Ngāue ʻi he Tui kia Sīsū Kalaisí

ʻOku vahevahe ʻe Palesiteni Henelī B. ʻAealingi ʻi he peesi 4, ha pōpoaki faka-Kilisimasi ʻo e fiefia mo e nēkeneka ʻi he meʻaʻofa maʻongoʻonga taha kuo foaki mai ʻe he ʻOtuá maʻatautolú—ʻa Hono ʻAlo ko Sīsū Kalaisí. Lau ʻene konga tohí pea aleaʻi e ʻuhinga ʻoku hoko ai ʻa e Fakamoʻuí ko ha meʻaʻofa ʻi hoʻo moʻuí.

ʻE lava fēfē ke tau toe lelei ange ʻi hono ngāueʻi e ngaahi meʻa ʻoku tau ako ʻi heʻetau ako e ongoongoleleí? Lau e ngaahi fakakaukau ʻi he peesi 10 mei he Kau Palesitenisī Lahi ʻo e Lautohi Faka-Sāpaté, fekauʻaki mo e founga ʻe lava ke tau hoko ai ko ha “kakai [ʻoku lelei ange ʻenau moʻui ʻaki e] folofolá” (Sēmisi 1:22).

ʻOku fakamatalaʻi ʻe ʻEletā Moisesi Vilanueva ʻi he peesi 40 ʻa e founga naʻá ne maʻu ai ha fakamoʻoni ki he vahehongofulú ʻi heʻene hoko ko ha papi ului taʻu 10 ki he Siasí, ʻi heʻene mamata ki hono totongi faivelenga ʻe heʻene faʻeé ʻene vahehongofulú. Naʻá ne fakamatalaʻi leva e mahuʻinga ʻo hono fakahaaʻi ʻo e ngaahi tāpuaki ʻoku ʻikai fakatokangaʻí—fakatuʻasino mo fakalaumālie fakatouʻosi—ʻa ia ʻoku maʻu tuʻunga ʻi he totongi vahehongofulú. Te mou lava ʻo lau fakafāmili ha ngaahi konga ʻo ʻene fakamatalá pea aleaʻi e ngaahi tāpuaki ʻoku ʻikai ke fakatokangaʻi ʻoku maʻu ʻi he totongi vahehongofulú.

ʻOku ʻi he Fuakava Motuʻá ha ngaahi fakataipe ʻo e Fakamoʻuí mo ʻEne Fakaleleí ʻoku tokoni ke tau ako fekauʻaki mo Ia.

1. ʻAi ke fili ʻe he tokotaha takitaha ha taha ʻo e ngaahi fakataipe ko ʻeni ʻo Kalaisi naʻe fakaʻaongaʻi ʻi he Fuakava Motuʻá:

   • Lami (ʻEkesōtosi 12:5; 1 Pita 1:18–20).

   • Mana (ʻEkesōtosi 16:4, 12–21, 31; Sione 6:30–40).

   • Vai (ʻEkesōtosi 17:1–6; Selemaia 2:13; Sione 4:7–14).

   • Ngata palasa (Nōmipa 21:4–9; Sione 3:14–15).

   • Makatuʻu (1 Samuela 2:2; 2 Samuela 22:2–3; ʻĪsaia 28:16).

   • Vaʻa (ʻĪsaia 11:1–2; Selemaia 23:5; 33:15).

   • Maama (Saame 27:1; ʻĪsaia 60:19; Sione 8:12).

2. Fakaʻaongaʻi ha pepa pe ʻū naunau kehe ke faʻu ha meʻateuteu ʻoku fuo hangē ko e fakaʻilonga kuo filí pea fakaʻaliʻali ia ʻi ha feituʻu makehe ke manatua ai ʻa e Fakamoʻuí.

3. Ako e ngaahi fakamoʻoni fakafolofola ʻoku hiki atu fakataha mo e fakataipe takitaha ʻi ʻolungá.

Fealēleaʻakí: Ko e hā ʻoku akoʻi mai ʻe he fakataipe takitaha fekauʻaki mo e Fakamoʻuí? Ko e hā hono ʻuhinga ʻo Sīsū Kalaisi ki hoʻo moʻuí?

Ki ha ako lahi ange ki he tefitó ni, te ke lava ʻo lau pe fanongo ki he lea ʻa Palesiteni Lāsolo M. Nalesoni ʻi he lea konifelenisi ʻo ʻEpeleli 2017 “Ko Hono Tohoakiʻi mai e Mālohi ʻo Sīsū Kalaisí ki Heʻetau Moʻuí” (Liahona, Mē 2017, 39–42).