Ko e Mālohi ke Laka Atu Ki Muʻa

ʻĪmisi

Karina Guerra and children

ʻI he mālōlō ʻema fuofua tama mo hoku husepānití, naʻe fakahā mai ʻe he kau toketaá he ʻikai ke toe ʻi ai haʻaku fānau. Naʻá ku fuʻu loto-mamahi ʻaupito. Naʻá ku loto-mamahi pea fekumi ki ha ngaahi tali. Naʻe loto-mamahi foki mo hoku husepānití. Ne ma lotu pea ʻiloʻi ʻa e mahuʻinga ko ia ke hoko ko ha fāmili taʻengatá. Ne faifai pē pea silaʻi kimaua ʻi he Temipale Los Angeles California.

Naʻá ku faifeinga ke mahino ʻa e ʻuhinga naʻe hoko ai ʻa e mole ko ʻení pea mo ʻeku manatuʻi hoku tāpuaki fakapēteliaké. Naʻá ku kamata lau hoku tāpuakí ʻo ʻilo ha konga ne matuʻaki ngalo ʻiate au. Naʻe pehē ai ʻe tāpuakiʻi au ʻaki ha fānau tangata mo fafine. Naʻá ku fakakaukau, ne ʻi ai e meʻa ne fehalaaki ʻi he meʻa ne talamai ʻe he kau toketaá kiate aú. Naʻá ku ʻalu ki he toketaá pea naʻe toe talamai pē he ʻikai malava ke u fanau.

Hili ha taʻu ʻe nima mei he mālōlō ʻema ʻuluaki pēpeé, naʻá ma fili ai ke ʻahiʻahi ʻa e founga fakatupu fānau fakasaienisi ʻi ha tesi tiupí (IVF). ʻI he fuofua ʻapoinimení, naʻe fakahaaʻi ai ʻe ha sivi ʻoku ou feitama. Ne ʻikai ke u faʻa tui ki ai. Naʻa nau fakahoko mo ha toe ngaahi sivi pea fakapapauʻi naʻá ku ʻosi feitama. Hili ha māhina ʻe hiva, naʻá ma talitali lelei ai homa ʻofefiné ki homa fāmilí. ʻOku ou hoko ʻeni ko ha faʻē ki ha fānau fakaofo ʻe toko fā.

Naʻe toe hoko mo ha pole ʻe taha ʻi he ngaahi taʻu siʻi kuo maliu atú ʻi heʻeku vete mali mo hoku husepānití. Naʻe fakaʻohovale ʻeni kiate au. Naʻe ʻikai ke u ʻilo pe ko e hā e meʻa te u faí. Naʻá ku pehē naʻá ku maʻu ha fāmili haohaoa. Naʻá ku lolotonga ako foki ʻi he ʻapiako toketā nifó ʻi he taimi ko iá. Naʻá ku tukuange ʻa e akó ke u tokanga taha ki heʻeku fānaú. Naʻá ku ongoʻi ko e fili lelei tahá ʻeni. ʻOku ʻikai ke u teitei fakatomala ai. Ka naʻá ku fuʻu ʻita lahi. ʻOku anga fēfē ha mavahe ʻa ha taha mei ha nofomali mo e fānau fakaʻofoʻofa ʻe toko fā?

Naʻá ku ilifia foki pe ko e hā e meʻa ʻe hoko kiate au mo ʻeku fānaú. Naʻá ku tangi pea ongoʻi manavahē, fakakaukau kapau ʻoku nau kei sila mai pe kiate au. Naʻá ku talanoa mo ʻeku pīsopé, peá ne pehē kuo talaʻofa mai ʻa e Tamai Hēvaní ʻoku silaʻi kitautolu ki he kotoa ʻo ʻitānití, ka ʻe makatuʻunga mei heʻetau tauʻatāina ke filí pe te tau nofo fakataha ʻo taʻengata. Naʻá ku fiemālie ke ʻilo ʻoku kei sila mai pe ʻeku fānaú kiate au.

Ka naʻá ku kei ongoʻi ʻita pea ongoʻi ʻoku ʻikai te u taau ke ʻalu ki he temipalé. Te ke lava fēfē ʻo ʻalu ki he temipalé mo e ʻita lahi pehē? Naʻe ʻikai foki te u fie ʻalu ki he temipalé koeʻuhí ko ʻeku mali veté. Naʻá ku ongoʻi naʻe ʻikai ke u taau ki ai koeʻuhí naʻe totonu ke u kei ʻi ha nofomali.

Naʻá ku toe talanoa mo ʻeku pīsopé, peá ne talamai ʻoku ʻikai fie maʻu ʻe Sētane ke u foki ki he temipalé. ʻOkú ne fie maʻu ke u loto-mamahi pea ongoʻi ʻoku ʻikai ke u taau. Naʻe fakaofo ʻa ʻeku toe hū ko ia ki he temipalé. ʻOku ou ongoʻi lelei mo mālohi ange ʻi heʻeku ʻalu ki he temipalé. ʻOku ou maʻu ʻa e mālohi lahi ʻi hono ʻiloʻi ʻoku tokoniʻi au ʻe heʻeku Tamai Hēvaní ke u hoko ko ha faʻē, pea ʻoku ʻikai ke u tuenoa, pea he ʻikai ʻaupito te Ne liʻaki au pe ko hoku fāmilí. ʻOku ou fakapapauʻi maʻu pē ʻi he taimí ni ʻoku ʻi ai maʻu pē haʻaku lekomeni ʻoku ʻaonga.

“ʻOku ou ʻilo ʻoku fie maʻu ke u laka atu ki muʻa maʻu pē pea ofi ange ki he Tamai Hēvaní ʻi he ʻaho takitaha. Ko e founga ʻeni te u lava ai ʻo nofo taʻengata mo ʻeku fānaú.”

Neongo ʻoku ʻikai kau ʻa ʻenau tamaí ʻi heʻenau moʻuí, ka ʻoku ou talaange maʻu pē ki heʻeku fānau ʻoku ou ʻi ai maʻu pē maʻanautolu. ʻOku mau ʻalu ki he lotú, ʻoku mau ako e folofolá pea ʻoku mau lotu. ʻOku mahino kiate kimautolu ʻa e mahuʻinga ʻo e fāmilí pea ʻoku fie maʻu ke mau fefakamolemoleʻaki, fepoupouaki, pea fiefia ʻi heʻemau ngaahi lavameʻá.

Kuo ʻeke mai ʻe he kakaí pe ko e hā ha meʻa te u fai kapau naʻe toe ʻi ai ha houa ʻatā he ʻaho takitaha. Te u mohe nai? Te u kai nai? Ko e hā ha meʻa te u fai? Te u fakaʻaongaʻi ha miniti ʻe 15 ke feohi fakataautaha ai mo ʻeku fānaú takitaha.

ʻOku ou ʻofa lahi ʻaupito ʻi heʻeku fānaú ʻa ia ʻoku ʻikai feʻunga ʻa e lahi ʻo e langaʻulu mei homa vā mo ʻenau tamaí, naʻe feʻunga ia ke maʻu kinautolu. Ko e lahi ia honau mahuʻinga kiate aú.

ʻOku hoko ʻemau fakapapauʻi ʻoku mālohi ʻemau tuí ko e meʻa ʻokú ne ʻai ke mau kei hoko ko ha fāmilí. Kapau te tau fakahoko ʻetau tafaʻakí, ʻe fakahoko ʻe he ʻEikí ʻEne ngaahi tāpuakí mo e talaʻofá. Ko e meʻa ia ʻoku ou moʻui ʻaki, pea ʻoku faitāpuekina ai au.