E Dua na Veivakadeitaki Malumu

Niu se qai yabaki 10, a ilesi o tinaqu me iliuliu ni itabagone ena ika 8 ni Tabanalevu o Oakland ena iTeki o Oakland California. Ena dua na yakavi, keitou tiko ena neimami valenilotu ena itaviqaravi ni tabanalevu. A oti vakatotolo na neimami itaviqaravi ni Lalai, kau a laki wavoki tu ena olo levu vata kei iratou na taciqu kei na itokani niu waraki tinaqu tiko, ni veivuke tiko ena kena cicivaki na Bogi ni iTabagone.

Keitou a qito veivuni tiko, ia keimami a lewe levu sara na gone, a sinai sara na olo. Eso vei ira na gone qase cake era vinakata mera laki qito e tautuba baleta ni galala levu tu e kea, ka vakakina e tuba e butobuto cake toka mai na olo (ka sa oti toka na 7:00 ena yakavi).

Au sega ni kila meu muri ira se kua. Au kerea me keimami qito tiko ga e loma, ia era a kaya na noqu itokani, “[Keimami] na vinaka tiko e tuba. Keimami e lewelevu. Ena vinaka ga.” Ia, au a sega ni via cakava e dua na cala, kau sa laki kerei tinaqu meu laki qito e tautuba.

“Sega,” a sauma mai o tinaqu. Dina ga niu sega ni lomavinaka ena vakamuri ira na noqu itokani, au a se rarawataka tikoga niu a sega ni vakadonui meu gole i tuba. Sa levu sara na neimami veimarautaki tiko. “Cava meu kua ni lako kina?” au a taroga. Na ulubale ga nei tinaqu oya ni sega ni vinakata meu qito ena vanua buto ni na sega ni raici au.

Niu luluqataka noqu kaya vei ira noqu itokani mera lako ga o ira, au a vakila ni dodonu. Sa vaka me vakadeitaka tiko mai na Yalo na ivakaro nei tinaqu . . . ia na gauna o ya a salamuria totolo mai e dua na malumalumu. A ka dredre dina noqu raici ira na noqu itokani ni ra sa veimuri yani ena katuba ni olo ka sega o au, au tucake yani ka cici vata kei ira, meu sa talaidredre vei tinaqu.

Ena gauna ga au sa yacova yani na katuba e tautuba ni valenilotu, au vakila ni vaka e dua na liga sa dreti au lesu. Au tu vakadua ka vuki yani, ia a sega ni dua e taura na ligaqu. Au kurabui sara, au sa laivi ira ga na noqu itokani mera biuta na valenilotu ka sega o au, kau sa qai lesu ka laki dabe duadua toka e tautuba ni rumu ni kalasi a tiko kina e loma o tinaqu.

Ena loma ni 10 se 15 na miniti au a waraka tiko kina me oti na Bogi ni iTabagone, au vakasamataka sara na veika se qai yaco oti toka ga. Au se rarawataka tikoga noqu sega ni laki qito vata kei ira na noqu itokani e tuba, ia au se vakasamataka tikoga na luluqa ni yaloqu tekivu ena gauna a vakaturi kina me keimami biuta na valenilotu, kei na ivakaro nei tinaqu meu tiko ga e loma, io ka vakakina na ‘liga’ a dreti au lesu.

Au nanuma kina na yalo vakacegu lekaleka au vakila ena imatai ni gauna niu sa talairawarawa vei tinaqu, kau kila sara ni gauna au a waraki koya kina, au a vakila tale na Yalo, me tukuna vei au niu—vakayacora tale—na digidigi dodonu.

Me yacova mai nikua, au se sega tu ga ni kila na vuna e bibi kina vei au meu tu ga kina ena loma ni valenilotu ena bogi o ya, ia a sega ni dua na ka o ya. Au sa vakavinavinaka ga vua na Yalo Tabu sa dau veidusimaki ka vakacegui keda, ena gauna mada ga ni da sega tu ni kila vinaka . . . kau sa vakavinavinakataka na noqu a talairawarawa nia vakatara na Yalo me keitou draiva lesu tale i vale ena vakacegu ni oti na itaviqaravi ni tabanalevu, kau sega ni bau vosataki mai vei tinaqu.