Ngaahi Nima Tokoni ʻi Haʻamoá

Kuo ʻosi tala ko e fānaú ʻa hotau ʻamanakiʻanga ki he kahaʻú. ʻOku lolotonga ngaohi ʻe he fānau iiki fakaʻofoʻofa ʻo e Uooti Navu, Haʻamoa 1 (haʻofangá) ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ha kahaʻu lelei ange.

ʻI ha pongipongi mokomoko mo kakapu ʻo e ʻaho 25 ʻo Māʻasí, naʻa nau tō ai ha fanga kiʻi ʻakau iiki ʻe 300 ʻi he Malololelei Recreational Reserve mo e tokoni mei heʻenau kau taki ʻi he siasí mo e ngaahi mātuʻá.

Naʻe fakahoko fakataha ʻa e ngāue tokoni ʻa e fānaú mo e Polokalama Kemipeini Tō ʻAkau ʻe Tolu Miliona ʻa e Ministry of Natural Resources and Environment (MNRE) (Potungāue ki he Naunau Fakanatulá mo e ʻĀtakaí), ʻa ia ko ha polokalama ke maluʻi ʻa e faʻahinga kehekehe ʻo e meʻa moʻui ʻi Haʻamoá.

Naʻe fiefia ʻa e fānaú ke tokoni ʻi ha founga ʻoku nau ala nima ai. Naʻa nau aʻusia ʻa e ongo ko ia ʻo e tokoni ki ha meʻa lelei ʻi honau koló mo fai ha meʻa ʻoku makehé.

Naʻe malimali ʻa Selitī Manua, taʻu hongofulu, mo ne pehē, “Naʻá ku saiʻia ʻaupito ʻi he ʻekitivitī tō ʻakaú. Naʻá ku ako ʻoku ʻomi ʻe he ʻakaú ʻa e ʻea ke tau mānava ai ʻi he ʻaho kotoa pea ke nofo ai ʻa e fanga manupuná. ʻI hono tō ʻa e ʻuluʻakaú, ʻoku tau tokoniʻi ai hotau ʻātakaí mo e monumanu mo e manupuna kehekehe ʻi he vaotaá. Naʻá ku ongoʻi fiefia pea naʻá ku saiʻia ʻaupito ʻi he ʻekitivitī ko ʻení.”

Naʻe vahevahe ʻe Soni Tuitogamatoe Tuia, taʻu valu, ʻo pehē, “Naʻe fakafiefia moʻoni kiate au. Naʻá ku fiefia ke fakataha mo hoku ngaahi kaungāmeʻá ʻo tokoni ki he māmaní ʻaki hono tō ha fanga kiʻi ʻakau. ʻOkú ne ʻai ke u fiefia ʻi hono ʻiloʻi ko e meʻa ʻeni ʻoku finangalo ʻetau Tamai Hēvaní ke tau faí, pea te Ne hōifua ai. ʻOku ou saiʻia ʻi he ʻekitivitī ko ʻení.”

Naʻe poupou ki ai ʻa Falefatu Lēpani, taʻu hiva, mo ne tānaki ʻo pehē, “ʻI hono talamai ʻa e meʻa ke u faí, naʻá ku fiefia ʻaupito mo loto-vēkeveke ke u ako ki he founga ke tō ai ʻa e ʻakaú pea kuó u ʻiloʻi ʻeni ʻoku maluʻi ʻe he ʻuluʻakaú ʻa e māmaní. Naʻá ku ʻiloʻi ʻoku nau ʻomi ʻa e ʻea, faitoʻo mo e papa ke langa ʻaki hotau ngaahi falé. ʻOku ou fakaʻamu ʻe lahi ha ngaahi ʻekitivitī peheni koeʻuhí ʻoku mātuʻaki mahuʻinga ʻa e ʻuluʻakaú ki he taha kotoa pē.”

Naʻe fiefia ʻa e kau taki lalahi ʻo e siasí naʻa nau kau fakataha mo e fānaú, ʻi heʻenau mamata ʻoku nau fiefia ʻi he faingamālie ke tokoní.

Naʻe pehē ʻe ʻĒliki U.J. Tuia, “Ko ha aʻusia fakaʻofoʻofa ʻa e ʻekitivitī tō ʻakaú. Naʻe talu pē mei he kamatá mo ʻemau mamata ki he fofonga fiefia ʻa e fānaú. Naʻe fakafiefia ke mamata ki heʻenau kau atu ki he ngāue tokoni maʻá e koló.”

Naʻá ne hoko atu ʻo pehē, “Naʻá ku ongoʻi mālohi ʻa e ʻafio ʻa e Laumālie ʻo Kalaisí ʻiate kimautolu lolotonga ʻa e ngāué ni. Naʻe hā mai mei he fānaú ʻa e fiefia ʻi heʻenau tō ʻa ʻenau fuofua fuʻu ʻakaú pea nau lele fakavave ke ʻomi mo ha toe ngaahi fuʻu ʻakau lahi ange ke tō. Naʻa mo e taimi naʻe kamata ʻuha ai ʻi he konga kimui ʻo e ʻaho ko iá, naʻe ʻikai uesia ai ʻenau vēkeveke ke feinga ke tō ʻa e ʻakaú ki he lahi taha te nau lavá. Ko ha meʻa fakaʻofoʻofa ia ke te mātā he ʻaho ko iá, pea ko ha aʻusia fakalata moʻoni ia. He ʻikai toe ngalo ia ʻi he fānaú.”

Naʻe tānaki mai ʻe Eseese Moke Ah Sam, “Ko ha tāpuaki ia ke mātā tonu ʻi he fiefia ʻa ʻemau fānaú ʻi hono tō ʻa e ʻuluʻakaú. Naʻá ku ongoʻi mohu tāpuekina pea naʻá ku ongoʻi ha fiefia lahi ʻi he ako ʻa e fānau ko ʻení ke nau tokoni ki hono tokangaekina ʻo e ʻātakaí. Kuo mahino kiate kinautolu ʻi he taimí ni, ko e finangalo ʻa e ʻOtuá ke nau tauhi mo tokangaʻi ʻa e palanite kuó Ne faitāpuekina ʻaki kitautolú.”

ʻE tupu fakataha hake ʻa e fānaú mo e ʻakau īkí, pea te nau ngaohi ʻa e māmaní ko ha feituʻu lelei ange ke nau moʻui ai, ʻi heʻenau founga pē ʻanautolu. ʻE fakamatamataleleiʻi mo ʻomi ʻe he ʻuluʻakaú ʻa e ʻosikena lahi ange ki he māmaní pea naʻe ako foki ʻe he fānaú te nau lava foki mo kinautolu ʻo fakatupulaki mo fakalahi ʻa e meʻa moʻui ʻi honau tukui koló.