« ក្រុមគ្រួសារគឺអស់កល្បជានិច្ច » លីអាហូណា ខែ មករា ឆ្នាំ ២០២៣ ។
មូលដ្ឋានគ្រឹះនៃដំណឹងល្អ
ក្រុមគ្រួសារគឺអស់កល្បជានិច្ច
គ្រួសារគឺជាអង្គភាពដ៏សំខាន់នៃសង្គម និងសាសនាចក្រ ។ សមាជិកសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយជឿថា ក្រុមគ្រួសារអាចនៅអស់កល្បជានិច្ចបាន ។ យើងអាចខំធ្វើការដើម្បីពង្រឹងក្រុមគ្រួសាររបស់យើងនៅលើផែនដីបាន ។ យើងក៏មានសេចក្តីជំនឿថា យើងអាចទទួលបានពរជ័យនៃគ្រួសារដ៏អស់កល្បជានិច្ចផងដែរ ។
ក្រុមគ្រួសារនៃព្រះ
មនុស្សគ្រប់រូបទាំងអស់គឺជាបុត្រា ឬបុត្រីខាងវិញ្ញាណរបស់ព្រះមាតាបិតាសួគ៌ ។ យើងទាំងអស់គ្នាមានចំណែកក្នុងគ្រួសាររបស់ព្រះ ។ យើងទាំងអស់គ្នាមាន និស្ស័យ និងជោគវាសនានៃព្រះ ។ ប្រសិនបើយើងរស់នៅដោយសុចរិត នោះយើងអាចត្រឡប់ទៅរស់នៅជាមួយព្រះវរបិតាសួគ៌វិញបាន ជាផ្នែកមួយនៃគ្រួសាររបស់ទ្រង់ជារៀងរហូត ។
រូបថតអាពាហ៍ពិពាហ៍ដោយ យ៉ូសែប កាលូបា
ក្រុមគ្រួសារដ៏នៅអស់កល្បជានិច្ច
នៅពេលបុរស និងស្រ្តីបានរៀបការនៅក្នុងព្រះវិហារបរិសុទ្ធ ហើយរក្សា សេចក្តីសញ្ញា របស់ពួកគាត់ នោះអាពាហ៍ពិពាហ៍របស់ពួកគាត់នឹងស្ថិតស្ថេររហូតអស់កល្បជានិច្ច ។ ពិធីបរិសុទ្ធនៅព្រះវិហារបរិសុទ្ធនេះហៅថា ការផ្សារភ្ជាប់ ។ កូនៗដែលកើតបន្ទាប់ពីឪពុកម្តាយបានផ្សារភ្ជាប់ហើយ គឺបានកើតនៅក្នុងសេចក្តីសញ្ញានោះ ។ កូនៗដែលកើតមុនពេលឪពុកម្តាយរបស់ពួកគេបានផ្សារភ្ជាប់ អាចផ្សារភ្ជាប់ជាមួយឪពុកម្តាយនៅក្នុងព្រះវិហារបរិសុទ្ធបាន ដើម្បីឲ្យពួកគេអាចក្លាយជាគ្រួសារមួយជារៀងរហូត ។ សមាជិកសាសនាចក្រធ្វើកិច្ចការពង្សប្រវត្តិ និងព្រះវិហារបរិសុទ្ធ ដើម្បីឲ្យពួកគេអាចផ្សារភ្ជាប់គ្រួសារពួកគេជាមួយគ្នាគ្រប់ជំនាន់ទាំងអស់ ។ ពរជ័យនៃគ្រួសារដ៏អស់កល្បជានិច្ចអាចកើតមានឡើងបាន ដោយសារតែព្រះយេស៊ូវគ្រីស្ទ និងដង្វាយធួនរបស់ទ្រង់ ។
អាពាហ៍ពិពាហ៍
