakamatalá, naʻe kamata ke fehuʻia kimaua ʻe he kau mēmipa ʻo e Fale Aleá. Ne hangē naʻe ʻikai ke nau fiefia ʻi he meʻa naʻá ma lea ʻakí, pea naʻe ʻikai faingofua ʻa hono tali ʻenau ngaahi fehuʻí. Naʻe faifai pea ʻosi homa taimí, ka kimuʻa peá ma mavahé, naʻá ma tufa ki he mēmipa takitaha ʻo e Fale Aleá mo e kau faiongoongó ha tatau ʻo ʻema leá mo ha tatau ʻo e “Ko e Fāmilí: Ko ha Fanongonongo ki Māmani.”
Ko ha aʻusia faingataʻa ʻeni, ka naʻá ne liliu ʻema moʻuí. Naʻá ma ako ai ʻoku malava (pea ʻaonga) ke talanoa ki he niʻihi kehé fekauʻaki mo e tokāteline ʻa e ʻEikí ki he nofo-malí mo e fāmilí—pea ʻe lava pē ke fai ia ʻaki ʻa e loto-toʻa, mahinongofua, mo e angaʻofa. Kuo fakamālohia homa vā fetuʻutaki mo e Tamai Hēvaní, pea kuo tupulaki ʻema fakamoʻoni ki he tokāteline ʻo e fāmilí. ʻOkú ma fakamoʻoni ki he ngaahi tāpuaki mo e fiefia fakaofo kuó ma maʻu ʻi heʻema moʻuí ko ha ola ʻo e aʻusia ko ʻení.