“Ko e Fekumi kia Kalaisi ʻi he Kilisimasí,” Liahona, Tīsema 2022.
ʻOku Talitali Lelei Kimoutolu ki he Makasini ko ʻEní
Ko e Fekumi kia Kalaisi ʻi he Kilisimasí
Vakai ki he Lami ʻa e ʻOtuá, tā fakatātaaʻi ʻe Walter Rane
ʻOku tau saiʻia ʻi he faʻahitaʻu Kilisimasí mo hono tupuʻanga fakaʻeiʻeikí. ʻOku fakamanatu mai ʻe Palesiteni Lāsolo M. Nalesoni “kuo pau ke fakamaʻu ʻetau tokangá ʻi he Fakamoʻuí,” ʻa ia ʻoku tau fakamanatua hono ʻaloʻí (“Ko Hono Tohoakiʻi Mai e Mālohi ʻo Sīsū Kalaisí ki Heʻetau Moʻuí,” Liahona, Mē 2017, 41).
ʻI he makasini ko ʻení, ʻoku fakaafeʻi kotoa ai kitautolu ʻe he pōpoaki ʻa Palesiteni Henelī B. ʻAealingi, “Ko e Mīsaia Kuo Talaʻofá,” ke tau fekumi kia Kalaisi ʻi heʻetau ngaahi fakafiefia faka-Kilisimasí: “ʻI he lotolotonga ʻo ʻetau ngaahi fakaʻānauá, ʻoku tau fakafetaʻi ki he ʻOtuá koeʻuhí ko e meʻaʻofa nāunauʻia ʻoku ui ko ‘Fakaofo, ko Akonaki, ko e ʻOtua Māfimafí, ko e Tamai Taʻengatá, ko e ʻEiki ʻo e Melinó’ (ʻĪsaia 9:5)” (vakai, peesi 4).
Kuo ueʻi fakalaumālie foki kitautolu ʻe he ngaahi ako ʻo e Fuakava Motuʻá he taʻu ní ke tau fekumi kia Kalaisi ʻi he meʻa kotoa pē ʻoku tau faí. Kuo tau fakatokangaʻi ha ngaahi fakataipe ʻo hotau Fakamoʻuí mei he Fuakava Motuʻá ʻi heʻetau mamata mo fakafanongo ʻaki ha mata mo ha telinga fakalaumālié. Ko e hā ha ngaahi fakataipe fakaʻofoʻofa ʻo hotau Fakamoʻuí kuó ke maʻu ʻi hoʻo akó?
ʻOku tau tui ʻoku fakatupu ʻe he fekumi kia Kalaisi ʻi heʻetau ngaahi anga fakafonua, tukufakaholo, mo e ngaahi fakafiefia ʻo e Kilisimasí, ha ngaahi fakamoʻoni mo ha ngaahi manatu melie ʻoku tuʻuloa. ʻOku tokoni ia ke tau aʻusia ʻa e laumālie kakato ʻo e fiefia mo e ʻofa ʻoku maʻu ʻi he Kilisimasí. ʻOku mau fakatauange ʻe tokoni atu e ngaahi fakakaukau faka-Kilisimasi ʻoku mau vahevahe ʻi he peesi 8–9, ke fakatefito hoʻo tokangá ʻia Sīsū Kalaisi. ʻOfa ke tau fekumi kotoa ki ha ngaahi fakamoʻoni ki he Mīsaia kuo talaʻofa maí ʻi he ngaahi meʻa te tau mamata ki aí, ngaahi ongó, mo e ngaahi fakafiefia ʻo e Kilisimasí he taʻu ní pea maʻu ai pē.
Fakatauange ke mou maʻu ha Kilisimasi fiefia, siʻi ngaahi kaungāmeʻa ʻofeina!
Larry mo Lisa Laycock, Utah, USA