Ko Ha Fononga Ha Finemui ki he Temipalé

ʻI he ngaahi taʻu lahi kuohilí, naʻe muimui ha finemui naʻe nofo ʻi Vanuatu ko Māsela Tokalolo, ki he faleʻi ʻene tamaí: “Nofo ofi ki he Ongoongolelei ʻo Sīsū Kalaisí pea fakamahuʻingaʻi ʻa e akó.”

Naʻe mahuʻinga fau ʻa e akó ki heʻene tamaí ʻo ne ʻave ai ʻa Māsela ʻi hono taʻu 12 ke ako ʻi Fisi, ʻo feilaulauʻi ʻene paʻanga mo ʻene vāmamaʻo mo hono ʻofefiné. Hili ʻene ʻosi mei he ako māʻolungá pea fakakakato mo e kalasi 13 ʻi Fisí, naʻe foki leva ʻa Māsela ki ʻapi ki Vanuatu.

ʻI Fisí, naʻe vakai ʻa Māsela ki ha maama fakalaumālie ʻi heʻene kau faifakó, naʻe tokolahi hanau niʻihi naʻe ʻosi mei BYU-Hauaiʻi.

Hili ʻene ngāue fakafaifekau maʻá e Siasí ki he ʻOtu Filipainí, naʻe hanga ʻe heʻene loto-holi ke ʻalu ki BYU-Hauaiʻí ʻo fakalotolahiʻi ia ke ngāue mo feilaulau maʻa ʻene akó ʻo hangē ko e faleʻi kuo fai ange ʻe heʻene tamaí.

Naʻe tokoniʻi ʻe Maliela Kani, ko ha kaungā mēmipa ʻo e Siasí ʻi Vanuatu, ʻa Māsela ʻi heʻene tānaki ha paʻanga ki heʻene akó. Naʻe taʻo pea fakatau atu ʻe Māsela ha pai siaine, pai kasitati mo e Laplap, ko e meʻatokoni tuʻufonua ʻa Vanuatu.

Naʻe pehē ʻe Māsela, “Naʻe loto-fiemālie ʻa e kāingalotu [ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní] mo hoku ngaahi kaungāmeʻá ke poupouʻi au ʻi heʻenau ʻiloʻi ʻe tokoni ia ke u ʻalu ki he akó.”

Naʻe aʻusia ʻe Māsela ʻene ngaahi taumuʻá. Naʻá ne ʻosi mei BYU-Hauaiʻi, fetaulaki mo hono husepānití, pea mali ʻi he Temipale Laie Hawaii.

Naʻá ne pehē, “Ko e Fale ʻo e ʻEikí ko [ha] fale māʻoniʻoni. ʻOku tau fononga fakataha mo e ʻOtuá ʻi he māmaní.”

ʻOku lolotonga langa ha temipale ʻi Pooti Vila, Vanuatu.

Naʻe pehē ʻe Māsela fekauʻaki mo e temipale foʻoú, “Ko ha tali ia ʻo ʻeku lotú. Ko ha fakamoʻoni ʻeni ʻoku ʻafioʻi moʻoni ʻe he ʻOtuá ʻEne fānaú. ʻE hoko moʻoni ʻa e temipalé ko ha maama ki homau fonuá.”