E Dua na Madigi Tabu ena Kena Gauna

Ena vica na yabaki sa oti, niu se bisopi kina, au vakadinadinataka na nodra kilai ira kei na nodra inaki vaKaloue dua na ilawalawa ni itabagone. Era vulica ni “Lotu savasava ka sega ni cala e mata ni Kalou ko Tamada sa vakaoqo, Me sa dauraici ira na luveniyali kei ira na yada nira sa rarawa.”¹

Ena nodra veisiko ni veiqaravi, o ira na itabagone oqo era sa veimaliwai vinaka sara vata kei Sister Orpha Cutler. E dua na marama vinaka e sa qase ka tautauvimate ka tiko duadua ga ena dua na valeqiqi lailai. E vuqa na ka e vakaleqai tu kina ka madigi totoka oqo vei ira na cauravou mera cokonaki ira mera veiqaravi vua. E vica na itaviqaravi me vaka na qusi iloilo ni nona katubaleka, samaka nona valeqiqi, kei na dadabe ena nona rumu ena gauna ni veisiko. Toso na gauna, era sa mai veimaliwai sara vakavoleka o ira na cauravou oqo vata kei Sister Cutler. Sa mai rawata o koya na yalodra.

Dua na siga, e ciqoma edua na itukutuku bibi. Ni tauvi kenisa ka soliga vua edua na gauna lekaleka ena bula tiko kina. Na ka oqo sa veivakararawataki dina! Ena loma ga ni vica na macawa, sa torosobu sara na nona bula, ka sega ni rawa vua me tiko ena soqoni ni sakaramede. O ira na cauravou oqo era qai tuvatuva bula vakayalo vei Orpha ena nodra veisiko ni veiqaravi kina nona itikotiko ka solia vua na sakaramede. A taleitaka na nona gauna e wasea vata kei ira vakabibi na madigi me vakavouia na nona veiyalayalati.

Ni torosobu tiko ga vakalevu na nona bula, a toki sara kina dua na itikotiko raraba voleka ga me laki tiko ena dua na vale ni veivukei me na qaravi kina ena vuku ni nona leqa era sota na veimacawa e dua na ilawalawa ena soqoni ni sakaramede. Dua na siga au a ciqoma e dua na qiri mai na vale ni veivukei oqo. A kerea mai e dua na daucakacaka e kea meu kauti ira na bete, se ena vosa nei Sister Cutler “o ira na cauravou”, mera sikovi koya ka me qaravi vua na sakaramede. Au kaya vei daucakacaka oya ni keimami doka sara na madigi vinaka oqo.

Ena Siga Tabu, au tukuna vei ira na bete na kerekere nei Sister Cutler. Era sega tale ni wawa, ka ra sa ciqoma na veisureti oya.

Ni oti na neimami soqoni ena Sigatabu, keimami gole sara kina vale ni veivukei. Ni keimami draiva tiko yani, era talanoataka taka tiko na cauravou na qito eso se qai oti toka ga, nodra veitarogi sa roro tiko mai, ka vakabibi o ira na goneyalewa era vinakata mera kauta kina danisi ni koronivuli e tarava. Oqo na mataqali veitalanoa sara ga ni itabagone.

Ni keimami yaco yani ena vale ni veivukei, sa kidavaki keimami mai e katuba o dauveiqaravi veikauwaitaki nei Sister Cutler. Ena tonawanawa ni matana, a kaya mai ena veilecayaki, “Bisopi Nattress, o Orpha sa malumalumu sobu tikoga. Sa dau lecavi koya ena veigauna eso, au vakabauta ni sa na mate o koya!” A tomana, “Sa dau gadreva ga o koya me kania na sakaramede.”

A raici ira sara mai na cauravou era tucake tu e dakuqu. Era dara tu na sote vulavula ka vakaneketai—era cauravou bula kilikili ni Kalou, era taura tu na Nona matabete, ka ra doka na matabete o ya. Era sa nona italai tiko na Turaga. Ena tonawanawa ni matana, a kaya na daucakacaka oqo, “O ni rairai vaka na agilosi!” A qai liutaki keimami yani kina rumu nei Orpha.

Sa torosobu sara na ituvaki kei Orpha. A davo toka ka sega ni yavala ena nona loga. Au a tekiduru ena yasani nona loga, taura na ligana, ka kaya, “Sister Cutler, oqo o Bisopi Nattress; au sa tu oqo kei ira na kuoramu ni bete. Keimami sa mai qarava oqo na sakaramede.” A qai dredre malua ga mai ka deguvacu.

Era cowiri vakaveimama mai na bete ka tekiduru wavoki e yasani nona loga. A biu toka e dua na tiki lailai ni madrai ena dua na veleti lailai. A qai masulaki sara, ka biu vakamatau yani na tikini madrai ena lomana. Keimami tekiduru tale. A qai masulaki e dua na bilo wai lailai ni sakaramede, ka vakatirimi matau yani na wai.

Oqo e dua na madigi tabu ena kena gauna. Ni keimami sa vakacavara na cakacaka vakalotu, a dredre mai o Sister Cutler ka kaya mai vakamalua, “Vinaka vakalevu.”

Au a rai wavoki yani ena rumu vei ira na cauravou totoka oqo. Era a sega soti sara ni duatani mai vei ira na luvei Ilamani tagane. Na vosa nei Aisea e vakamacalataki ira vakavinaka sara ena kedra ituvaki o ya, ni dina sara era sa, “cabe cake me vaka era vakatabana vakaikeli.”² Sa dina sara era sa italai ni Turaga.

Keimami sa qai biubiu kece mai na vale ni veivukei o ya ena veisau ni yalo. Keimami a vakaitavi ena dua na cakacaka tabu. A cakava o Sister Cutler ena iotioti ni gauna ni se bula tiko ena vuravura oqo me veiyalayalati kei na Kalou me dau nanumi Koya tiko ga. Ni sa cakava o ya, sa tadola kina ko lomalagi, ka sa vakalougatataki tale kina o koya me yaco na Nona yalayala kei na Yalona me tiko vata ga kei koya—ni sa tauvimate kei na gauna sa mate kina.

Na neimami draiva lesu tiko a vakanomodi sara. Sa qai takosova na vakanomodi oqo e dua na cauravou ka a kaya mai, “A totoka sara ga o ya.” Keimami a lesu i vale ena vakavoui ni yalo ni kila-ka me baleta na ibalebale dina me keimami taura vei keimami na yaca ni iVakabula.

A qai takali yani o Sister Cutler ni oti e vica na siga—ena yalodina ka dinata tu na nona veiyalayalati.

E veivakurabuitaki beka, ena kena ituvatuva, e rua na ivolanikalou dau tukuni wasoma ena Lotu vakatekivu mai na Veivakalesuimai ena 1830 o ya na masu ni sakaramede?

Ena vereverea ni vuravura oqo, kei na veivagolei tani era yaco rawarawa mai, meda qai kakua ni guilecava na veika lalai ka rawarawa e dau kauta mai na kaukauwa, lewa, kei na bula tawamudu. Meda sa qai vakavouia na noda veiyalayalati ena veimacawa ena noda kania na Nona sakaramede, Ni da cakava oqo, eda na kune vakacegu, ka na vakalougatataki keda o Koya ena gauna oqo ka tawamudu.