Mālō e lelei mei Kuatemala!
Malō e Lelei, ko Mako mo Paolo kimaua.
ʻOkú ma fononga takai holo he māmaní ke ako fekauʻaki mo e fānau ʻa e ʻOtuá. Kau mai ke tau ʻaʻahi ki Kuatemala!
ʻOku tuʻu ʻa Kuatemala ʻi ‘Amelika Lotoloto. ʻOku fakafuofua ki ha kakai ʻe toko 17 miliona ʻoku nofo aí, pea fakafuofua ki ha kāingalotu ʻo e Siasí ʻe toko 300,000.
ʻOku ʻi ai ha moʻunga afi ʻe 30 ʻi Kuatemala. Ko e moʻunga afi ʻe tolu ai ʻoku moʻui! Naʻe puna e moʻunga afi ko ʻení ‘i he 2015.
ʻOku fononga e kakai tokolahi mei he feituʻu ki he feituʻu ʻi ha ʻū pasi lanu fakaʻofoʻofa.
Ko e quetzal fulufulu lanu maama fakaʻofoʻofá ko e manupuna fakafonua ia ʻo Kuatemalá. Ko e “quetzal” ko e hingoa foki ia ʻo e paʻangá ʻi Kuatemalá!
ʻOku ako folofola fakataha e fāmili ko ʻení ʻi Kuatemala. Ko hai ʻokú ke ako folofola mo iá?
ʻOku tokoni e kiʻi tamasiʻi ko ʻení ki hono fāmilí ʻaki ʻene fua e fefié.
Ko e takafi ʻeni ʻo e Tohi ʻa Molomoná ʻi he lea faka-Kesikuelé. Ko e lea faka-Kesikuelé ko e taha ia ʻo e ngaahi lea fakafonua ʻe 18 ʻoku fakaʻaongaʻi ʻi Kuatemalá! Ko e lea faka-Sipeiní ko e lea fakafonua totonu ia ʻa e fonuá.
ʻOku fakaʻaongaʻi ʻe he ngaahi fāmili ʻe niʻihi ʻi Kuatemala ʻa e pilas—ko e pēsoni lanu fakaʻofoʻofa ʻi tuʻa—ke fufulu e peletí mo fō ai e valá.
Feʻiloaki mo ha niʻihi ʻo hotau ngaahi kaungāmeʻa mei Kuatemalá!
ʻI he taimi naʻe ʻikai ngāue ai ʻeku faʻeé, naʻe tokoniʻi kimautolu ʻe he kāingalotu ʻo e Siasí ʻi he meʻatokoní. Naʻe akoʻi au heni ʻi he founga ke vahevahe mo e niʻihi ʻoku ʻikai lahi ʻenau meʻa ʻoku maʻú.
Tāuni M., taʻu 9, Sololá, Kuatemala
Naʻa mau ako naʻe malanga ʻaki ʻe he ʻAposetolo ko Paulá ʻa e ongoongoleleí ki he kakai kotoa pē. Naʻá ku ongoʻi naʻe totonu ke u vahevahe ʻa e Tohi ʻa Molomoná mo hoku ngaahi kaungāmeʻá. Naʻá ku hiki ʻeku fakamoʻoní ʻi he tohi takitaha pea ʻoange ia kiate kinautolu. Naʻá ku fiefia ʻi heʻeku ʻiloʻi ʻoku nau lau iá.
Simana L., taʻu 9, Sakatepekisi, Kuatemala
ʻOkú ke haʻu nai mei Kuatemala? Tohi mai kiate kimaua! ʻOkú ma fie fanongo meiate kimoutolu.
Fakamālō atu ʻi hoʻomou fie mamataʻi ʻa Kuatemala mo kimauá. Tau toki sio!