Haʻu, ʻo Muimui ʻIate Au
Ko e hā hono mahuʻinga ʻo e ongoongolelei ʻo Sīsū Kalaisí kiate koé?
Tokāteline mo e Ngaahi Fuakava 18–19
22–28 Fepueli
Naʻe maʻu ʻe Māteni ʻa e taha ʻo e ngaahi faama lelei taha ʻi Palemaila, Niu ʻIoké. ʻI he hokosia e taimi ke pulusi ai ʻa e Tohi ʻa Molomoná, naʻe fakakaukau ʻa Māteni ke tuku nō ʻene fāmá ke totongi ʻaki ʻa e mīsini pākí. Ka naʻe ʻi ai ha palopalema lahi ai.
Ko Ha Momeniti ke Fili
Kapau ʻe tokoni ʻa Māteni ki hono pulusi ʻo e Tohi ʻa Molomoná pea ʻikai ola lelei ʻa hono fakatau atú, ʻe mole ʻa ʻene fāmá. Naʻe pau ke fai ʻe Māteni ha fili faingataʻa.
Ko e hā ha me’a ʻokú ne tokoniʻi koe ke fai ʻa e ngaahi fili mahuʻingá? ʻOku uesia nai ho ngaahi filí ʻi hono ʻiloʻi e mahuʻinga ʻo e ongoongolelei ʻo Sīsū Kalaisí kiate koé?
Ko Ha Loto-Fiemālie ke Feilaulau
Naʻe maʻu ʻe Siosefa Sāmita ha fakahā ke tala kia Māteni ke ʻoua naʻa manumanu ki hono kelekelé kae foaki tauʻatāina ia ki hono paaki ʻo e Tohi ʻa Molomoná (vakai, Tokāteline mo e Ngaahi Fuakava 19:26).
ʻE hoko ʻeni ko ha feilaulau, ka naʻe fakamanatu ʻe he ʻEikí kia Māteni kuo teʻeki ha taha ʻe feilaulau lahi ange maʻá e fānau ʻa e ʻOtuá ʻiate Ia (vakai, Tokāteline mo e Ngaahi Fuakava 19:18).
Ko e hā ʻoku hoko ai ʻa e feilaulaú ko ha konga ʻo e ongoongolelei ʻo Sīsū Kalaisi?
Ko Ha Ngāue Fakaʻeiʻeiki
Naʻe tuku nō ʻe Māteni ʻa ʻene fāmá ʻo lava ai hono paaki ʻa e fuofua tatau ʻe 5,000 ʻo e Tohi ʻa Molomoná. Kuo lea ʻa Palesiteni Tāleni H. ʻOakesi, Tokoni ʻUluakí ʻi he Kau Palesitenisī ʻUluakí ʻo pehē, “Ko e taha e ngaahi tokoni lahi taha ʻa Māteni Hālisi ki he Siasí, ʻa ia ʻoku totonu ke manatua ai ia ʻi he taimi kotoa pē, ko ʻene fakapaʻanga ʻa hono pulusi ʻo e Tohi ʻa Molomoná” (“The Witness: Martin Harris,” Ensign, May 1999, 36).
The Martin Harris Farm (Faama ʻa Māteni Hālisí), tā fakatātā ʻa Al Roundy
Ngaahi ʻUluaki Fuá, tā fakatātā ʻa Jeffrey Hein