Galuega 6–12 (Iunite 18)

Valaaulia tagata o le vasega e mafaufau e faapea ua fesili atu se uo: “Sa ou faalogo e faapea o le 1978 na suia ai e la outou ekalesia lona tulaga e faataga ai alii uma ona maua le perisitua tusa lava po o le a le lanu. Afai e te talitonu o la outou ekalesia e faatonutonu e le Atua, ma o le Atua o se tagata e le masuia, e faapefea la ona mafai lena mea?”

Fai atu i le vasega e tusi i a latou api o le vasega po api talaaga mo le suesueina o tusitusiga paia pe faapefea ona latou tali atu i lenei uo. (Manatua: Ia mautinoa e tali mai e tagata le fesili o le suiga o faiga a le Ekalesia nai lo le taumatemate i mafuaaga e ono i ai mo le faatapulaaina o le perisitua. E le gata i lea, i le taimi o la outou talanoaga, aua le taumatemate pe aisea na i ai ai le faatapulaaina o le perisitua, talu ai e lei faaalia maia na mafuaaga [tagai Tautinoga Aloaia 2].)

Valaaulia le vasega a o latou suesue i le Galuega 10e vaavaai mo upumoni ia e mafai ona fesoasoani latou te taliina ai fesili e uiga i le ala e taitai ai e le Alii, taiala, suia, ma faatonutonu Lana Ekalesia.

Faamatala e oo mai i le taimi lea i ona po o le Feagaiga Fou, sa folafola atu le talalelei, ma nai tuusaunoaga itiiti, e faatatau i Iutaia e pei ona faatonutonuina ai e le Faaola (tagai Mataio 10:5–6). Peitai, i le Galuega 10 ua tatou faitau ai e uiga i le suiga taua i le ala ua faagaoioia ai le Ekalesia.

Valaaulia le vasega e aotele mea sa latou aoaoina mai a latou suesuega e uiga i le tagata o Nuuese e igoa ia Konelio. (O ia o se taitai i le vaegaau a Roma. O ia ma lona aiga o ni e ua talitonu ma matatau i le Atua. O se Nuuese, sa le mafai ai ona auai i le Ekalesia a Keriso e aunoa ma le faaliliuina muamua i le faa-Iutaia.)

Aotele le Galuega 10:3–8i le faamatala atu e faapea ona o le faamaoni o Konelio, sa faaali atu ai se agelu ia te ia ma faatonuina o ia e auina atu ni tagata i Iopa e sue Peteru. A o malaga atu auauna a Konelio i Iopa, sa maua e Peteru se faaaliga ofoofogia a o nofo ai i le fale o se tagata e igoa ia Simona.

Valaaulia ni tamaiti aoga e feauauai i le faitauina leotele o le Galuega 10:9–16. Fai atu i le vasega e mulimuli i le faitauga, ma vaavaai mo mea na vaaia e Peteru i le faaaliga. (Ina ia eseese, atonu e te manao e avatu i tagata taitasi se fasipepa mo se gaoioiga e tusi ni ata. Valaaulia le vasega e faitau lemu le Galuega 10:9–16ma tusi se ata o le faaaliga a Peteru e pei ona faamatala mai i nei fuaiupu. A uma ua lava se taimi, fai i le vasega e faaaoga a latou ata e faamatala atu ai i se tasi o le vasega le mea na tupu i le faaaliga a Peteru.) A uma nei gaoioiga, fesili:

• I le faaaliga, o le a le mea na poloaiina Peteru e ‘ai?

• E tusa ai ma le fuaiupu 14, o le a le uluai tali a Peteru i lenei poloaiga? (Faamatala i lalo o le tulafono a Mose, sa faasa ai tagata Iutaia ona ‘ai manu sa faapea o manu masani pe le mama [tagai Levitiko 11].)

• E tusa ai ma leGaluega 10:15,o le a le fetalaiga a le Alii e uiga i manu le mama sa ia poloaiina Peteru e ‘ai?

Aotele le Galuega 10:17–28i le faamatala atu e faapea e lei malamalama muamua Peteru i le uiga o lenei faaaliga. A o mafaufau o ia i ai, ae taunuu atu auauna a Konelio ma ta‘u atu ia Peteru le faaaliga a Konelio. O le aso na sosoo ai na malaga ai Peteru ma isi so‘o ma i latou e vaai Konelio. E ui i le mea moni o le toatele o Iutaia na manatu o se mafutaga e le tusa ai ma le tulafono le faatasi ma se tagata o Nuuese, ae sa ulufale atu Peteru i le fale o Konelio.

