« ការស្វែងរកផែនការដ៏ទេវភាពនៅក្នុងគ្រួសារដែល ‹ មិនល្អឥតខ្ចោះ › របស់យើង » លីអាហូណា ខែ មករា ឆ្នាំ ២០២៣ ។
យុវមជ្ឈិមវ័យ
ការស្វែងរកផែនការដ៏ទេវភាពនៅក្នុង គ្រួសារដែល « មិនល្អឥតខ្ចោះ » របស់យើង
ការមិនមានគ្រួសារ « ដ៏ល្អឥតខ្ចោះ » នៅក្នុងជីវិតរមែងស្លាប់អាចជារឿងដ៏ឈឺចាប់ ប៉ុន្តែយើងអាចប្រើភាពពិតរបស់យើង ដើម្បីខិតទៅជិតព្រះអង្គសង្គ្រោះបាន ។
គ្មានអ្វីនាំមកនូវអារម្មណ៍ដ៏មានអត្ថន័យយ៉ាងជ្រាលជ្រៅនៃអំណរ សេចក្តីប្រាថ្នា និងការឈឺចាប់ ជាងទំនាក់ទំនងដែលជាចំណុចសំខាន់បំផុតនៃបទពិសោធន៍របស់យើងនៅក្នុងជីវិតរមែងស្លាប់—ដែលជាទំនាក់ទំនងគ្រួសាររបស់យើងនោះឡើយ ។ ហើយដោយសារទំនាក់ទំនងទាំងនេះមានសារៈសំខាន់យ៉ាងខ្លាំង ទើបថ្នាក់ដឹកនាំសាសនាចក្ររបស់យើងត្រូវបានបំផុសគំនិតឲ្យបង្កើត « ក្រុមគ្រួសារ ៖ ការប្រកាសដល់ពិភពលោក » នេះឡើង ។១ សេចក្តីពិតរបស់វាថ្លែងជាសាក្សីអំពីព្រះវរបិតាជាទីស្រឡាញ់ដែលចង់ឲ្យយើងដឹងពីគំរូដ៏ទេវភាព ដែលនាំទៅរកសុភមង្គលដ៏អស់កល្បក្នុងជីវិតគ្រួសារ ។
ប្រធាន ហិនរី ប៊ី អាវរិង ដែលជាទីប្រឹក្សាទីពីរនៅក្នុងគណៈប្រធានទីមួយ បានបង្រៀន ៖ « ដោយសារតែព្រះវរបិតារបស់យើងស្រឡាញ់បុត្រាបុត្រីរបស់ទ្រង់ នោះទ្រង់នឹងមិនទុកឲ្យយើងទស្សន៍ទាយអំពីអ្វីដែលសំខាន់បំផុតនៅក្នុងជីវិតនេះឡើយ ពេលវាទាក់ទងនឹងជម្រើសថាតើការយកចិត្តទុកដាក់របស់យើងអាចនាំមកនូវសុភមង្គល ឬភាពព្រងើយកន្តើយរបស់យើងអាចនាំមកនូវទុក្ខសោកនោះ » ។២ ការណ៍នេះរួមបញ្ចូលទាំងតួនាទីគ្រួសារដ៏ពិសិដ្ឋជាច្រើនដែលយើងអាចមាននៅក្នុងជីវិតនេះដូចជា ៖ កូនស្រី ឬកូនប្រុស បងស្រី ឬបងប្រុស ម្តាយ ឬឪពុក មីង ឬពូ ជីដូន ឬជីតា ។
សេចក្តីពិតនៅក្នុងសេចក្តីប្រកាសអំពីគ្រួសារបំភ្លឺផ្លូវទៅកាន់ « ភាពល្អឥតខ្ចោះដ៏អស់កល្បជានិច្ច » ដែលយើងជាច្រើនប្រាថ្នាចង់បានយ៉ាងខ្លាំង—ពោលគឺទំនាក់ទំនងគ្រួសារដ៏រឹងមាំ និងដ៏រីករាយអស់កល្បជានិច្ច ។ បញ្ហានោះគឺថា យើងរស់នៅក្នុង « ជីវិតរមែងស្លាប់ដ៏ពិត » ។ ហើយចន្លោះប្រហោងរវាង « ពិត » និង « ល្អឥតខ្ចោះ » អាចជារឿងគួរឲ្យឈឺចាប់ ។ ពេលខ្លះ ជំនួសឲ្យការគិតថាវាជាពន្លឺដើម្បីដឹកនាំយើង យើងថែមទាំងអាចនឹងចាត់ទុកថាសេចក្តីប្រកាសអំពីគ្រួសារជាការរំឭកដ៏ក្រៀមក្រំ កាលបើយើង « បរាជ័យ » ក្នុងការបំពេញតាម « ភាពល្អឥតខ្ចោះ » នេះ ។
