Maʻongoʻonga Ange ʻIate Kitautolu Kotoa

Ko e fuofua meʻa ʻoku fai ʻe hoku fāmilí ʻi he teuteu ki he Kilisimasí ko hono fokotuʻutuʻu ʻa e fakatātā ʻo e ʻaloʻí (nativity). Ko ʻemau fakatātā ʻo e ʻaloʻí ʻoku konga kehekehe ʻe tolu—ko e fale talifonongá mo e tokotaha tauhí, ko e Kau Tangata Potó mo e ngaahi kāmelí mo e tēnití, mo e ʻaiʻangakai ʻo e manú mo Mele, Siosefa, kau tauhisipí, mo ha ʻāngelo. ʻOku mau fokotuʻu ia ʻi ha feituʻu ʻi loto-mālie ʻi homau falé, ke mau vakai maʻu pē ki ai. Kuo mau fai ʻa e tukufakaholó ni ʻi ha meimei taʻu ʻe hongofulu mā nima ʻi he taimí ni, pea koeʻuhí ko e fuofua meʻa ia ʻoku mau faí, ʻoku meimei ke u fakakaukau maʻu pē kia Kalaisi ʻi he toenga ʻo e faʻahitaʻu Kilisimasí. Kuo liliu tuʻo fā ʻemau ʻakau Kilisimasí ʻi heʻeku moʻuí, ka ʻoku tuʻu maʻu pē ʻa e fakatātā ʻo e ʻaloʻí. ʻOku totonu ko Kalaisi ʻa e fuofua meʻa ʻoku tau fakakaukau ki ai ʻi he Kilisimasí—ʻoku hā hono huafá ʻi he hingoa ʻo e faʻahitaʻú. Ko e fakatātā ʻo e ʻaloʻí ʻa e tukufakaholo ʻoku ou saiʻia taha aí koeʻuhí ʻokú ne fakamamafaʻi ʻa e mahuʻinga ʻo Kalaisí ʻo mahulu ange ʻi he ngaahi tukufakaholo fakaemāmani kehé. ʻOkú ne tohoakiʻi ʻeku tokangá ki he ʻaloʻi ʻi he fakatōkilalo ʻo hoku Fakamoʻuí pea mo e tui ʻa ʻEne mātuʻa fakaemāmaní.

ʻI he 2022, naʻe fakahoko ʻe he Siteiki Australia Southern River ha Fakataha Lotu Mūsika Faka- Kilisimasi. Naʻe toʻo ʻa e mūsiká mei he ʻalapama Kenneth Cope’s Greater Than Us All, ʻa ia ʻokú ne fakaikiiki ʻa e moʻui ʻa e Fakamoʻuí mei hono ʻaloʻí ki he pekiá. Naʻá ku kau atu ko ha tokotaha fakamatala, ʻo fakaʻaongaʻi ha ngaahi potufolofola ke ne fakamatalaʻi ʻa e foʻi hiva takitaha. Kuó u ongoʻi maʻu pē ʻa e Laumālie Māʻoniʻoní ʻi he mūsiká, ko ia, ko ha aʻusia fakatupulaki fakaʻofoʻofa ia ke kau atu ki ha fakataha lotu fakaʻofoʻofa, naʻe fakahoko lelei ʻe he kāingalotu talēnitiʻia ʻo hoku siteikí. Naʻe fakamoʻoniʻi mai kiate au ai ʻe he Laumālié ʻa e moʻoni ʻo e moʻui ʻa e Fakamoʻuí mo e mahuʻinga ʻo Hono ʻaloʻí mo e Fakaleleí; ko e moʻoni naʻe ʻikai ha taha ʻi he fonualotó ʻi he ʻaho hono tolú. Naʻá ku saiʻia ʻi he hiva His Hands (Ko Hono Ongo Toʻukupú), ʻa ia ʻokú ne fakamoʻoniʻi ʻa e mahuʻinga ʻo e ngāue fakafaifekau ʻa Kalaisí mo ʻEne ʻofa maʻakú. Naʻe hoko ʻa e fakataha lotú ko ha founga lelei ia ke kamata ʻaki ʻa e faʻahitaʻu Kilisimasí; ʻi heʻemau tokanga taha ki he moʻui hotau Fakamoʻuí, naʻá ku maʻu ha houngaʻia lahi ange ki Heʻene feilaulaú. Naʻá ku fakaafeʻi foki ha kaungāmeʻa—ʻoku kau ki ha siasi faka-Kalisitiane kehe—naʻá ne fakahoko mai naʻe tokoni ʻa e lea ʻo e hivá ke ne fakakaukau ki heʻene vā fetuʻutaki mo Sīsū Kalaisí. ʻOku ou houngaʻia ko e fakamoʻoni kuó u fakatupulaki mo tanumaki ʻi he mūsika ʻo e Siasí. ʻI he laumālie tatau mo ia ʻo ʻAlamaá, pea ʻi he loʻimataʻia, naʻe kole ʻe he tamai ko ʻení ke tau lotua muʻa ʻa Sione ke ne maʻu ha tali mei he ʻEikí.