Fakamālohia ʻe he Sīpinga ʻa Melé

ʻĪmisi

Ko e ʻaʻahi ʻa e ʻāngelo ko Kepalelí kia Melé

The Annunciation [Ko e Fanongonongó], tā fakatātaaʻi ʻe Carl Heinrich Bloch

ʻOku ʻiloʻi ʻe ha taha pē kuo ʻosi ngāue fakafaifekau ʻa e hohaʻa ʻokú te maʻu ʻi he ʻamanaki ke te maʻu ha fetuʻutaki telefoni fekauʻaki mo e fehikitakí. ʻI heʻeku ʻamanaki atu ki ha fetuʻutaki telefoni hili e aʻu mai ʻeku palesiteni fakamisiona foʻoú, naʻe hoko ia ko ha taimi loto-hohaʻa moʻoni kiate au.

Naʻá ku fifili pe te u ngāue ʻi fē pea ko hai ʻe hoko ko hoku hoa foʻoú. Naʻá ku toe fifili foki pe ʻe fēfē ʻeku palesiteni fakamisiona foʻoú pea mo ʻene founga ngāué.

ʻI ha pongipongi ʻe taha ʻi he ofi mai ʻa e taimi fehikitakí, ne u lau ai e fakamatala ki he hā ʻa e ʻāngelo ko Kepalelí kia Melé. Naʻe ongo kiate au e fakamoʻoni naʻe vahevahe ʻe Kepaleli kia [Melé]: “He ʻoku ʻikai ha meʻa ʻe faingataʻa ki he ʻOtuá” (Luke 1:37). Naʻá ku ofo foki ʻi he tali loto-fakatōkilalo ʻa Melé: “Vakai, ko e kaunanga au ʻa e ʻEikí; ke hoko mai kiate au ʻo hangē ko hoʻo leá” (Luke 1:38).

Ko e moʻoni, naʻe mei ongoʻi manavasiʻi ʻa Mele ki hono kahaʻú. ʻE fēfē ha ʻilo ki ai ʻa Siosefa? Ko e hā ha fakakaukau ʻa e niʻihi kehé? Ka naʻe falala ʻa Mele ki he ʻOtuá mo ʻEne palani maʻaná.

Naʻá ku fakatokangaʻi ʻi heʻeku fehangahangai mo ʻeku manavasiʻí, naʻá ku fie hangē pē ko Melé. Naʻá ku fie lea ʻi he founga pē ʻaʻaku, “Vakai, ko e kaunanga au ʻa e ʻEikí.” Naʻá ku loto ke fai ha meʻa pē ʻe kole mai ʻe he ʻOtuá ke u fai peá u ʻalu ki ha feituʻu pē te Ne ui au ki ai. Naʻe fakafiemālieʻi au ʻe he fakamanatu ʻa Kepaleli ʻoku malava ʻa e meʻa kotoa pē ʻi he ʻOtuá.

Naʻá ku fakakaukau kia Mele ʻi he toenga ʻo e uiké, ʻi ha taimi pē naʻe haʻu ai ki hoku ʻatamaí ha ngaahi fakakaukau fakahohaʻa. Naʻe ʻomi ʻe heʻene sīpingá kiate au ha loto-toʻa mo ha mālohi ke siʻaki ʻeku ngaahi hohaʻá.

Naʻe fakahoko ʻe hotau Fakamoʻuí ʻa e tōʻonga fakakaukau tatau ko ʻeni ʻo e loto-fakatōkilaló mo e mālohí ʻi Heʻene folofola ʻi he Ngoue Ketisemaní, “ʻApā, Tamai, ʻoku faʻa fai ʻe koe ʻa e meʻa kotoa pē; ke ke ʻave ʻa e ipú ni ʻiate au: kae ʻoua naʻá ku faʻiteliha au, ka ko koe pē” (Maʻake 14:36; naʻe tānaki atu hono fakamamafaʻí). ʻI he momeniti ko iá, naʻe fakahā ʻe he Fakamoʻuí ʻoku malava ʻa e meʻa kotoa pē ʻi he ʻOtuá. Kae hangē ko ʻEne faʻeé, naʻá Ne falala ki he finangalo ʻo ʻEne Tamaí.

Naʻá ku maʻu ha ngaahi aʻusia fakaʻofoʻofa mo hoku hoa foʻoú ʻi homa ʻēlia foʻoú. ʻOku ou fehangahangai he ʻahó ni mo ha ngaahi meʻa taʻeʻiloa ange. Ka ʻi he taimi ʻoku ou manatuʻi ai ʻa Melé—mo hoku Fakamoʻuí—ʻoku fakamanatu mai ai kiate au te u lava ʻo fili ke falala ki he ʻOtuá mo ʻEne palani maʻakú, kae ʻoua te u loto-hohaʻa. ʻI he taimi ʻokú Ne kole mai ai ke u fakahoko ha meʻa ʻoku faingataʻá, te u lava ʻo fehangahangai mo e ngāue ko iá ʻi he tui, he ʻoku ʻikai ha meʻa ʻe taʻemalava ʻiate Ia.