អាពាហ៍ពិពាហ៍រវាងបុរសម្នាក់ និងស្ត្រីម្នាក់ត្រូវបានតែងតាំងឡើងដោយព្រះ ។ ដំណឹងល្អនៃព្រះយេស៊ូវគ្រីស្ទបង្រៀនស្វាមី និងភរិយាឲ្យស្មោះត្រង់ចំពោះគ្នាទៅវិញទៅមក និងស្មោះត្រង់ក្នុងសេចក្ដីសញ្ញានៃអាពាហ៍ពិពាហ៍របស់ពួកគេ ។ ពួកគេត្រូវស្មោះត្រង់នៅក្នុងគំនិត ក្នុងពាក្យសម្ដី និងទង្វើ ។ អាពាហ៍ពិពាហ៍ជាភាពជាដៃគូស្មើភាពគ្នា ហើយស្វាមីភរិយាគួរតែលើកទឹកចិត្ត លួងលោម និងជួយគ្នាទៅវិញទៅមក ។
ឪពុកម្តាយ និងកូនៗ
ព្រះបានបង្គាប់ឲ្យអ័ដាម និងនាងអេវ៉ាបង្កើតកូនចៅ ។ ថ្នាក់ដឹកនាំសាសនាចក្របានបង្រៀនថា បទបញ្ញត្តិនេះនៅតែអនុវត្តដដែល ។ ឪពុក និងម្តាយខិតខំរួមគ្នាដើម្បីចិញ្ចឹមកូនដោយសេចក្ដីស្រឡាញ់ និងសុចរិត ( សូមមើល គោលលទ្ធិ និង សេចក្តីសញ្ញា ៦៨:២៥–២៨ ) ។ កូនៗត្រូវបានបង្រៀនឲ្យគោរព និងប្រតិបត្តិដល់ឪពុកម្តាយរបស់ពួកគេ ( សូមមើល និក្ខមនំ ២០:១២ ) ។
ការបង្រៀន និងការរៀនសូត្រ
ឪពុកម្តាយបង្រៀនកូនៗរបស់ខ្លួនឲ្យស្រឡាញ់ព្រះ ហើយគោរពតាមបទបញ្ញត្តិរបស់ទ្រង់ ។ ជីវិតគ្រួសារផ្តល់ឲ្យយើងនូវឱកាសដើម្បីមានអារម្មណ៍រីករាយ និងរៀនពីភាពអត់ធ្មត់ និងការមិនគិតពីខ្លួនឯង ។ លក្ខណៈទាំងនេះជួយយើងឲ្យកាន់តែបានដូចព្រះ ហើយរៀបចំយើងឲ្យរស់នៅដោយសុភមង្គលជាក្រុមគ្រួសារជារៀងរហូត ។
ការពង្រឹងក្រុមគ្រួសារ
វាត្រូវការការខិតខំ ការលះបង់ និងការអត់ធ្មត់ ដើម្បីស្ថាបនាគ្រួសារជោគជ័យមួយ ។ គោលការណ៍នៃដំណឹងល្អដូចជា សេចក្តីជំនឿ ការអធិស្ឋាន ការអភ័យទោស សេចក្តីស្រឡាញ់ ការងារ និងការសប្បាយដែលល្អៗ អាចជួយយើងឲ្យរកឃើញអំណរនៅក្នុងជីវិតគ្រួសារ ។ យើងអាចទទួលបានវិវរណៈ ផ្ទាល់ខ្លួន ដើម្បីដឹងពីរបៀបដើម្បីពង្រឹងក្រុមគ្រួសាររបស់យើង ។
រូបភាពរបស់ព្រះគ្រីស្ទ ដោយ ហិនរីឆ ហូហ្វមិន
ពរជ័យមានសម្រាប់មនុស្សទាំងអស់
មិនមែនមនុស្សគ្រប់គ្នាសុទ្ធតែមានឱកាសធ្វើជាផ្នែកមួយនៃគ្រួសារដ៏ល្អនៅលើផែនដីនេះទេ ។ ប៉ុន្តែព្រះបានសន្យាថា មនុស្សគ្រប់រូបដែលកាន់តាមបទបញ្ញត្តិរបស់ទ្រង់នឹងទទួលបានពរជ័យទាំងអស់នៃគ្រួសារដ៏អស់កល្បជានិច្ច ។ យើងត្រូវទុកចិត្តលើទ្រង់ ហើយមានសេចក្តីជំនឿលើពេលវេលារបស់ទ្រង់ ។