Fakaʻilekitulōnika Pē: Kakai Lalahi Kei Talavoú
Fakaangaanga ki he Liliu hili ʻEku Ngāue Fakafaifekaú
Mahalo ʻe ʻikai haohaoa e moʻui ʻi he hili e ngāue fakafaifekaú, ka te tau kei lava pē ʻo maʻu e nekeneká mo e taumuʻá ʻi heʻetau hokohoko atu ko e kau ākonga ʻa Sīsū Kalaisi.
Ne u sai‘ia ʻaupito ʻi heʻeku ngāue fakafaifekau ki Kolomupiá. Kuo hoko ia ko e konga lelei taha ‘o ʻeku mo‘uí he taimí ni. Naʻá ku ʻofa he kakai naʻa mau fetaulakí mo kinautolu naʻá ku akoʻí. Naʻá ku ʻofa foki hoku ngaahi hoá, pea naʻá ku ako lahi meiate kinautolu! ʻOku ou fakakaukau ki heʻeku ngāue fakafaifekaú he ʻaho kotoa.
‘I he lava hoku teuteuʻi ʻi he senitā akoʻanga fakafaifekaú, naʻá ku fakakaukau ne u mateuteu ki heʻeku ngāue fakafaifekaú, ka naʻe toe lahi ʻaupito e meʻa ke u ako ʻi he malaʻe ʻo e ngāue fakafaifekaú. Pea naʻe hoko ʻa e meʻa tatau ʻi he hili ʻeku ngāue fakafaifekaú—naʻá ku fakakaukau kuó u ako e meʻa kotoa naʻá ku fie maʻu fekauʻaki pea mo e moʻuí. Naʻá ku fakakaukau ne u mateuteu ki he meʻa kotoa pē ʻe hoko mai ki heʻeku moʻuí hili e ngāue fakafaifekaú. Naʻá ku fakakaukau ʻe hoko haohaoa e meʻa kotoa.
Kae hangē kuo mou mateʻí, kuo teʻeki ai.
‘I heʻeku kei ngāue fakafaifekaú, na‘e tafa e tokoua ʻo ʻeku faʻeé ko Sesilia, pea puke, ʻo siʻi mālōlō. Naʻe loto pē ʻeku ongo mātuʻá, hili haʻana lotu ki ai, ke tatali pē hono fakahā mai kiate au ʻa ʻene mālōloó kae ʻoleva ke u foki mai ki ʻapi. Naʻe ongo mamafa kiate au ʻa ʻeku ʻiloʻi kuó ne mālōloó. Kuó ne hoko maʻu pē ko e tokoua ʻeku faʻeé ne u saiʻia taha aí, pea naʻá ku loto-māmahi ʻi he ʻikai ke u ʻi ʻapi ke fakahoko ha lea fakamāvaé.
Ka naʻe ʻikai ko e me‘a pē ia ne liliu lolotonga ʻeku mavahé. Na‘á ku ʻamanaki ‘e ʻalu hoku tuongaʻane siʻisiʻí ‘o ngāue fakafaifekau lolotonga ʻeku ngāue [fakafaifekau] ʻaʻakú, ka naʻe liliu ‘ene fakakaukaú. Na‘e faingataʻa ʻeni ki he‘eku ongomātuʻá, pea naʻe toe faingataʻa foki kiate au.
Pea naʻe ʻikai ke tatau e ngaahi meʻa mo hoku ngaahi kaungāmeʻá ʻo hangē ko ia kimuʻa ʻi heʻeku ngāue fakafaifekaú. Naʻá ku fakaafeʻi maʻu pē hoku ngaahi kaungāmeʻa ʻikai siasí ki he lotú, ka ʻi heʻeku foki ki ʻapí pea kamata ke toe fakaafeʻi kinautolú, ne nau fakafeangai ʻi ha founga kehe ʻaupito. Na‘e ʻikai ke nau fie ma‘u ke kau ʻi ha faʻahinga me‘a fekauʻaki mo e Siasí. Na‘e ʻikai ke u fakapapau‘i pe ko e hā e meʻa kuo liliú, ka naʻá ku kei lotua kinautolu pea vahevahe ‘a e ngaahi pōpoaki fakalaumālié mo kinautolu. Ka naʻá ku ongo‘i tuenoa moʻoni ʻo hangē naʻe ʻikai ke ʻi ai haʻaku ngaahi kaungāmeʻá.
Ne lahi ʻaupito e ngaahi meʻa naʻe liliu lolotonga ʻeku mavahé, pea naʻe faingataʻa ʻa ʻeku fakaangaanga ki he ngaahi liliu ko iá ʻi heʻeku foki ki ʻapí.
Ko e Mahuʻinga ʻo e Ngāue Tokoní
Lolotonga ‘eku ngāue fakafaifekaú, ʻi he taimi kotoa pē naʻá ku ongoʻi loto-fo‘i pe fakakaukau ai naʻe ʻikai ke u kei lava ke hoko atú, naʻá ku lotua ha tokoni. Ko ia naʻá ku ʻilo ʻe lava ke u falala ki he Tamai Hēvaní ke tokoni mai kiate au ke fakaangaanga ki he liliu foʻou ko ʻeni ʻo e moʻuí.
