Fakakomipiuta Pē: Kakai Lalahi Kei Talavoú
Ko e Fekumi kia Kalaisi ʻi he Kilisimasí
ʻOku ʻai ʻe he māmaní ke ngalo ngofua ʻiate kinautolu ʻa e ʻuhinga totonu ʻo e Kilisimasí, ka ko ha ngaahi meʻa siʻi ʻeni ʻoku ou manatuʻi ke fakahoko ke fekumi ai kiate Ia.
Neongo ʻoku ou fāinga he taimi ʻe niʻihi ke fakahoko ia, ka ʻoku ou tukuange maʻu pē e ngaahi fakahohaʻa ʻo e faʻahitaʻu Kilisimasí kae lava ke u tokanga taha ki hoku Fakamoʻui ko Sīsū Kalaisí. ʻOku ou feinga ke tokoniʻi e niʻihi kehé mo vahevahe e pōpoaki ʻo Hono ʻaloʻí mo e māmá pea mo e taha kotoa te u lavá.
ʻI he lotolotonga ʻo e ngaahi fakamaʻamaʻá mo e kau Sanitaá, ʻoku ou tokanga kapau ʻe ngalo ʻiate au hoku Fakamoʻuí, te u femoʻuekina au ʻi he ngaahi tukufakaholo ʻo e Kilisimasi ʻa e māmaní. Ka ʻoku ou fie tokanga taha ki he tokotaha ʻoku faʻu tonu mei ai e foʻi leá—Kalaisi. ʻI he ako ki he mafatukituki ʻo Hono ʻaloʻí kuó u maʻu ai ha ngaahi aʻusia fakalaumālie fakaofo ʻi heʻeku moʻuí. Ko e taimi ʻeni he taʻú ʻoku fakamanatu mai ai ʻeku tui kiate Iá he ko ia ʻa e ʻuhinga ki he meʻa lelei kotoa pē ʻi heʻeku moʻuí.
ʻOku fakaʻilongaʻi e Kilisimasí ʻi ha ngaahi tohi māhina lahi ko e tumutumu ia ʻo e taʻú, pea kiate au ko ha taimi ia ke u fakakaukauloto ki he ʻaloʻi, moʻui, pekia, mo e toetuʻu ʻa hoku Huhuʻí.
Ke ako ʻiate Ia pea ke ako meiate Ia.
ʻOku tokoniʻi au he taimi ko ʻeni ʻo e taʻú ke u fakakaukauʻi moʻoni ʻa e meʻa naʻá Ne fakahoko mo hokohoko atu hono fakahoko maʻakú. ʻOku faʻa tokoniʻi au ʻe he fakakaukauloto fakalongolongo ki Heʻene ngaahi ngāue tokoní, ʻEne feilaulaú, mo Hono natulá, ʻo tatau pē mo hono lau e ngaahi fakamatala ʻo Hono ʻaloʻí mo fakalaulauloto ki Heʻene moʻuí, ke u ongoʻi ofi ange ai kiate Ia.
Naʻá Ne tokanga ʻi Heʻene ngāue fakaetauhi ki he niʻihi kehé mo fakataumuʻa ke fakahoko Hono misiona fakalangí. ʻI heʻeku manatu ki Heʻene sīpinga ʻo e ngāue tokoní ʻi he taimi Kilisimasí, ʻoku ueʻi ai au ke vahevahe ʻeku ʻamanaki leleí mo e tui kiate Iá lolotonga e faʻahitaʻu makehé ni mo kinautolu ʻoku ou ʻofa taha aí pea tokanga ki he ngaahi fiemaʻu ʻa kinautolu kotoa ʻoku mau feohí.
Hangē ko ʻení, ʻi he Kilisimasi kuo ʻosí, ne toe lahi e meʻakai homau fāmilí. Naʻá ku fakalaulauloto ʻi he faʻa lotu ki he meʻa te mau lava ʻo fakahoko ki he toenga meʻakaí. Naʻá ku ongoʻi mālohi ʻoku totonu ke u ʻave ia ki he loto koló ne u mamata ai ki ha kakai tukuhausia tokolahi lolotonga ʻeku fononga ki he ʻunivēsití.
Naʻá ku fakafonu ha puha meʻakai ʻe ua pea fononga atu ke fakasio ha kakai te nau lava ʻo fakaʻaongaʻi. Naʻe ʻikai fuoloa kuó u maʻu ha falukunga kakai tukuhausia ʻa ia ne nau fiefia ke tali e maʻu meʻatokoni efiafi ʻi he Kilisimasí. Naʻá ku ongoʻi māfana ʻi heʻenau vahevahe ʻenau ongoʻi houngaʻia ʻi he ʻaho ko iá. Naʻe fakafonu foki hoku lotó ʻi heʻenau houngaʻiá. Neongo ne u foaki ha meʻatokoni ke fafanga fakatuʻasino kinautolu, ka naʻe fakafonu au ʻe he meʻatokoni fakalaumālie ne maʻu ʻi heʻeku ngāue fakaetauhi kiate kinautolú, ʻo ope atu ia he Kilisimasi ko iá.
