« ក្រុមគ្រួសារ និងពន្លឺនៃលោកិយ » លីអាហូណា ខែ មករា ឆ្នាំ ២០២៣ ។
សម្រាប់មាតាបិតា
ក្រុមគ្រួសារ និងពន្លឺនៃលោកិយ
ជូនចំពោះមាតាបិតា
គ្រួសារគឺជាផ្នែកដ៏ចាំបាច់នៃផែនការសុភមង្គលរបស់ព្រះវរបិតាសួគ៌សម្រាប់បុត្រាបុត្រីរបស់ទ្រង់ ។ អត្ថបទនៅក្នុងច្បាប់ប្រចាំខែនេះអាចជួយអ្នកឲ្យកែលម្អការប្រាស្រ័យទាក់ទងក្នុងគ្រួសារ និងជួយស្វែងរកបញ្ហាប្រឈមក្នុងទំនាក់ទំនងគ្រួសារបាន ។ អ្នកក៏អាចប្រើច្បាប់នេះ ដើម្បីជួយអ្នកឲ្យបង្រៀនកូនៗនូវមេរៀនសំខាន់ៗមួយចំនួនពីព្រះគម្ពីរសញ្ញាថ្មីផងដែរ ។
ការពិភាក្សាអំពីដំណឹងល្អ
ព្រះយេស៊ូវគ្រីស្ទគឺជាពន្លឺដ៏ពិតរបស់ខ្ញុំ
សូមចែកចាយជាមួយគ្រួសាររបស់អ្នកនូវការបង្រៀនមួយចំនួនពីអត្ថបទរបស់ប្រធាន បាឡឺដ នៅលើ ទំព័រ ៤ អំពីតួនាទីរបស់ព្រះយេស៊ូវគ្រីស្ទក្នុងនាមជាពន្លឺនៃលោកិយនេះ ។ សូមបង្កើតបញ្ជីប្រភពនៃពន្លឺនានានៅក្នុងផ្ទះរបស់អ្នកជាគ្រួសារ ហើយពិភាក្សាអំពីរឿងផ្សេងៗដែលពន្លឺអាចធ្វើសម្រាប់យើងបាន ។ តើព្រះយេស៊ូវគ្រីស្ទជាប្រភពដ៏អស្ចារ្យនៃពន្លឺខាងវិញ្ញាណ ដែលជួយដល់យើងតាមរបៀបណា ?
បើកចិត្តទំនាក់ទំនងគ្នាក្នុងក្រុមគ្រួសារ
វាសំខាន់ណាស់ក្នុងការរៀបចំខាងវិញ្ញាណសម្រាប់ការប្រឈមនានានៅក្នុងជីវិត ។ នៅលើ ទំព័រ ១២ សូមអានដំបូន្មានមួយចំនួនពីអ្នកប្រឹក្សាសុខភាពផ្លូវចិត្តស្តីពីរបៀបដើម្បីមានការសន្ទនាសំខាន់ៗ និងរឹងមាំជាមួយកូនៗរបស់អ្នក ។ តើគំនិត និងយោបល់ទាំងនេះមួយណាដែលអ្នកអាចអនុវត្តជាមួយគ្រួសាររបស់អ្នកបាន ?
ការរៀបចំដួងចិត្តរបស់យើងដើម្បីទទួលព្រះបន្ទូល
សូមអានអត្ថបទរបស់បងប្រុស ខាម៉ាហ្គូ នៅលើ ទំព័រ ៣៨ អំពីរឿងប្រៀបប្រដូចនៃអ្នកសាបព្រោះ ។ សូមពិភាក្សាជាមួយគ្រួសាររបស់អ្នកថា តើប្រភេទដីខុសៗគ្នានៅក្នុងរឿងប្រៀបប្រដូចនេះតំណាងឲ្យអ្វី ។ កុមារតូចៗអាចគូររូបភាពចេញពីរឿងប្រៀបប្រដូចនេះ ហើយនិយាយអំពីវត្ថុទាំងនោះ ហើយកុមារធំៗអាចអានរឿងប្រៀបប្រដូចនោះនៅក្នុង ម៉ាកុស ៤:៣–២០ ហើយចែកចាយគំនិត ឬសំណួររបស់ពួកគេ ។
ចូរមកតាមខ្ញុំ ការកម្សាន្តសប្បាយប្រចាំគ្រួសារ
ការធ្វើរឿងលំបាកៗដោយមានជំនួយរបស់ព្រះ
ដូចជាម៉ារា និងបងប្អូនជីដូនមួយរបស់នាង អេលីសាបិត នៅក្នុងព្រះគម្ពីរសញ្ញាថ្មីដែរ ( សូមមើល លូកា ១:៥–៥៥ ) ពេលខ្លះយើងត្រូវបានសុំឲ្យធ្វើរឿងលំបាក ហើយអាចងឿងឆ្ងល់ថាតើយើងអាចធ្វើវាបានដែរឬទេ ។
-
រៀបធុងទទេ ដូចជាធុងទឹក ឬប្រអប់មួយនៅចុងម្ខាងទៀតនៃបន្ទប់ ។
-
សូមឲ្យស្លាបបក្សីដល់សមាជិកគ្រួសារម្នាក់ៗ ។
-
ដោយចាប់ផ្តើមពីធុងនៅចុងបន្ទប់ម្ខាង សូមឲ្យសមាជិកគ្រួសារព្យាយាមដាក់រោមសត្វរបស់ពួកគេចូលទៅក្នុងធុងនោះ ដោយការផ្លុំរោមសត្វនោះឲ្យនៅលើខ្យល់ កាលដែលវាហោះនៅក្នុងបន្ទប់ ។
-
ដើម្បីធ្វើឲ្យវាកាន់តែលំបាក សូមទុកពេលត្រឹមតែ ៣០ វិនាទីប៉ុណ្ណោះ ហើយប្រើបំពង់បឺតដើម្បីផ្លុំខ្យល់នៅលើរោមសត្វនេះ ។ សូមបន្តកាត់បន្ថយពេលវេលាដែលបានដាក់រហូតដល់មិនអាចធ្វើសកម្មភាពនេះបាន ។
ការពិភាក្សា ៖ សូមចងចាំថា បញ្ហាប្រឈមមួយចំនួនអាចនឹងមិនត្រូវបានដោះស្រាយក្នុងជីវិតនេះទេ សូមចែកចាយបទពិសោធន៍មួយដែលពង្រឹងទីបន្ទាល់របស់អ្នកថា « ការដែលមនុស្សធ្វើមិនកើត នោះព្រះទ្រង់អាចនឹងធ្វើកើតទាំងអស់ » ( លូកា ១៨:២៧ ) ។ តើជំហានតូចៗអ្វីខ្លះដែលអ្នកអាចធ្វើបានជារៀងរាល់ថ្ងៃ ដើម្បីសម្រេចកិច្ចការក្នុងជីវិតរបស់អ្នកដែលហាក់ដូចជាមិនអាចធ្វើទៅបាន ?