-
យើងប្រហែលជាចង់រៀបការ ប៉ុន្តែមិនអាចទៅរួច ។
-
យើងប្រហែលជាបានរៀបការ ហើយជួបប្រទះនឹងការលែងលះដ៏អាក្រក់ ។
-
យើងប្រហែលជាចង់មានកូន តែមិនអាចមានបាន ។
-
យើងប្រហែលជាធ្លាប់ឆ្លងកាត់ការរំលោភបំពាននៅក្នុងទំនាក់ទំនងគ្រួសារដែលយើងទុកចិត្ត ។
-
យើងប្រហែលជាបានឆ្លងកាត់ការឈឺចាប់យ៉ាងខ្លាំងដោយសារតែការជ្រើសរើសរបស់សមាជិកគ្រួសារជាទីស្រឡាញ់ ។
-
យើងអាចមានអារម្មណ៍ថាបែកបាក់គ្នា ទោះជាខំប្រឹងអស់ពីសមត្ថភាពដើម្បីនាំមកនូវសាមគ្គីភាពដល់មនុស្សជាទីស្រឡាញ់របស់យើងក៏ដោយ ។
-
យើងថែមទាំងអាចមានអារម្មណ៍ស្រងាកចិត្ត ដោយសារការចង់បាន និងការសន្យាមិនបានបំពេញតាម ។
តាមការពិត យើងទាំងអស់គ្នានឹងស្គាល់ពីបញ្ហាប្រឈម ការឈឺចាប់ និងទុក្ខព្រួយក្នុងជីវិតគ្រួសារ—ខ្លះច្រើនខ្លះតិច ។ នៅចំណុចខ្លះ យើងទាំងអស់គ្នានឹងប្រាសចាកពីគំរូដ៏ល្អឥតខ្ចោះដែលបានរៀបរាប់នៅក្នុងការប្រកាសអំពីគ្រួសារនេះ ។
អ្វីដែលយើងអាចមិនដឹងគឺផែនការដ៏ទេវភាពដែលមានក្នុងភាពពិតនោះ ។
ការខំខ្នះខ្នែងស្វែងរក និងការចុះចូលនឹងព្រះអង្គសង្រ្គោះ
ក្នុងនាមជាស្ត្រីនៅលីវដែលមានចិត្តចង់រៀបការ និងចង់មានកូនជាច្រើនឆ្នាំ ខ្ញុំបានមានបំណងប្រាថ្នា និងបានជឿថា គោលបំណងដ៏សំខាន់នៃជីវិតរបស់ខ្ញុំ គឺដើម្បីសម្រេចបាននូវភាពដ៏ល្អឥតខ្ចោះនៃជីវិតគ្រួសារដែលមាននៅក្នុងការប្រកាសអំពីគ្រួសារ ។ ប៉ុន្តែទោះជាខ្ញុំខំប្រឹងប្រែងអស់ពីចិត្តក៏ដោយ ក៏ខ្ញុំហាក់មិនអាចធ្វើឲ្យវាកើតឡើងតាមរបៀបដែលខ្ញុំជឿថាវាគួរកើតឡើងដែរ ។ ការពុះពារនោះគឺនឿយហត់ណាស់ ។
នៅពេលនោះ ខ្ញុំមិនអាចមើលឃើញកិច្ចការដ៏អព្ភូតហេតុដែលព្រះអម្ចាស់ធ្វើនៅក្នុងចិត្តខ្ញុំ តាមរយៈការតស៊ូទាំងនោះឡើយ ។
