« តើបេសកកម្ម និងការងារបម្រើរបស់ព្រះគ្រីស្ទគឺជាអ្វី ? » លីអាហូណា ខែ មករា ឆ្នាំ ២០២៣ ។
ចូរមកតាមខ្ញុំ
តើបេសកកម្ម និងការងារបម្រើរបស់ព្រះគ្រីស្ទគឺជាអ្វី ?
ទេសនកថានៅលើភ្នំ ដោយ ជេមស៍ ធីសុទ្ធ © Brooklyn Museum of Art / Bridgeman Images
ព្រះយេស៊ូវគ្រីស្ទបានចុះសេចក្តីសញ្ញានៅក្នុងជីវិតមុនឆាកជីវិតនេះដើម្បីមកផែនដី និងធ្វើជាព្រះអង្គសង្រ្គោះរបស់យើង ( សូមមើល ម៉ូសេ ៤:២; អាលម៉ា ៣:២៧ ) ។ ក្នុងនាមជាព្រះអង្គសង្រ្គោះរបស់យើង ទ្រង់បានសម្រេចទាំងបេសកកម្មរបស់ទ្រង់ និងការងារបម្រើរបស់ទ្រង់ ។
ប្រធាន រ័សុល អិម ណិលសុន បានពន្យល់ ៖ « បេសកកម្មរបស់ព្រះអម្ចាស់នៅក្នុងជីវិតរមែងស្លាប់គឺដើម្បីសម្រេចបានដង្វាយធួន… [ និង ] ដើម្បីធ្វើឲ្យមានជីវិតដ៏នៅអស់កល្បជានិច្ចសម្រាប់មនុស្សគ្រប់គ្នាដែលមានភាពស័ក្តិសមដើម្បីទទួលជីវិតនេះ ។ … ការងារបម្រើរបស់ទ្រង់គឺជាអ្វីគ្រប់យ៉ាងដែលទ្រង់បានធ្វើ—អព្ភូតហេតុរបស់ទ្រង់ ការបង្រៀនរបស់ទ្រង់ សេចក្តីស្រឡាញ់របស់ទ្រង់ ការផ្តោតព្រះទ័យទុកដាក់លើពិធីបរិសុទ្ធនានា ការបង្រៀនយើងពីរបៀបអធិស្ឋាន » ។១
ទិដ្ឋភាពនៃបេសកកម្ម និងការងារបម្រើរបស់ព្រះគ្រីស្ទបានពិពណ៌នានៅកន្លែងជាច្រើនក្នុងព្រះគម្ពីរ ។ សូមក្រឡេកមើលការពិពណ៌នាដែល ម៉ារា ជាមាតាទ្រង់បានផ្តល់ឲ្យនៅក្នុង លូកា ១:៤៦–៥៥ ។ ហាណា ក៏ជាគំរូមួយនៃការស្តាប់បង្គាប់ផងដែរ ដោយបានផ្តល់ការអធិស្ឋានស្រដៀងគ្នាអំពីការងារបម្រើរបស់ព្រះអម្ចាស់នៅក្នុង សាំយូអែល ទី១ ២:១–១០ ។
ដូចជាសៀវភៅសិក្សា ចូរមកតាមខ្ញុំ ផ្តល់យោបល់ នោះអ្នកអាចប្រៀបធៀបអ្វីទាំងនេះទៅនឹងបទប្រទានពររបស់ព្រះយេស៊ូវនៅក្នុង ម៉ាថាយ ៥:៣–១២ បាន ។២
សូមពិចារណាសរសេរពីទិដ្ឋភាពនៃការងារបម្រើរបស់ព្រះគ្រីស្ទ ដែលបទគម្ពីរទាំងនេះពិពណ៌នា ។ នេះគឺជាឧទាហរណ៍មួយអំពីទិដ្ឋភាពមួយ ៖
-
ព្រះគ្រីស្ទបានយាងមកដើម្បីជួយបំពេញការស្រេកឃ្លានខាងវិញ្ញាណរបស់យើង ( សូមមើល សាំយូអែល ទី១ ២:៥; លូកា ១:៥៣; ម៉ាថាយ ៥:៦ ) ។