Fēfē Kapau Naʻe ʻIkai Ke U ʻAlu?
Naʻe nofo ʻa e aʻusia ko iá ʻi hoku ʻatamaí mo e lotó ʻa e ʻuhinga ne fie maʻu ke u ʻi ai ʻi he efiafi ko iá.
Naʻá ku mei fakakaukau ke ʻoua naʻá ku ʻalu he efiafi ko iá. Naʻá ku ʻilo ʻe ala tokoni ha efiafi ʻo e manatú ke u matatali ʻa e mole ʻa ʻeku faʻeé, ka naʻá ku ʻilo foki te u tangi ʻi he efiafi ko iá ʻi he hokohoko atu ʻa ʻeku mamahí mo tengihia siʻene mālōloó.
ʻI he fakaʻau ke hokosia e taimi ke fai ai ʻa e efiafi ʻo e manatú, ne u teuteu ke ʻalu neongo ʻeku taʻe fie ʻalu he kamatá. Ne u fakakaukau ʻe kau lelei kiate au ke u ʻi ai.
Ko e efiafi ʻo e manatú, ʻa ia ʻoku fakaʻapaʻapaʻi ai e niʻihi ne nau toki mālōloó, ne fakahoko ia ʻe he falemate ne nau tokangaʻi ʻa e meʻafakaʻeiki ʻo ʻeku faʻeé. Makehe mei he talēkita ʻo e falematé pea mo hono fāmilí, naʻe ʻikai ke u ʻilo ha taha ʻi he lokí. Lolotonga ʻa e efiafi ko iá, naʻe lau mai ʻa e hingoa ʻo e pekia takitaha, pea naʻe tutu leva ʻe ha fakafofonga ʻo e fāmilí ka kiʻi foʻi teʻelango ko hono fakamanatua ʻo e tokotaha ko iá.
Hili ʻa e polokalamá, ne u tuʻu hake ke u ʻalu atu ʻo maʻu e fakamokomokó. Naʻe mātuku kotoa ʻa kinautolu ne nau tangutu ʻi hoku tuʻá tuku kehe pē ha fefine toulekeleka ne fakamānava mīsini ne kei tangutu pē he tafaʻaki ʻo ʻene meʻa-luelué. Naʻá ku ongoʻi ʻene loto-mamahí mo e faingataʻaʻiá. Naʻá ku ongoʻi foki ne fie maʻu ke u fāʻofua kiate ia.
Naʻe ʻikai ke u ʻilo pe ko e hā haʻane ongo ki ha fāʻofua ange ki ai ha taha ne ʻikai ke ne ʻiloʻi, ka naʻá ku muimui ki he ueʻi fakalaumālie faingofua ko ʻení. Naʻá ku ʻalu atu kiate ia mo mafao atu ʻa hoku ongo nimá. Naʻe ala mai hono ongo nimá ʻo puke hifo au kiate ia. Naʻá ne ʻuma mai ki hoku kouʻahé mo pehē mai, “Fakamālō atu ʻi hoʻo ʻiloʻi ʻoku ou fie maʻu ha fāʻofuá. Ko ha ʻāngelo koe.” Naʻá ma talanoa ai ʻi ha kiʻi taimi siʻi.
Naʻe nofo ʻa e aʻusia ko ʻení ʻi hoku ʻatamaí mo e lotó ʻa e ʻuhinga ne fie maʻu ke u ʻi aí. Naʻe mei ʻi ai nai ha taha ke fāʻofua ki he fefiné ni he efiafi ko iá kapau naʻe ʻikai ke u ʻalu? He ʻikai ke u teitei ʻilo, ka ʻoku ou ʻilo naʻe ueʻi au ke u fāʻofua kiate ia, pea koeʻuhi ko ʻeku fakahoko iá, naʻe mohu tāpuekina ai kimaua fakatouʻosi.