បើក្រឡេកមើលទៅវិញ ការចង់បានរបស់ខ្ញុំដែលមិនបានបំពេញនោះ បានដើរតួយ៉ាងពិសិដ្ឋក្នុងការធ្វើឲ្យដួងចិត្តរបស់ខ្ញុំងាកទៅរកព្រះប្រោសលោះរបស់ខ្ញុំ ដើម្បីស្វែងរកសេចក្តីសុខសាន្ត និងការណែនាំដែលមានតែទ្រង់មួយអង្គគត់ដែលអាចប្រទាន និងធ្វើឲ្យការទុកចិត្តរបស់ខ្ញុំកាន់តែស៊ីជម្រៅលើសេចក្តីស្រឡាញ់ដ៏ល្អឥតខ្ចោះ និងព្រះចេស្ដាដ៏មានអំណាចរបស់ទ្រង់ ។ ការអធិស្ឋាន និងការសិក្សាព្រះគម្ពីរប្រចាំថ្ងៃ ហើយជាពិសេសពាក្យសម្ដីក្នុងសន្និសីទទូទៅ បានក្លាយជាខ្សែជីវិតនៃសេចក្តីសង្ឃឹម និងការណែនាំ ។ ខ្ញុំត្រូវបានបង្ខំចិត្តឲ្យងាកទៅរកពាក្យសម្ដីនៃពររបស់លោកអយ្យកោរបស់ខ្ញុំ—និងពរជ័យបព្វជិតភាពផ្សេងទៀត—ដើម្បីស្វែងរកសេចក្ដីស្រឡាញ់ និងការដឹកនាំផ្ទាល់ខ្លួនសម្រាប់ខ្ញុំមកពីព្រះវរបិតាដ៏អស់កល្បរបស់ខ្ញុំ ។
នៅពេលខ្ញុំបើកដួងចិត្តរបស់ខ្ញុំថ្វាយព្រះអម្ចាស់ ទោះជាពេលដែលខ្ញុំត្រូវបានល្បួងឲ្យងាកចេញដោយភាពជូរចត់ក្ដី ក៏ចំណាប់អារម្មណ៍ដ៏ពិសិដ្ឋបានកើតមានក្នុងគំនិត និងដួងចិត្តរបស់ខ្ញុំដែរ ដែលវាធានាថា ទ្រង់ដឹងថាខ្ញុំនៅឯណា ជីវិតរបស់ខ្ញុំមានផែនការដ៏ល្អមួយ ហើយខ្ញុំអាចទុកចិត្តលើទ្រង់បាន ។ កម្មសិទ្ធិនៃសេចក្ដីសញ្ញា៣ ចំពោះព្រះប្រោសលោះរបស់ខ្ញុំក្លាយទៅជាបណ្ដាញនៃសេចក្ដីសុខសាន្ត និងអំណរដ៏លើសលុបដែលធំជាងប្រភពនៃជោគជ័យ ឬសុភមង្គលគ្រប់យ៉ាង ។
ខ្ញុំបានមើលឃើញថា ទោះបីជាខ្ញុំបានជឿថា គោលបំណងនៃជីវិតរបស់ខ្ញុំគឺដើម្បីសម្រេចក្តីសុបិនរបស់ខ្ញុំអំពីគ្រួសារដ៏ល្អឥតខ្ចោះក៏ដោយ ក៏ព្រះអម្ចាស់កំពុងតែធ្វើឲ្យអ្វីដែល អែលឌើរ ជែហ្វ្រី អ័រ ហូឡិន ក្នុងកូរ៉ុមនៃសាវកដប់ពីរនាក់ហៅថា គោលបំណងមូលដ្ឋាននៃជីវិតរមែងស្លាប់អាចកើតឡើងបានដែរ ។ ដោយដកស្រង់ពីស្ដេចបេនយ៉ាមីននោះលោកបានពន្យល់ថា « ប្រហែលជាគោលបំណងមូលដ្ឋាននោះ… គឺដើម្បីប្រែក្លាយជា ‹ អ្នកបរិសុទ្ធវិញ តាមរយៈដង្វាយធួននៃព្រះគ្រីស្ទដ៏ជាព្រះអម្ចាស់ › ដែលនឹងតម្រូវឲ្យយើងក្លាយ ‹ ដូចជាកូនក្មេង ងាយប្រដៅ ស្លូតបូត ទាបរាបសា អត់ឱន ពោរពេញទៅដោយសេចក្ដីស្រឡាញ់ ព្រមទទួលនូវអ្វីៗទាំងអស់ដែលព្រះអម្ចាស់ទ្រង់ទតឃើញថាល្អ ដូចជាកូនក្មេងព្រមធ្វើតាមឪពុកខ្លួនដូច្នោះ › ដែរ ។៤