Ne haʻu kiate au e fakakaukau ʻoku fie maʻu ke u ngāue tokoní. Ne faʻa poupou maʻu pē ʻa e ngāue tokoní ke u ongoʻi ʻoku ʻi ai haʻaku taumuʻa. Na‘á ku ʻalu ke sio ki he‘eku pīsopé mo fakahā ange ʻa ‘eku fakaʻamu ke ngāue tokoní. Na‘á ne ui au ke u hoko ko e sekelitali ki he Kau Finemuí.
Hili ha ngaahi māhina si‘i mei ai, naʻá ku fakahā ange ki he Tamai Hēvaní na‘á ku fie maʻu ke fakalakalaka mo ako ha me‘a lahi ange ʻi he‘eku moʻuí, pea na‘á ku kole ʻEne tokoní. ‘I he ʻaho pē hono hokó, na‘e ui au ko e tokoni ua ʻi he kau palesitenisī ‘o e Palaimeli he siteikí.
Naʻe fuʻu tokoni ʻaupito kiate au ʻa e lava ke u tokoni ki he kau finemuí mo e fānau ʻi he Palaimelí ke u anga ki he moʻui ʻi he hili ʻeku ngāue fakafaifekaú. Na‘á ku lava ke nofo taha ‘i hono tokoniʻi kinautolu ke nau tafoki ki he Fakamoʻuí kae ʻikai nofo taha ʻi hoku ngaahi faingataʻaʻiá. Ne faifai pē, naʻe hanga ʻe heʻeku feinga ke ngāué ʻo fakafaingofuaʻi ange ʻeku liliú.
Ko e Meʻa ʻOku Ou Tui mo Poupou Ki Aí
Ko e meʻa ʻe taha naʻe tokoni kiate au ʻi heʻeku feinga ke anga ki he moʻui hili ʻa e ngāue fakafaifekaú ko e vahevahe ʻeku fakamoʻoní ʻi he faingamālie kotoa pē naʻá ku maʻú. Taimi ‘e niʻihi naʻá ku maʻu foki ha faingamālie ke vahevahe ʻeku ngaahi tuí lolotonga hono fakahoko e ngaahi fakamatala ʻi heʻeku ngaahi kalasi he ʻunivēsití.
Hili hono vahe mai ʻe heʻeku palōfesa filōsefiá ke u fai ha fakamatala ki he fakamaau totonú mo e tau‘atāiná, naʻá ku huluʻi e foʻi vitiō ʻa e Siasí naʻe ui ko e “Be Still, My Soul.” ʻOku fekauʻaki ʻa e vitioó mo ha fefine naʻe fakaʻilo ko e ngāue hala ʻaki e faitoʻo konatapú. Naʻá ne manatu ʻofa ki heʻene fānaú lolotonga ʻene ʻi he fale fakapopulá. Hili ‘e ne fou he [polokalama] fakaakeaké, naʻá ne foki ki ʻapi ko ha taha foʻou.
Naʻá ku fakaʻosi ʻeku fakamatalá ʻaki ʻeku fakamoʻoní. Na‘á ku talaange ʻoku tau maʻu kotoa ʻa e tauʻatāina ke fili mei he ʻOtuá, ka kuó Ne ʻomai kiate kitautolu ha ngaahi fekau ke tokoni ke mahino e founga ke ʻoua naʻa tau fakalaveaʻi ai kitautolu pe niʻihi kehé. Naʻá ku fakamoʻoni foki ʻokú Ne moʻui.
Ne ʻikai fakafepakiʻi ʻe heʻeku palōfesá mo hoku kaungākalasí ha faʻahinga meʻa ne u lea ʻaki. Pea naʻe tuku ʻe heʻeku fakamoʻoní ʻiate kinautolu ha ongo ʻo e fakakaukau lotó. Kuó u ako ʻoku ʻikai ke ke teitei ʻilo e taimi ʻe fie maʻu ai ʻe ha taha hoʻo fakakaukaú ke lava ai ʻo tui ko e ʻOtuá mo Sīsū Kalaisi ʻoku Na moʻui.
‘I hono fakakātoá, ko e hokohoko atu ke ofi ange kia Kalaisí pea mo tokoni‘i ha niʻihi kehe ke ha‘u kiate Iá naʻe tokoni ia kiate au ke anga ki he moʻui hili ʻeku ngāue fakafaifekaú. ‘Oku ʻikai ke u kei hoko ko ha faifekau taimi kakato, ka ʻoku ou kei lava pē ʻo lotu, tokoni, mo fakamo‘oni ki he moʻoni ʻo e ongoongolelei ʻo Sīsū Kalaisí. ʻOku ou kei lava pē ke tokoni ki he niʻihi kehé pea mo fakahoko e ngaahi meʻa naʻá ku fakahoko ʻi he ngāue fakafaifekaú—ka ʻi he founga kehe.
ʻOku lava pē ke faingataʻa ʻa e fakaangaanga ki he moʻui ʻi he hili ʻa e ngāue fakafaifekaú, ka ʻoku tau lava ‘o kei maʻu e fiefiá mo e taumu‘á ʻi he‘etau manatuʻi ‘a e meʻa naʻa tau ako ʻi heʻetau hoko ko e kau faifekaú pea mo e hokohoko atu ʻetau hoko ko e kau ākonga ‘a Sīsū Kalaisí. ‘E tokoni mai ʻa e Tamai Hēvaní ke tau lavame‘a ʻi he‘etau feinga ke muimui kiate Ia.