Ko Ha Kakato ʻo e Fiefiá
ʻOku faingataʻa ke fakamatalaʻi ʻa e fiefia fakaofo naʻá ne fakafonu hoku lotó ʻi heʻeku mavahe mei he kilīnikí ʻi he ʻaho ko iá.
Lolotonga ʻeku tangutu ʻi he loki talitali ʻo ha kilīniki fakafaitoʻo, ne u fakatokangaʻi ha faʻē mo haʻane ʻofefine. Naʻe tui ʻe he kiʻi taʻahiné ha meʻa-maluʻi ki he ihú mo e ngutú pea naʻá ne toutou tale. Naʻe takaʻuli hono ongo foʻi matá pea naʻe tea hono fofongá. Naʻá ku fakaʻofaʻia ʻaupito ʻiate ia. Ne mataʻi ongoongosia ʻaupito ʻa ʻene faʻeé.
Naʻe siʻisiʻi ʻa e kiʻi loki talitalí, ko ia ne u fanongo ki he meʻa kotoa pē naʻá ne lea ʻakí. Hili ʻene totongi e konga naʻe fie maʻu ke ne totongí, naʻe fakamanatu ange ʻe he tokotaha talitali kakaí ha toenga moʻua kimuʻa ʻa ia ne liunga ua hono mahuʻingá ʻi he mahuʻinga ʻo e ʻaʻahi lolotongá.
Naʻe fakamatala ʻa e fefiné mo e faingataʻaʻia ke mapuleʻi ʻa e ngaahi ongo naʻá ne maʻú, he ʻikai ke ne toe maʻu ha paʻanga kae ʻoua kuo aʻu ki he māhina ka hoko maí. Naʻá ne pehē ʻoku ʻikai haʻane paʻanga feʻunga ke totongi ʻaki ʻene totongi falé. Naʻe talaange ʻe he tokotaha talitali kakaí ʻoku totonu ke ne feinga ke totongi ʻosi ʻene moʻuá ʻi he vave tahá. Naʻe taki atu leva ʻa e fefiné mo ʻene tamá ki mui ki heʻena ʻapoinimení.
Lolotonga ʻeku tangutú, naʻe ʻikai toʻo ʻeku fakakaukaú mei he fefiné mo hono tūkungá. ʻOku ʻikai ke u koloaʻia, ka ʻi heʻeku fakakaukau ki he lelei lahi ʻa e ʻEikí kiate au mo hoku fāmilí, ne u ongoʻi loto-māfana ke tokoniʻi ʻa e fefine ko ʻení mo ʻene tamá.
Ne u ʻalu atu ki he tokotaha talitali kakaí, mo fakakaukau pe ʻe lava nai ʻo fai ʻa e meʻa ne u fakakaukau ki aí. Naʻá ku fakamatala ange ne u fanongo atu ki he faingataʻa ʻoku tofanga ai ʻa e fefiné pea ne u loto ke totongi ʻene toenga moʻuá. Naʻe ʻohovale ʻa e tokotaha talitali kakaí ka naʻá ne fiefia ke tali ʻeku kolé.
Naʻá ku kole ange ke talaange ki he fefiné kuo totongi ʻosi ʻa e toenga moʻuá pea ʻoua naʻá ne toe hohaʻa ki ai. Naʻá ku talaange foki ki he tokotaha talitali kakaí ke ʻoua naʻá ne tala ʻa e tokotaha naʻá ne totongi iá. Ne u totongi leva ʻa e toenga moʻuá pea hoko atu ki heʻeku ʻapoinimení. Naʻe ʻikai ke u toe sio ki he fefiné mo hono ʻofefiné, ka naʻá ku lotu ʻe vave ha tupulaki ʻa hona tūkungá.
ʻOku faingataʻa ke fakamatalaʻi ʻa e fakaofo ʻo e fiefia naʻá ne fakafonu hoku lotó ʻi heʻeku mavahe mei he kilīnikí ʻi he ʻaho ko iá. Ta neʻineʻi ke folofola ʻa e Fakamoʻuí fekauʻaki mo hono maʻu e kakato ʻo e fiefiá (vakai, Tokāteline mo e Ngaahi Fuakava 11:13). Naʻá ku ʻiloʻi lahi ange ʻi ha toe taimi kimuʻa ne u fakaʻamu ke u hoko ʻo tatau ange mo hoku Fakamoʻuí pea mo aʻusia lahi ange ʻa e fiefia ʻoku maʻu mei he tauhi kiate Iá.