តម្រូវការរបស់ខ្ញុំដើម្បីមានជំនួយ និងកម្លាំងពីព្រះអង្គសង្គ្រោះបានដឹកនាំខ្ញុំឲ្យស្វែងរក និងដកពិសោធន៍នូវដួងចិត្តនៃការចុះចូល ភាពស្លូតបូត ភាពរាបទាប ភាពអត់ធ្មត់ និងសេចក្តីស្រឡាញ់របស់ទ្រង់ ។ នៅក្នុងដំណើរការនោះ ខ្ញុំត្រូវបានផ្លាស់ប្ដូរដោយព្រះចេស្ដាដ៏មានអំណាចរបស់ទ្រង់ ។ ហើយជាការពិត នោះគឺជាអ្វីដែលខ្ញុំចង់បានបំផុត ។ អ្វីដែលហាក់ដូចជា « មិនល្អឥតខ្ចោះ » តាមពិតបានត្រួសត្រាយផ្លូវសម្រាប់ « ភាពល្អឥតខ្ចោះ » ដ៏ស្រស់ស្អាតបំផុត ។
មិត្តភក្ដិ និងសហការីរបស់ខ្ញុំ ធី មែនហ្វៀល បានពិពណ៌នាអំពីសេចក្ដីពិតស្រដៀងគ្នាមួយ ។ ក្នុងនាមជាបុរសម្នាក់ដែលប្រតិព័ទ្ធភេទដូចគ្នា ធី បានឃើញពីការរីកចម្រើនខាងវិញ្ញាណដែលអាចកើតឡើង នៅពេលយើងចាក់គ្រឹះជីវិតរបស់យើងលើព្រះយេស៊ូវគ្រីស្ទ ហើយសុខចិត្តលះបង់ដួងចិត្តទាំងមូលរបស់យើងថ្វាយទ្រង់ ដោយអនុញ្ញាតឲ្យទ្រង់ញែកបទពិសោធន៍ដ៏លំបាកទាំងអស់សម្រាប់ជាផលប្រយោជន៍ដល់យើងវិញ ។ ចំពោះ ធី ការណ៍នោះបានចាប់ផ្ដើមនៅពេលព្រះវិញ្ញាណបានបង្រៀនគាត់ « ថា មិនថាខ្ញុំធ្លាប់រៀបការឬអត់នោះទេ ព្រះតែងស្រឡាញ់ និងទទួលយកខ្ញុំជានិច្ច ។ ការទទួលខុសត្រូវរបស់ខ្ញុំគឺបន្តរស់នៅពីមួយថ្ងៃទៅមួយថ្ងៃ ខណៈដែលខិតខំស្វែងរក ហើយធ្វើតាមការដឹកនាំពីព្រះវិញ្ញាណ » ។៥ ហើយនៅទីបំផុត ការជឿទុកចិត្តលើព្រះបាននាំធី ឲ្យចូលទៅក្នុងអាពាហ៍ពិពាហ៍អស់កល្បដ៏រីករាយពោរពេញដោយអំណរជាមួយភរិយារបស់គាត់ ។
ការអភិវឌ្ឍទំនាក់ទំនងដ៏កាន់តែស៊ីជម្រៅជាមួយនឹងព្រះអង្គសង្គ្រោះ
នៅទីបំផុត ខ្ញុំក៏បានរៀបការផងដែរ បន្ទាប់ពីការងឿងឆ្ងល់ថាតើខ្ញុំមានថ្ងៃអាចនឹងបានរៀបការឬទេ ។ ប៉ុន្តែ តម្រូវការដើម្បីបោះយុថ្កាយ៉ាងជ្រៅនៅក្នុងព្រះយេស៊ូវគ្រីស្ទបានបន្តទៅទៀត ប្រសិនបើមិនបានកើនឡើងទេ ក្នុងរយៈពេលជាច្រើនឆ្នាំចាប់តាំងពីខ្ញុំបានផ្សារភ្ជាប់ជាមួយស្វាមីរបស់ខ្ញុំ ។ ខ្ញុំបានចាប់ផ្តើមស្វែងរកទ្រង់ជាថ្មីម្តងទៀតដើម្បីទទួលបានសេចក្ដីសុខសាន្ត នៅពេលខ្ញុំជួបបញ្ហាដោយសារភាពគ្មានកូន ។ ខ្ញុំមិនដឹងថា ខ្ញុំអាចមានអំណរដែលខ្ញុំសង្ឃឹមចង់បានក្នុងជីវិតគ្រួសារយ៉ាងណាទេ បើគ្មានកូននោះ ។ ប៉ុន្តែសូម្បីតែបន្ទាប់ពីស្វាមីខ្ញុំ និងខ្ញុំបានទទួលពរឲ្យមានកូនពីរនាក់ ក៏ខ្ញុំតែងតែផ្តោតលើភាពទន់ខ្សោយរបស់ខ្ញុំក្នុងនាមជាម្តាយដែរ ។ នៅទីបំផុត ទោះបីជាខ្ញុំមានអ្វីដែលខ្ញុំតែងតែចង់បានក៏ដោយ ក៏គម្លាតរវាង « ភាពល្អឥតខ្ចោះ » និង « ការពិត » ហាក់ដូចជាកើនឡើងដដែល ។
