Maʻu ʻa e Mālohi mo e Loto-toʻa ke Puna
ʻI heʻetau hoko ko e fānau ʻa e ʻOtuá, ʻoku ʻomi ʻe hotau natula faka-ʻotuá ʻa e ivi malava ko ia ke tau puna fakalaumālié.
ʻI ha kiʻi taimi nounou he kuohilí, naʻe faʻu ai ʻe ha ongo foʻi lupe ha pununga ʻi ha fuʻu ʻakau ʻi heʻeku ngoué. Naʻá ku mamata ki heʻena tānaki ʻa e fanga kiʻi vaʻakau iiki ke faʻu ʻaki ʻa hona ʻapí.
Hili ha ngaahi ʻaho siʻi, naʻá ku mamata ki ha ʻū ngeʻesi fuaʻimanupuna ʻi he musié. Kuo fofoa ha ongo kiʻi ʻuhiki fakaʻofoʻofa ʻe toko ua. Naʻe vave ʻena tupú pea ʻikai fuoloa kuó na mei lalahi tatau pē mo ʻena faʻeé.
ʻI ha pongipongi ʻe taha, ne u siofi e taha ʻo e ongo ʻuhikí, ʻokú ne tuʻu ʻi he tapa ʻo e punungá ʻo toutou feinga ke puna. Ne faifai pē pea lava ʻa e kiʻi foʻi lupé ʻo puna ki he ʻato homau falé. ʻI ha ngaahi ʻaho siʻi mei ai, naʻe puna fakataha ʻa e kiʻi lupe loto-toʻa ko ʻení mo ʻene faʻeé.
Lolotonga ʻení, ne sio pē ʻa e kiʻi ʻuhiki ʻe tahá mei he punungá. Mahalo naʻá ne fakakaukau ʻe ʻi ai ha ʻaho ʻe kau fakataha ai mo kinaua. Ka naʻá ku veiveiua. Naʻe hangē ne ʻikai maʻu ʻe he kiʻi foʻi lupe ko ʻení ha loto-holi ke puná.
Ka naʻá ku ʻohovale, ʻi he hili pē ha ngaahi ʻaho siʻi mei ai, ne u maʻu e kiʻi ʻuhikí ʻoku luelue ʻi he musié ʻi lalo ʻi he punungá. Ko hono moʻoní, naʻá ne feinga ke puna. Hili ha ngaahi ʻaho mei ai, naʻe tā tuʻo lahi e feinga ʻa e kiʻi ʻuhiki feifeiavalé ke puná. Ne faifai pē pea ola lelei, naʻá ne puna ʻo foki ki he punungá peá ne toki puna mei ai ki he ʻataá.
ʻI heʻetau hoko ko e fānau ʻa e ʻOtuá, ʻoku ʻomi ʻe hotau natula faka-ʻotuá ʻa e ivi malava ko ia ke tau puna fakalaumālié. Ka neongo ia, mahalo te tau fehalaaki ʻi hono fua ʻetau fakalakalaká ʻo hangē ko ia ne u tomuʻa fua ʻaki ʻa e fakalakalaka ʻa e kiʻi ʻuhikiʻi lupe ne momoú mo e fakalakalaka ʻa hono tokouá. ʻI heʻetau fakahoa ʻetau tupulaki fakalaumālié ki he niʻihi kehe ʻoku tau pehē ʻoku loto-toʻa angé, ʻe lava ke tau fakakaukau ʻoku ʻikai ke tau fakalakalaka.
ʻOku fie maʻu foki ʻe he filí ke tau fakakaukau he ʻikai ke tau fakalakalaka fakalaumālie. ʻOkú ne fie maʻu ke tau tui ko e meʻa fakatuʻasinó pē ʻoku mahuʻingá, ko ia ʻokú ne ʻahiʻahiʻi kitautolu ʻaki ʻa e ngaahi fakahohaʻa hangē ko e ākenga ʻo e valá mo e teuteú mo e ngaahi meʻa taʻeʻaonga ʻo e māmaní.
Lolotonga ʻetau nofo fakataimi ʻi he māmaní, ʻoku tau foua ha ngaahi faingataʻa, ʻahiʻahi mo e ngaahi tōnounou lahi. Ka kuo folofola mai ʻa e Tamai Hēvaní, “Ke ke mālohi koe peá ke loto toʻa; ʻoua naʻá ke manavahē, pea ʻoua naʻá ke puputuʻu: he ko [e ʻEiki] ko ho ʻOtuá ʻoku ʻiate koe ia ʻi he potu kotoa pē ʻokú ke ʻalu ki ai” (Sosiua 1:9). ʻI he taimi ʻoku tau tōnounou aí, ʻoku ʻamanaki mai ʻe he ʻEikí ke tau feinga pē, ke tau manatuʻi ʻa hotau ivi malavá, pea, hangē ko e kiʻi ʻuhikiʻi manupuná, ke tau tokanga taha ki he langí.