“ʻOku Ou ʻIloʻi e Foʻi Hiva Ko ʻEná,” Liahona, Tīsema 2022.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
ʻOku Ou ʻIloʻi e Foʻi Hiva Ko ʻEná
Kuo ngalo ʻiate au ʻa Brother Tingei, ka naʻe manatuʻi ia ʻe he ʻOtuá.
Naʻe fokotuʻutuʻu ʻe heʻemau kau taki fakauooti ʻo e Kau Finemuí ke nau ʻaʻahi ki ha ʻapi ʻo e kau toulekeleka fakalotofonuá, ʻi ha ʻekitivitī fakauike. Ne mau hivaʻi ha ngaahi hiva Kilisimasi, kakata fiefia, pea mau foki ki ʻapisiasi ʻo inu vai mafana mo kai kūkisi.
Naʻe ʻikai ke u saiʻia he ongo taʻefiemālie ʻo e ngaahi loki ko ia ne hangē ko e falemahakí, ʻi he nanamu ʻa e meʻa tāmate siemú, tūkunga ʻo e ʻū teuteú mo e ongo ʻo e loto-mamahí. Te u tala atu naʻe lahi ange ʻeku tokanga ki he vai mafaná mo e feohi mo hoku ngaahi kaungāmeʻá ʻi he hiva ki he kau toulekeleká.
Ne mau aʻu atu ʻo lue fakalaka ʻi ha fanga kiʻi maama Kilisimasi ki he ʻū lokí. ʻI heʻemau hivaʻi ha ngaahi hiva kilisimasi mālié, naʻe tō ha loʻimata ʻo ha kakai ʻe niʻihi, naʻe feinga ha niʻihi ke hiva fakataha mo kimautolu, pea naʻe ʻi ai ha niʻihi naʻe hangē ne ʻikai ke nau tokanga maí. Ne nau fakamālō kotoa mai ʻi heʻemau mavahe mei honau lokí, ka naʻe ʻikai ke u ongoʻi ʻa e fiefia ʻoku faʻa maʻu ʻi he ngāue tokoní. Naʻá ku ongoʻi loto-mamahi, mo fifili pe ko e kakai nai ʻe toko fiha ʻoku ʻaʻahi ki he ʻapi ʻo e kau toulekeleká ʻi he taimi Kilisimasí pē.
Naʻe pehē mai ha taha ʻo ʻemau kau takí, “Te tau ʻalu ki he loki ʻo Brother Tingeí he taimí ni. ʻOkú ne moʻua he loto-ngalongaló, pea ʻoku ʻikai lahi ha meʻa te ne manatuʻi. ʻOku mou ʻilo naʻe toki mālōlō atu pē ʻa Sisitā Tingei.”
Naʻe fakafokifā pē mahuhu ha ongoʻi loto-mamahi ʻi hoku lotó. Kuo ngalo ʻaupito ʻiate au ʻa e ongo Tingeí. Naʻe hoko ʻa Brother Tingei mo hono uaifi ʻofeiná ko e ongo ʻāngelo ʻulu tea ʻo ʻemau kāingalotú. Naʻá ku manatuʻi hona fofonga malimalí, ʻa e ala angaʻofa mai ʻa Sisitā Tingeí, pea mo e talitali anga fakakaumeʻa ʻa Brother Tingeí. Naʻe ʻikai ke u fakatokangaʻi e taimi ne ʻikai ke na toe ʻasi ange ai ki he lotú. Naʻe ʻikai foki ke u manatuʻi kuo mālōlō ʻa Sisitā Tingei.
Ne mau hū atu ki he loki ʻo Brother Tingeí ʻo tuʻu takai hake ʻi hono saliote teketeké. Ne ongo leʻolahi ʻemau hivá ʻi he lokí, ka naʻá ne tangutu maʻu ʻaupito mo punou pē hono ʻulú. Hili ha foʻi hiva ʻe ua, naʻe fokotuʻu mai leva ʻe ha taha ʻo ʻemau kau takí ke mau hivaʻi e “Fānau Au ʻa e ʻOtua.”1
ʻI heʻemau kamatá, naʻe fakafokifā pē e mālanga hake e ʻulu ʻo Brother Tingeí, ʻāʻā hono matá, pea sio mai kiate kimautolu. Naʻá ne malimali pea naʻá ne pehē mai ʻi ha leʻo vaivai, “ʻOku ou ʻiloʻi e foʻi hiva ko ʻená.”
Naʻe kamata ke tafe hifo hono loʻimatá ʻi hono kouʻahé. ʻI he ʻosi ʻemau hivá, kuo mau tangi kotoa. Ne mau fāʻofua leva kia Brother Tingei mo lea fakamāvae ki ai.
Naʻe fakamanatu kia Brother Tingei ʻi he fanga kiʻi lea faingofua ʻo ha foʻi hiva pea mo e leʻo kehekehe ʻo ha kau finemui, ʻokú ne kei hoko pē ko ha fānau ʻa e ʻOtuá pea ʻoku ʻikai ngalo ia ʻi he ʻOtuá. Talu mei he ʻaʻahi ko iá, kuo teʻeki foki ngalo ia ʻiate au.