« ពន្លឺនៃលោកិយ » លីអាហូណា ខែ មករា ឆ្នាំ ២០២៣ ។
សូមស្វាគមន៍មកកាន់ច្បាប់នេះ
ពន្លឺនៃលោកិយ
សេចក្តីលម្អិតមកពី ការផ្តោតលើអំណរ ដោយ ម៉ៃឃល ធី ម៉លម៍
កាលយើងធ្វើដំណើរឆ្លងកាត់ជីវិតនៅលើផែនដីនេះ យើងឆ្លងកាត់ការសាកល្បងនានា ដោយរួមទាំងស្ថានភាពគ្រួសារដ៏លំបាកផងដែរ ។ ឧបសគ្គទាំងនេះអាចបណ្តាលឲ្យយើងមានអារម្មណ៍ថាត្រូវគេបោះបង់ចោល ថប់បារម្ភ ឬធ្លាក់ទឹកចិត្ត ។ បើយើងងាកទៅរកប្រភពនៃពន្លឺដ៏ពិត ដែលជាព្រះអង្គសង្គ្រោះព្រះយេស៊ូវគ្រីស្ទ នោះយើងនឹងអាចរកឃើញផ្លូវឆ្លងកាត់ស្ថានភាពលំបាករបស់យើងបានកាន់តែប្រសើរឡើង ។
នៅក្នុងច្បាប់នេះ ប្រធាន អិម រ័សុល បាឡឺដ បានគូសបញ្ជាក់ពីរបៀបជាច្រើនដែលយើងអាចរកច្រកចេញពីបញ្ហានានាបាន ។ លោកបានមានប្រសាសន៍ថា « ពន្លឺរបស់ [ ព្រះគ្រីស្ទ ] … រុញច្រានស្រមោលនៃពិភពលោកចេញពីមុខ និងគំនិតរបស់យើង » ( ទំព័រ ៤ ) ។
ក្នុងនាមជាអតីតអ្នកព្យាបាលផ្នែកអាពាហ៍ពិពាហ៍ និងគ្រួសារ ខ្ញុំបានធ្វើការជាមួយក្រុមគ្រួសារជាច្រើនដែលប្រឈមមុខនឹងការសាកល្បងសំខាន់ៗ ។ ក្រុមគ្រួសារដែលបានចំណាយពេលជារៀងរាល់ថ្ងៃដើម្បីអនុញ្ញាតឲ្យព្រះគ្រីស្ទគង់នៅក្នុងជីវិតរបស់ពួកគេបានរកឃើញភាពជាដៃគូនៃពន្លឺ និងសេចក្តីស្រឡាញ់របស់ទ្រង់ នៅពេលពួកគេប្រឈមនឹងការពុះពាររបស់ពួកគេ ។ ខ្ញុំសូមចែកចាយដំណើររឿងទាំងនោះនៅក្នុងអត្ថបទរបស់ខ្ញុំនៅ ទំព័រ ៨ ។
ខ្ញុំមានអំណរគុណចំពោះឱកាសដ៏ពិសិដ្ឋដែលខ្ញុំមាន តាមរយៈការងាររបស់ខ្ញុំ ដើម្បីមើលឃើញក្រុមគ្រួសារ និងបុគ្គលម្នាក់ៗចូលរួមជាមួយព្រះអង្គសង្គ្រោះនៅលើមាគ៌ាឆ្ពោះទៅកាន់ការក្លាយជាប្រជារាស្រ្តស៊ីយ៉ូន ( សូមមើល ម៉ូសាយ ៧:១៨ ) ។ ខ្ញុំមើលឃើញស្ថានសួគ៌បន្តិចរាល់ពេលដែលខ្ញុំឃើញព្រះហស្តរបស់ព្រះអម្ចាស់ក្នុងជីវិតរបស់នរណាម្នាក់ ។
ដោយអំណរគុណ
គ្រីស្ទី ម៉នសុន