Ko e Ngāue Mahuʻinga Tahá
ʻOku nofo ʻa e tokotaha naʻá ne faʻú ʻi ʻIutā, USA.
“ʻOku ou ʻiate kimoutolu ʻo hangē ko ia ʻoku tauhí” (Luke 22:27).
Naʻe saiʻia ʻa ʻAmelia ʻi he ʻaʻahi kia Kulenimaá. Naʻá ne saiʻia he vaʻinga ʻaki e fanga kiʻi monumanu meʻavaʻingá mo hono kafu ʻaki e fuʻu kafu lahi molū ʻa Kulenimaá. Ka naʻe ʻikai fai ha vaʻinga he ʻahó ni. Ko e ʻaho ní ia ko e tokoni.
ʻI heʻenau fononga ki he ʻapi ʻo Kulenimaá, naʻe talanoa e ngaahi taʻokete ʻo ʻAmeliá fekauʻaki mo e ngaahi ngāue naʻa nau fie fakahokó.
Naʻe fie tafi ʻa Sela. Naʻe fie mopi ʻa ʻEmelī. Pea na‘e kole ange ʻe Mami kia ʻAlisa ke ne olo e luvá.
“Fēfē au?” Ko e fehuʻi ange ia ʻa ʻAmeliá. “Te u tokoni nai ke tafi e efú?”
Naʻe pehē ʻe Mami, “ʻOku ʻi ai ha ngāue makehe maʻau. ʻOku ou fie maʻu ke ke fanongo.”
Naʻe tatali ʻa ʻAmelia. “Sai, ko ʻeni ʻoku ou fanongo atu. Ko e hā?”
“Ko e ngāué ia!” Ko e lea ange ia ʻa Mami mo ʻene katá. “Fanongo ʻataʻatā pē. Tangutu pē mo Kulenimā ʻo fanongo ki heʻene talanoá. Mahalo ko e ngāue mahuʻinga taha pē ia ʻoku tau fai he ʻahó kakato.”
ʻOku hoko fēfē ʻa e fanongó ko e ngāue mahuʻinga tahá? Naʻe fifili ʻa ʻAmelia. Ne hangē naʻe moʻoni ange e ngāue olo efú ia! Ka naʻe loto-fiemālie ʻa ʻAmelia ke feinga.
Naʻe fiefia ʻa Kulenimā ke sio kiate kinautolu. Naʻe kamata e ngaahi ngāue ʻa e tokotaha kotoa. Naʻe ʻalu ʻa ʻAmelia ʻo tangutu he seá ʻi he tafaʻaki ʻo Kulenimaá. Naʻe fakatokangaʻi ʻe ʻAmelia ha kiʻi lāpisi tamapua ʻi he tulikí. Naʻá ne pehē, “ʻOku ou saiʻia hoʻo kiʻi lāpisí.”
Naʻe malimali ʻa Kulenimā. “Naʻá ku talanoa atu koā kau ki hoku tuongaʻane ko Melí mo e kiʻi lāpisí valevale?”
Naʻe ʻohovale ʻa ʻAmelia. “Ko e kiʻi lāpisi moʻoni?”
Naʻe kamo ʻa Kulenimā. “Naʻá ne maʻu ha kiʻi lāpisi liʻaki. Naʻá ne mono ia ki hono loto soté ke malu.” Naʻe talanoa ʻe Kulenimā kia ʻAmelia fekauʻaki mo e kiʻi ʻā lāpisi naʻe langa ʻe Melí.
Naʻe fakamanatu ʻe he talanoa ko iá kia Kulenimā ha toe ngaahi talanoa kehe. Naʻá ne talanoa kau ki ha kiʻi pusiaki ʻuhikiʻi pulu naʻá ne ui ko Sitā. Naʻá ne faʻa heka ʻia Sitā! Naʻe makiʻikiʻi ʻa ʻAmelia ʻi heʻene sioloto ki he heka ʻa Kulenimā ʻi ha kiʻi ʻuhikiʻi pulú. Naʻe ʻikai faingofua ke ne fakakaukauloto kiate ia ko ha kiʻi taʻahine kei siʻi.
Naʻe talanoa taʻemālōlō ʻa Kulenimā. Naʻá ne toe fai e talanoa ki he lāpisí. ʻI ha taimi ʻe taha, lolotonga ʻene talanoá naʻá ne taʻofi pea toe kamata foʻou.
Naʻe feinga ʻa ʻAmelia ke kei fanongo pē, ka naʻe kamata ke ne helaʻia. Naʻe kei ngāue pē ʻa Mami mo e tamaiki fefiné.
Naʻe faingataʻa e tangutu ʻo fanongó! Ka naʻe malimali ʻa Kulenimā. Ne hangē naʻá ne fiefia hono vahevahe ange ʻene ngaahi talanoá.
Hili pē ha ngaahi miniti siʻi, naʻe hū mai ʻa Mami, “Kuo ʻosi! Taimi ke tau ō.”
Naʻe talaange ʻe Kulenimā kia ʻAmelia, “Naʻe fakaʻofoʻofa moʻoni ia. ʻOku ou saiʻia hoʻo ʻeva maí!”
Naʻe fāʻofua ʻa ʻAmelia ki heʻene kui-fefiné. Naʻá ne sio ki he loʻimata ʻi he fofonga ʻo Kulenimaá.
“Ko e hā e meʻa ʻoku hokó?” Ko e fehuʻi ange ia ʻa ʻAmeliá.
Naʻe pehē ʻe Kulenimā, “ʻIkai ha meʻa ʻe hoko. Fakamālō atu ʻi heʻeta talanoá. ʻOku ou ʻofa iate koe.”
Naʻe ongoʻi māfana ʻa ʻAmelia ʻi hono lotó. Naʻá ne talaange “ʻOku ou ʻofa atu mo au foki. Te u toe ʻeva mai he vave tahá.”
ʻI heʻenau fononga ki ʻapí, naʻe fehuʻi ange ʻe ʻAlisa, “ʻAmelia, naʻe fēfē e fanongó?”
“Naʻe faingataʻa ange he meʻa ne u fakakaukau ki aí. Ne u pehē ne feʻunga ʻeku fanongó ki muʻa pea toki ʻosi e talanoa ʻa Kulenimaá!”“ʻOkú ke fuʻu lelei ’aupito!” Ko Mama ange ia.“Mālō,” ko ʻAmelia ange ia. “Naʻe fakafiefia e ngaahi talanoa ʻe niʻihi naʻá ne faí. Naʻá ke ʻiloʻi nai naʻe ʻi ai ha kiʻi ʻuhikiʻi pulu pusiaki ʻa Kulenimā?”
“Hangē ha pulu pēpeé?” Ko e ʻeke ange ia ʻe Selá.
“ʻIo! Naʻe faʻa heka ʻa Kulenimā ai,” ko e tali ange ia ʻa ʻAmeliá mo e kamokamó. “Ko hono hingoá ko Sitā.”
Naʻe talanoa kotoa ange ʻe ʻAmelia ʻa e ngaahi talanoa kehe ʻa Kulenimaá. Naʻe fakalata moʻoni ke ako ha meʻa lahi fekauʻaki mo ia.
Naʻe malimali ʻa ʻEmelī. “Mahalo ko e haʻu hokó pē peá ta fetongi ngāue. ʻOku ou fie maʻu ha faingamālie ke u fanongo!” ●