“Mandrakizay ny fianakaviana,” Liahona, Jan. 2023.
Ireo fototry ny filazantsara
Mandrakizay ny fianakaviana
Ny fianakaviana no rafitra fototry ny fiarahamonina sy ny Fiangonana. Ny mpikamban’ Ny Fiangonan’i Jesoa Kristy ho an’ny Olomasin’ny Andro Farany dia mino fa afaka ny ho mandrakizay ny fianakaviana. Isika dia miasa mba hanamafy orina ny fiankaviantsika ety an-tany. Manam-pinoana ihany koa izahay fa isika dia afaka ny handray ny fitahian’ny fananana fianakaviana mandrakizay.
Ny fianakavian’ Andriamanitra
Fanahy zanakalahy na zanakavy malalan’ny ray aman-dreny any an-danitra ny olon-drehetra. Isika rehetra dia isan’ny fianakavian’ Andriamanitra. Manana toetra araka an’ Andriamanitra sy anjara araka an’ Andriamanitra isika rehetra. Raha miaina am-pahamarinana isika dia afaka ny hiverina hiara-hiaina amin’ny Raintsika any An-danitra ho isan’ny fianakaviany mandrakizay.
Sarim-panambadiana nalain’i Joseph Kaluba
Fianakaviana mandrakizay
Rehefa mivady any amin’ny tempoly ny lehilahy iray sy ny vehivavy iray ka mitandrina ny fanekempihavanana nataon’izy ireo, dia haharitra mandrakizay ny fanambadian’izy ireo. Io ôrdônansin’ny tempoly io dia antsoina hoe famehezana. Ireo ankizy teraka ao aorian’ny famehezana ireo ray aman-dreniny dia teraka ao anatin’ny fanekempihavanana. Ireo ankizy teraka talohan’ny famehezana an’ireo ray aman-dreniny dia azo fehezina amin’izy ireo any amin’ny tempoly mba hahafahan’izy ireo ho tonga fianakaviana mandrakizay. Manao tantaram-pianakaviana sy ny asa atao any amin’ny tempoly ireo mpikambana mba hahafahany mamehy ny fianakavian’izy ireo miaraka ao anatin’ireo taranaka mifandimby rehetra. Ny fitahian’ny fananana fianakaviana mandrakizay dia afaka ny ho tanteraka noho i Jesoa Kristy sy ny Sorompanavotana nataony.
Fanambadiana
Ny fanambadiana eo amin’ny lehilahy iray sy ny vehivavy iray dia tendrin’ Andriamanitra. Ny filazantsaran’i Jesoa Kristy dia mampianatra ireo mpivady mba tsy hivadika amin’izy samy izy ary ho mahatoky amin’ny fanekempihavanan’ny fanambadian’izy ireo. Tokony ho marin-toetra izy ireo amin’ny zavatra eritreretiny sy teneniny ary ataony. Fiaraha-miasa mira lenta ny fanambadiana ary tokony hifandrisika sy hifankahery ary hifanampy izy ireo.
Ray aman-dreny sy zanaka
Nandidy an’i Adama sy i Eva Andriamanitra mba hanan-janaka. Nampianatra ireo mpitarika ao amin’ny Fiangonana fa mbola manan-kery io didy io. Ireo ray sy reny dia miara-miasa mba hanabe ireo zanany ao anatin’ny fitiavana sy ny fahamarinana (jereo ny Fotopampianarana sy Fanekempihavanana 68:25–28). Ireo ankizy dia ampianarina mba hanaja sy hankatò ireo ray aman-dreniny (jereo ny Eksodosy 20:12).
Mampianatra sy mianatra
Ny ray aman-dreny dia mampianatra ireo zanany hitia an’ Andriamanitra sy hankatò ireo didiny. Manome fahafahana antsika mba hahatsapa fifaliana ary hianatra faharetana sy ny tsy fitiavan-tena ny fiainana eo anivon’ny fianakaviana. Ireo toetra ireo dia manampy antsika ho lasa tahaka an’ Andriamanitra kokoa sy manomana antsika hiainana amim-pifaliana mandrakizay amin’ny maha fianakaviana antsika.
Manamafy orina ireo fianakaviana
Mitaky asa sy fanolorantena ary faharetana ny manorina fianakaviana mahomby. Afaka manampy antsika hahita fifaliana ao anatin’ny fiainam-pianakaviana ny fitsipiky ny filazantsara toy ny finoana, vavaka, famelan-keloka, fitiavana sy asa ary fialam-boly mahasoa. Afaka mandray fanambarana ho an’ny tena manokana ihany koa isika mba hahafantarana ny fomba hanamafisana orina ny fianakaviantsika.
Christ’s Image (Endrik’i Kristy), nataon’i Heinrich Hofmann
Fitahiana ho an’ny olon-drehetra
Tsy ary ny olona rehetra no manana fahafahana ny ho ao anatina fianakaviana tonga lafatra iray eto an-tany. Saingy nampanantena Andriamanitra fa ny olona rehetra izay mitandrina ny didiny dia handray ireo fitahiana rehetra entin’ny fianakaviana mandrakizay. Afaka matoky Azy isika ary manam-pinoana ny fotoany.