កាលៈទេសៈទាំងនេះបានអញ្ជើញខ្ញុំឲ្យគិតឡើងវិញអំពីគោលបំណងនៃជីវិតរមែងស្លាប់ និងដំណើរការដែលបានតែងតាំងដោយព្រះ ដែលតាមរយៈនោះយើងរីកចម្រើន ។ ប្រហែលជាគោលបំណងនៃជីវិតអាចមិនមែនដើម្បីសម្រេចបានគ្រួសារដ៏ល្អឥតខ្ចោះក៏ថាបាន ។ ប្រហែលជាភាពល្អឥតខ្ចោះមិនមាននៅក្នុងជីវិតរមែងស្លាប់នេះទេ ។ ផ្ទុយទៅវិញ ប្រហែលជាគ្រួសារគឺជាឱកាសសម្រាប់ការរីកចម្រើន ។
តាមពិតទៅ ប្រហែលជាភាពពិតនៃអារម្មណ៍ឈឺចាប់ដែលមាន « តិចជាងភាពល្អឥតខ្ចោះ » ពិតជាបំពេញនូវគោលបំណងដ៏ពិសិដ្ឋនៃការអញ្ជើញឲ្យមានការលូតលាស់ដែលយើងត្រូវការដើម្បីរស់នៅតាមទំនាក់ទំនង « ដ៏ល្អឥតខ្ចោះ » ។ ប្រហែលជាអំណាចស្ថិតនៅក្នុងការពិតដែលថា គម្លាតដ៏ធំរវាងការពិត និងភាពល្អឥតខ្ចោះអញ្ជើញយើងឲ្យទៅកាន់ទំនាក់ទំនងដ៏កាន់តែស៊ីជម្រៅជាមួយព្រះយេស៊ូវគ្រីស្ទ ដែលទ្រង់ព្យាបាល និងបន្សុទ្ធអ្វីដែលខ្ទេចខ្ទាំ ដោយស្ថាបនាប្រាជ្ញា កម្លាំង និងសេចក្ដីស្រឡាញ់នៅក្នុងដំណើរការនោះ ។ ដោយសារអព្ភូតហេតុ គឺតាមរយៈព្រះគុណ និងការប្រោសលោះរបស់ទ្រង់ ហើយទ្រង់តែមួយគត់ ដែលយើងអាចក្លាយជាមនុស្សនៅក្នុងប្រភេទនៃទំនាក់ទំនងដែលយើងចង់មាននៅស្ថានសួគ៌បាន ។
ខ្ញុំបានជឿថា « ភាពល្អឥតខ្ចោះ » ពិតជាមិនអាចទៅរួចទេនៅក្នុងទំនាក់ទំនងគ្រួសារសម្រាប់មនុស្សគ្រប់គ្នា—យ៉ាងហោចណាស់នៅក្នុងជីវិតនេះ ។ ប៉ុន្តែភាពស្មោះត្រង់ សុចរិតភាព និងភាពជិតស្និទ្ធពិតប្រាកដអាចធ្វើទៅបាន ។ តាមពិត ការធ្វើពុត ឬរំពឹងថានឹងមានភាពល្អឥតខ្ចោះនឹងរំខានដល់ភាពស្និទ្ធស្នាលពិតប្រាកដចំពោះព្រះ ក្រុមគ្រួសាររបស់យើង និងអ្នកដទៃ ។ ផ្ទុយទៅវិញ នៅពេលយើងអនុញ្ញាតឲ្យគេមើលឃើញពីអត្តសញ្ញាណពិតរបស់យើងតាមរយៈព្រះគ្រីស្ទ ក្រុមគ្រួសររបស់យើង និងមនុស្សដទៃ ដោយរួមបញ្ចូលទាំងអ្វីៗដែល « តិចជាងភាពល្អឥតខ្ចោះ » នោះយើងអាចអញ្ជើញព្រះចេស្ដាបន្សុទ្ធរបស់ទ្រង់មកក្នុងជីវិតរបស់យើងបាន ។ យើងអាចជួបប្រទះនូវអំណាចអព្ភូតហេតុរបស់ទ្រង់ក្នុងការផ្សះផ្សារនូវអ្វីដែលមិនអាចដោះស្រាយបាន បំពេញយើងដោយសេចក្តីស្រឡាញ់របស់ទ្រង់ ហើយផ្លាស់ប្តូរយើងទៅជាមនុស្សដែលមានទំនាក់ទំនងកាន់តែស៊ីជម្រៅជាមួយទ្រង់ និងមនុស្សជាទីស្រឡាញ់របស់យើង ។
