“Ko e Meʻaʻofa Kilisimasi Naʻe ʻIkai Ke U Fie Foakí,” Liahona, Tīsema 2022.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko e Meʻaʻofa Kilisimasi Naʻe ʻIkai Ke U Fie Foakí
Mahalo he ʻikai fie sio mai e tangatá kiate kimaua, ka naʻá ma pehē ke ma tuku atu pē ha meʻaʻofa maʻana.
Lolotonga ʻeku ngāue fakafaifekau ʻi Kalolaine Noate, ʻAmeliká, ne ma ʻaʻahi ki ha tangata naʻe ngali angalelei ʻi he kamataʻangá ka naʻe fakaʻau ʻo ne lotofefeka ʻo pehē ʻoku loi e Tohi ʻa Molomoná. Naʻá ne fakahaaʻi foki mo ha ngaahi fakakaukau hala fekauʻaki mo e Siasí. Naʻe ʻikai pē ke lelei ʻema akoʻí. Ne ma fakahoko leva ha lotu tuku peá ma mavahe.
Naʻá ku tukulotoʻi ʻi ha vahaʻataimi ha ngaahi ongo naʻe ʻikai fuʻu taau mo ha faifekau ki he tangata ko ʻení, ka naʻe faifai pē ʻo ne mangalo atu ʻiate au. Naʻe pehē pē kae ʻoua kuo aʻu ki he Kilisimasí.
ʻI he Kilisimasí, naʻe ʻomi ʻe ha kāingalotu ʻe niʻihi ʻo e Siasí ha ongo hina popikoane lalahi kuo fakaifoifo. Ne ma fakaava e ʻuluaki hiná ʻo kamata kai, ka naʻe kamata ke ma fakakaukau ki he tangata ne ma ʻaʻahi ki aí.
ʻI heʻema hila atu ki heʻema foʻi hina hono uá, ne ma manatuʻi naʻe nofo tokotaha pē ʻa e tangatá ni. Ne ma fakakaukau mahalo te ne saiʻia foki ke maʻu ha popikoane, ka ne ma manatuʻi ʻene taʻe fiefanongó. Mahalo pē ʻoku mavahe ia ʻo ʻaʻahi ki hano fāmili, pea he ʻikai fie sio mai ia kiate kimaua neongo kapau naʻá ne ʻi ʻapi. ʻIkai ngata aí, ko e popikoane ʻeni ia ʻamaua.
Ka neongo ia, naʻe ʻikai mole meiate kimaua ʻa e ʻuluaki fakakaukau ne ma maʻú. Ne ma tuku ki he tafaʻakí ʻema ngaahi ʻuhingá peá ma fakakaukau ke foaki maʻana ʻema kapa popikoane hono uá.
ʻI he tuku ʻa e lotú he Sāpate ko iá, ne ma afe atu ki hono ʻapí ʻo tukituki he matapaá. Naʻe kamata ke haʻu ha ngaahi fakakaukau kehe, ka naʻe fakaava mai ʻa e matapaá.
Ne ma pehē ange, “Ke ke Maʻu ha Kilisimasi fiefia!” Naʻá ne malimali fiefia, peá ne talitali lelei kimaua ki loto.
Ne ma pehē ange, “Tokoua, ʻokú ma maʻu heni ha meʻaʻofa maʻau.” Naʻá ma ʻoange leva ki ai ʻa e kane popikoane lahí. Naʻá ne malimali lahi ange mo kole mai ke ma tangutu hifo ʻi hono seá. ʻI heʻemau talanoá, naʻá ku fakatokangaʻi naʻe tātātaha ke u sio ki ha taha ʻoku fuʻu fiefia kimuʻa.
Ne ma ʻiloʻi ai naʻe ʻikai hano fāmili ʻoʻona ʻe nofo ofi mai. Naʻá ne palani ke Kilisimasi toko taha pē. Naʻe ʻikai faʻo ha meʻa ʻi loto ʻi he ngaahi meʻaʻofa naʻá ku sio ki ai ʻi lalo he fuʻu ʻakau Kilisimasi siʻisiʻí ka ko ha ʻū ngeʻesi puha pē ne kofu ke teuteuʻi ʻaki.
Naʻá ne pehē mai, “Naʻe ʻikai ke u ʻamanaki ʻoku tokanga mai ha taha kiate au. Naʻe ʻikai ke u fakakaukau te u maʻu ha meʻaʻofa he taʻú ni.”
ʻI heʻema mavahé, naʻá ku ongoʻi ha fiefia lahi ʻaupito ne ʻikai ai ke u kei lava ʻo mapukepuke ia. Naʻe ʻikai ke u saiʻia ʻi he tangata ko ʻení, ka kuó u ongoʻi ʻeni ha ʻofa makehe kiate ia.
ʻOku ʻikai fekauʻaki ʻa e Kilisimasí ia mo koe pe ko au. ʻOku fekauʻaki ia mo Sīsū Kalaisi, ʻa e meʻaʻofa maʻongoʻonga tahá, pea mo hono vahevahe ʻEne ʻofá mo e niʻihi kehé. ʻI he taimi ʻoku tau ʻofa mo tokoniʻi ai e niʻihi kehé, ʻoku tau ongoʻi fiefia koeʻuhí ʻoku fiefia ʻa e Tamai Hēvaní ʻi heʻetau fili ke muimui ki Hono ʻAló.