“Ko e Mā ʻo e Moʻuí,” Liahona, Tīsema 2022.
Haʻu, ʻo Muimui ʻIate Au
Maika
Ko e Mā ʻo e Moʻuí
ʻAloʻí, tā fakatātaaʻi ʻe David Cooke, all rights reserved 2022 / Bridgeman Images
ʻI he kotoa ʻo e taʻu ní ʻi heʻetau ako e Fuakava Motuʻá, kuo tau ʻiloʻi ai ha ngaahi fakataipe lahi ʻoku tokoni ke fakaloloto ʻetau ʻofa mo e mahino ki he ʻEiki mo e Fakamoʻui ko Sīsū Kalaisí. Ko e taha ʻo e ngaahi fakataipe ko ʻení, neongo ʻoku ʻikai fuʻu mahino hangē ko e ngaahi fakataipe kehé, ʻa e feituʻu ne ʻaloʻi ai e Fakamoʻuí—ʻa Pētelihema.
Naʻe fakahā ʻe he palōfita ko Maiká fekauʻaki mo e feituʻu naʻe ʻaloʻi ai ʻa e Fakamoʻuí, “Ka ko koe Pētelihema ʻEfalata, neongo ʻokú ke siʻi hifo ʻi he ngaahi toko afe ʻo Siutá, ka ʻe haʻu ia meiate koe kiate au, ʻa ia ʻe pule ʻi ʻIsileli, ʻa ia kuo talu mei muʻa ʻene hāʻele atu, mei he kamataʻangá” (Maika 5:2).
“Pea talaange ʻe Sīsū kiate kinautolu, ko au ko e mā ʻo e moʻuí: ko ia ʻoku haʻu kiate aú, ʻe ʻikai ʻaupito fiekaia” (Sione 6:35).
Fakaikiiki mei he Manatu Maʻu Ai pē Kiate Iá, tā fakatātaaʻi ʻe Robert T. Barrett
Naʻe akonaki ʻa Palesiteni Nalesoni ʻo pehē: “Naʻá Ne fili ke ʻaloʻi Ia ʻi Pētelihema, ofi ki Selusalema. Ko e hā e ʻuhinga naʻá Ne fili ai ʻa Pētelihemá? ʻOku ʻi ai nai ha fakataipe mahuʻinga ʻi he ʻuhinga ʻo e hingoa Pētelihemá, ʻa ia ʻoku ʻuhinga ʻi he lea faka-Hepeluú ko e ʻfale ʻo e maá’? Naʻe fakahā ʻe he Tokotaha Maʻongoʻongá ko Ia ʻa e ʻmā ʻo e moʻuí.’ (Vakai, Sione 6:48.) He toki taau moʻoni mo Ia, ko e ‘mā ʻo e moʻuí,’ ke haʻu mei he ‘fale ʻo e maá.’”1