ប្រហែលជាគោលបំណងដ៏ពិសិដ្ឋបំផុតនៃការប្រកាសអំពីគ្រួសារគឺដើម្បីធានាដល់យើងថា ដោយសារព្រះយេស៊ូវគ្រីស្ទ នោះគ្រួសារ « ដ៏ល្អឥតខ្ចោះ » អាចជាជោគវាសនាដ៏អស់កល្បសម្រាប់យើងម្នាក់ៗ ។
ក្នុងនាមជាបុត្រាបុត្រីជាទីស្រឡាញ់របស់ព្រះមាតាបិតាសួគ៌ យើងទាំងអស់គ្នាជាសមាជិកនៃគ្រួសារដ៏អស់កល្បជានិច្ច ។ បទពិសោធន៍ពិសេសរបស់យើងនៅក្នុងជីវិតរមែងស្លាប់ គឺជាផ្នែកសំខាន់នៃផែនការរបស់ព្រះវរបិតារបស់យើង ដើម្បីជួយយើងឲ្យរីកចម្រើន ហើយ « ទីបំផុតសម្រេចបាននូវជោគវាសនាដ៏ទេវភាព [ របស់យើង ] ជាអ្នកស្នងជីវិតដ៏អស់កល្បជានិច្ច »៦—ជាជីវិតគ្រួសារដ៏ស្រស់បំព្រងដូចអ្វីដែលដែលទ្រង់ធ្លាប់បានជួប ប៉ុន្តែខុសគ្នាពីភាពល្អឥតខ្ចោះដែលគ្រួសាររបស់យើងដកពិសោធន៍នៅពេលនេះ ។ ដូចដែលអែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់ បានប្រកាសថា « ដង្វាយធួននៃព្រះយេស៊ូវគ្រីស្ទបានរំពឹងរង់ចាំជាមុន ហើយនៅទីបំផុត នឹងបង់សងរាល់ការខូចខាត ការខ្វះខាត និងការបាត់បង់ទាំងអស់ចំពោះអ្នកទាំងឡាយដែលងាកទៅរកទ្រង់ ។ គ្មាននរណាម្នាក់ត្រូវបានតាំងជាមុនដើម្បីទទួលតិចជាងនូវអ្វីៗទាំងអស់ដែលព្រះបិតាមានសម្រាប់បុត្រាបុត្រីរបស់ទ្រង់ឡើយ » ។៧
ដូចដែលព្រះអម្ចាស់បានសន្យានឹងយ៉ាកុបនៅចំកណ្តាលនៃបញ្ហាប្រឈមក្នុងគ្រួសារ « តិចជាងភាពល្អឥតខ្ចោះ » របស់គាត់ដែរ នោះទំនាក់ទំនងនៃសេចក្តីសញ្ញារបស់ទ្រង់ជាមួយយើងអះអាងចំពោះយើងថា « យើងនៅជាមួយនឹងឯង យើងនឹងថែរក្សាឯងនៅកន្លែងណាដែលឯងទៅ ហើយនឹងនាំឯងមកក្នុង [ ផ្ទះ ] នេះវិញ ពីព្រោះយើងមិនចោលឯងឡើយ ទាល់តែយើងបានធ្វើសម្រេចសេចក្ដីដែលយើងបានប្រាប់ឯងហើយ » ( លោកុប្បត្តិ ២៨:១៥ ) ។ នៅពេលយើងដើរតាមទ្រង់ ទោះជាការពិតនៃភាពមិនល្អឥតខ្ចោះរបស់យើងមានភិនភាគយ៉ាងណាក្ដី ក៏ទ្រង់នឹងមិន « អនុញ្ញាតឲ្យយើងទៅ » ឡើយ រហូតទាល់តែយើងក្លាយជាអ្វីដែលយើងប្រាថ្នាចង់បាន ចងភ្ជាប់នៅក្នុងទំនាក់ទំនងគ្រួសារនៃអំណរដ៏វិសេសអស់កល្បជានិច្ច ។