Noda Tabana
Kunea na Vakacegu ena Gauna Vakarerevaki
Ena Epereli ni 2021, a takavi Viti raraba yani na ikarua ni ravuravu ni Corona. Me vakataki ira e vuqa, a veisau totolo na noqu matavuvale kina ituvatuva vakacoko eso me caka me tarova na kena tete na mate oqo. Me baleta ga na imatai ni vanua a ravuti e va ga na auwa na draiva e kea mai na vanua au tiko kina, au sega ni vakabauta nina vakaleqa sara na noqu matavuvale, niu nuitaka tiko ni dewa ni mate oqo ena tarovi vakatotolo.
Ni vo toka ga vakalailai me yaco na ikarua ni ravuravu ni COVID e Viti, sa yaco mai na itukutuku ni sa leqa o tukaqu na tamai tamaqu. O tamaqu, ka tiko mai na yasayasa vakaRa kei Viti Levu, a sega ni rawa vua me tiko ena mate nei tamana e Suva ena vuku ni vakatatabu ni veitosoyaki e Viti raraba ni ra saga tiko na vakailesilesi ni tabana ni bula mera tarova na tete ni mate. Au kila ni mate sa voleka sara ivale ni sa mai vakataotaka tiko na noqu matavuvale mera soqoni vata mai ena vakacegu kina veibulu vei tukaqu.
A tomani tikoga na tete ni mate e Viti raraba. Ena gauna o ya, au a cicivaka tiko e dua na bisinisi ka vinakati meu veilakoyaki ka kauta yani na ivoli me rawa niu cau vakailavo kina ilavo ni noqu matavuvale. Keitou a tomana tiko ga na cakacaka ka tuvanaka na ivakarau eso me rawa ni taqomaki tiko ga kina vakavinaka sara na neitou matavuvale. A dua sara na gauna dredre me mua yani kina veisau baleta ni keitou a sega ni rawa ni sota ka bose vata kei ira na neitou vo ni matavuvale, ni oqo keitou dau cakava ena veimua ni macawa. Sa yaco me laki bolei kina na neitou vakasama kei na yaloi keitou ni sa sega ni rawa me caka na sota vata ka veiraici e matanavotu vakamatavuvale.
Na ka dina baleta na vairusi a yaco vei au ni bera mada ga ni takava na noqu matavuvale lailai na kena matetaka. Au a vakasamataka sara, “E rairai beka ni matetaka ga e dauveitauvi wavoki tu,” ia keitou a qai laki dikevi vakavuniwai me itatarovi. A qai yaco mai na kena macala ni sa tauvi keitou: o watiqu, o luvequ yalewa vula 18, vakakina o au na COVID-19.
Na itukutuku ni sa tauvi keitou na mate oqo a vakaleqa na neitou vakasama, vakabibi vei watiqu kei au. Sa vaka me ca tiko ga vakalevu vei keitou na matetaka ka balavu cake tikoga na gauna me keitou mamada mai kina ka sa vakasamataki tikoga kina ni sa tauvi keitou tikoga na Corona. Ni keitou rai tiko ga kina neitou tauvimate sa vakarerei keitou tiko ga kina vakalevu, ka keitou sa mai malumalumu kina ena vakasama, na lomai keitou ka vakayalo talega—sa sega na yalo ni vakabauta. Ni oti e rua na macawa ni tauvimate, keitou a qai kila ni keitou sa sega ni vakaraitaka tiko neitou vakabauti Jisu Karisito baleta ni keirau vakatara na rere me rawai keitou ena neitou vakasamataka tikoga na tauvimate. O koya gona, me valuti lesu oqo, keitou a tekivu vagolea na neitou vakasama vua na iVakabula kei na kaukauwa e lako mai ena kena cakacakataki na neitou vakabauti Koya.
Na gauna ga keitou digitaka kina me vakabauti Jisu Karisito ka cakacakataka, na neitou vakasama kei na itovo sa tekivu me veisau, ka tekivu sema na neitou cakacaka kina neitou vakabauta. Keitou a masu ena yalodina ka vakatusa tiko ga ena neitou masu ni keitou sa vakabauti Jisu Karisito ni rawa Vua me vakabulai keitou vakayago. Keitou sa tekivu wilika vakalevu na ivolanikalou ka cavuta tiko na veitiki ni ivolanikalou e loma ni vale vakakina vei keitou vakayadua.
Keitou tekivu vakasama vakadodonu ka tomana me tarai cake na neitou vakanuinui. Keitou sa sega tale ni vakila na rere se lomaleqa. Keitou sa marau cake vakalevu ena loma ni vale ka taleitaka na neitou veitokani vakai keitou. Na gauna keitou sa tekivutaka dina kina me vakaraitaki na neitou vakabauti Jisu Karisito ena cakava na veika oqo, keitou raica ni keitou sa tekivu bula mai na mate ka rawa sara me keitou sa bula vakataucoko ni oti ga vakalailai.
Au vakabauta vakaidina ni vakabauti Jisu Karisito e rawa ni kauta mai na kaukauwa veivakabulai ni da cakacakataka noda vakabauti Koya. Sa rawa me kau tani na noda rere kei na lomaocaoca ni da biuta na noda inuinui ka raimatua vua na iVakabula o Jisu Karisito. Au sa vakavinavinaka vakalevu ni noqu matavuvale a rawa me keitou bula vata mai na COVID ena veivukei ni kaukauwa veivakabulai ni iVakabula.