Lolotonga ʻemau talanoá, naʻe talamai ʻe ha fefine tukuhausia naʻe lahi ʻene kaí ka naʻá ne fie vahevahe ʻa e meʻatokoni ne foaki angé mo ha taha ʻoku faingataʻaʻia. Pea ʻi heʻeku mavahe mei kolo kimui ange aí, ne u fakalaka atu ʻi he fefine tatau pē mo mamata ki heʻene tuku ʻa e meʻatokoni naʻá ku ʻoangé ʻi he tafaʻaki ʻo ha tangata tukuhausia ʻoku mohe peá ne lue fakalongolongo ʻo ʻalu.
Naʻá ku fakatokangaʻi ʻi heʻeku feinga ke u ngāue fakaetauhi ki he niʻihi kehé hangē ko Kalaisí, ko au ia naʻe tokoniʻí. Naʻá ku mamata ki he maama ʻo Kalaisí he ʻaho ko iá. Naʻá ku mamata kia Kalaisi ʻi hono teuteu faivelenga heʻeku faʻeé ʻa e ngaahi puha meʻatokoní pea ʻi he fefine tukuhausia naʻe tokoni ki ha taha kehe neongo naʻe ʻikai lahi haʻane meʻa ke foaki.
Hangē ko e akonaki ʻa ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá: “Ko e faʻahitaʻu Kilisimasí ko ha taimi angamaheni mo fakaʻofoʻofa ia ke ako ai ʻEne moʻuí pea feinga ke faʻifaʻitaki ki Hono ʻulungāngá mo e tōʻongá. ʻI hoʻo fakahoko iá, te ke lava ʻo ʻiloʻi ko Sīsū ʻa e Kalaisí, ko e ʻAlo ʻo e ʻOtuá, pea naʻá Ne fakalelei maʻa hoʻo ngaahi angahalá.”1
ʻOku ʻomi ʻe he pōpoaki ʻo e ʻaloʻi ʻo Kalaisí ha ʻamanaki lelei mo ha fiefia ki heʻeku moʻuí, pea te u lava ʻo vahevahe e pōpoaki ko iá mo e niʻihi kehé. Te u lava ʻo tānaki atu ʻeku māmá ki he fetuʻu naʻá ne tataki ʻa e kau tangata potó, pea te u lava ʻo tokoniʻi e niʻihi kehé ke nau ʻilo ʻa e Fakamoʻuí. Kuó u ʻilo ʻoku tokoni e ngaahi tāpuaki ʻo hono maʻu e ngaahi meʻaʻofá mo ongoʻi ʻoku ʻofaʻi aú ke u tali e sīpinga foaki ʻa e Fakamoʻuí. ʻI heʻeku tokoni ki he niʻihi kehé mo mamata tonu ʻi heʻenau ngāue fakaetauhi he faʻahitaʻu ko ʻení, ʻoku ou ongoʻi fehokotaki moʻoni ai mo e Fakamoʻuí.
Kapau te tau feinga kotoa ke tukunoaʻi e hohaʻa mo e femoʻuekina ʻo e faʻahitaʻu Kilisimasí pea feinga ke anga faka-Kalaisi ange, ʻoku ou ʻilo te tau lava ʻo ongoʻi vāofi ange mo Ia ʻi heʻetau moʻuí pea tataki foki e niʻihi kehé kiate Ia. ʻI heʻeku fakatokangaʻi ʻa kinautolu ʻoku ongoʻi liʻekiná, fanongo kiate kinautolu ʻoku ongoʻi tuenoá, mo tokoniʻi ʻa kinautolu ʻoku faingataʻaʻiá—tautautefito ʻi he taimi toputapu ko ʻeni ʻo e taʻú—kuó u fakatokangaʻi ko e faingamālie ko ia ke hoko ʻo hangē ko Iá ko e taha ia ʻo e ngaahi meʻaʻofa maʻongoʻonga taha kuo tau maʻu meiate Iá.
Tatau ai pē pe ko e hā e lau ʻa e māmaní fekauʻaki mo e faʻahitaʻu mālōlō ko ʻení, te tau lava ʻo fakatafoki hotau lotó ki he Fakamoʻuí. Ko Ia ʻa e uho ʻo e laumālie ʻo e Kilisimasí.