“Kilisimasi ʻi ʻIsilelí,” Liahona, Tīsema 2022.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Kilisimasí ʻi ʻIsileli
Ne mau tuenoa pea mamaʻo mei ʻapi, ka ʻi he ngaahi ʻaho siʻi kimuʻa he Kilisimasí, naʻe tukituki mai ha taha ʻi homau matapaá.
Naʻá ku hiki mo hoku husepānití ʻi ʻAokosi 1977 ki Lehovoti, ʻIsileli, mo ʻema fānau ʻe toko tolú, ne nau kei siʻi kotoa he taʻu onó. Naʻe ʻikai ke mau poto he lea fakafonuá, ne tokosiʻi ha kakai ne nau lea faka-Pilitānia, naʻe kehe e meʻakaí mei he meʻa ne mau angamaheni ki aí, pea naʻe faingataʻa ke fakahoko haʻate fakatau. Ne mau ako ha meʻa lahi lolotonga e taʻu ʻe ua ʻemau nofo aí.
Naʻe vave e ʻalu e taimí, pea naʻe ʻikai fuoloa kuo aʻu ki Tīsema. Ko e tokolahi taha e kakai ʻi he fonuá, naʻe tatau pē ʻa e ʻaho 25 ʻo Tīsemá mo ha toe ʻaho kehe. Ka ki homau fāmilí mo ha kau Kalisitiane tokosiʻi ne nofo ʻi ʻIsilelí, ko e Kilisimasí ia.
Ne mau maheni mo ha ongomātuʻa Siu lelei, ko ʻIsileli mo Mili Seikopisoni. Naʻe haʻu [ʻa ʻIsileli] ki ʻIsileli ko ha taha kumi hūfanga mei hono fonua tupuʻanga ko Lifueniá, pea ko hono uaifí mei Saute ʻAfilika. Ne na ʻi hona taʻu 60 tupú nai pea naʻá na nofo ʻi ha kiʻi fale nofo totongi ʻi ha maile nai ʻe taha meiate kimautolu. Naʻe ngāue ʻa ʻIsileli ʻi he Weizmann Institute of Science, ʻa ia naʻe ngāue foki ai mo hoku husepānití. Naʻá na angaʻofa kiate kimautolu, ʻo toutou fakaafeʻi kimautolu ki hona ʻapi nofoʻangá ke fakamanatua e ngaahi ʻaho mālōlō ʻa e kau Siú.
ʻI heʻema teuteu ki he Kilisimasi ʻo e taʻu ko iá, naʻá ma loto ke ongoʻi ʻe heʻema fānaú e mahuʻinga ʻo hono fakamanatua e ʻaloʻi ʻo e Fakamoʻuí. Ne u maʻu ha pepa kofukofu lanu melomelo ʻo kosi ia ke hangē ha fuʻu ʻakau Kilisimasí. Naʻe valivali ia heʻema fānaú ʻaki ha kala lanu mata. Ne mau fakapipiki leva ha lole ki heʻemau fuʻu ʻakau pepá ko ha meʻa teuteu pea fakapipiki ia ki he holisí. Naʻe ʻikai ke mau ʻamanaki ki ha ʻū meʻaʻofa lahi ʻi heʻemau lalo ʻakaú he taʻu ko iá. Ne mau ongoʻi tuenoa mo mamaʻo mei he taha kotoa pea mo e meʻa kotoa pē ne mau ʻiló.
ʻI ha efiafi ʻe taha ʻi ha ngaahi ʻaho siʻi kimuʻa he Kilisimasí, naʻe tukituki mai ha taha ʻi homau matapaá. ʻI heʻemau fakaava e matapaá, ne mau vakai atu kia ʻIsileli Seikopisoni ʻokú ne toʻotoʻo mai ha foʻi keke. Naʻá ne ʻiloʻi mo hono uaifí ko ha kau Kalisitiane kimautolu pea naʻe mahuʻinga kiate kimautolu e ʻaloʻi ʻo Sīsū Kalaisí. Ne na fakahoko e meʻa ne na pehē ko e lelei tahá ke ngaohi ha foʻi keke ke tokoni ke mau fakafiefiaʻi e ʻaho ʻaloʻi ʻo e Fakamoʻuí. Ko ha aʻusia pelepelengesi ia ki homau fāmilí kotoa.
Ne mau fiefia he Kilisimasi ko iá ʻi he ʻaʻahi ki Pētelihema mo e ngaahi feituʻu takatakai aí. Ka ne ʻikai ha meʻa ne fakafiefia lahi ange kiate kimautolu ka ko e meʻaʻofa lelei ʻa ha tangata poto ko hono hingoá ko ʻIsileli Seikopisoni mo hono uaifi angaʻofa mo ʻofa ko Milí.