Valaaulia se tagata aoga e faitau leotele le Galuega 10:28. Fai i le vasega e mulimuli ai, ma vaavaai mo le mafuaaga na tuu atu e Peteru na ala ai ona mafuta pe asiasi atu i se Nuuese.

• O le a le mafuaaga na tuu atu e Peteru mo le mafuta atu pe asiasi foi i se Nuuese?

Aotele le Galuega 10:29–33i le faamatala atu e faapea na ta‘u atu e Konelio ia Peteru lana faaaliga. Sa faapotopoto foi e Konelio lona aiga ma uo ina ia mafai ai e Peteru ona aoao i latou.

Valaaulia se tamaitiiti aoga e faitau leotele le Galuega 10:34–35. Fai atu i le vasega e mulimuli i le faitauga, ma vaavaai mo le mea na aoaoina e Peteru.

• E faapefea ona e aoteleina mea na aoaoina e Peteru? (Atonu e manaomia ona e faamatala atu e ui e le alofa le Atua i tagata ona o ni tulaga e pei o tagatanuu po o ni tulaga faaagafesootai, Na te faamasinoina tagata uma i a latou galuega ma faamanuiaina i latou o e usitai ia te Ia. E mafai foi ona fesoasoani le tusiga o le “Race and the Church: All Are Alike unto God” [mormonnewsroom.org/article/race-church].)

Aotele le Galuega 10:36–43i le faamatala atu e faapea na aoao e Peteru ia Konelio ma lona aiga e uiga ia Iesu Keriso ma Ana galuega lelei, Faasatauroga, ma le Toetu. Sa molimau atu Peteru e faapea o i latou o e talitonu ia Iesu Keriso o le a maua se faamagaloga o a latou agasala.

Valaaulia se tamaitiiti aoga e faitau leotele le Galuega 10:44–48. Fai i le vasega e mulimuli ai, ma vaavaai le aafiaga o aoaoga a Peteru i nei tagata o Nuuese. Faamatala o le fasifuaitau “e na peritomeina” i le fuaiupu 45e faasino i so‘o Iutaia o e sa o mai ma Peteru mai Iopa.

• E tusa ai ma fuaiupu 44–46, o le a le aafiaga na i le aiga o Konelio ona o aoaoga a Peteru? (Atonu e manaomia ona e faamatala e faapea o le fasifuaitau “o le alofa o le Agaga Paia” fuaiupu 45 e faasino i le mana o le Agaga Paia, lea na oo ifo i luga o nei Nuuese. E ese lea mai i le meaalofa o le Agaga Paia, lea tatou te maua e ala i le sauniga o le faamauga pe a uma le papatisoga [tagai Galuega 8:14–17; Aoaoga a Peresitene o le Ekalesia: Iosefa Samita (2007), 97].)

• Aisea na ofo ai le au Iutaia sa auai i lea faatasiga?

• E ala i aafiaga o Peteru o loo tusia i le Galuega 10, o le a le mea na faaali atu e le Alii ia te ia e uiga i Nuuese?

Ina ia fesoasoani i le vasega e faailoa mai aoaoga faavae e mafai ona tatou aoao mai le Galuega 10, vaevae le vasega i ni vaega taitoalua pe toatolu. Tuu atu i vaega taitasi se kopi o le tufaaga lea, pe tusi fesili nei i le laupapa. Valaaulia le vasega e galulue ma a latou vaega e tali ia fesili.

Ata

tufaaga

A uma ua lava se taimi, valaaulia ni tagata e o mai i le laupapa e tusi upumoni na faailoa mai e a latou vaega. Ia mautinoa o atagia mai upumoni nei i mea ua latou tusia:

E taitai e le Atua Lana Ekalesia e ala i faaaliga i Lana perofeta, le Aposetolo sinia.

E mafai ona tatou maua faaaliga ma le malamalama auauai a o tatou usitai i le Alii.

E mafai e le Atua ona suia pe faaopoopo i faatonuga ua uma ona Ia tuuina mai i aso ua tuanai, e tusa ma Lona poto ma manaoga o Ana fanau.

Valaaulia se tamaitiiti aoga e faitau leotele le saunoaga a Elder D. Todd Christofferson o le Korama a Aposetolo e Toasefululua. Fai i le vasega e faalogologo pe o faapefea ona atagia mai ai le upumoni lona tolu sa latou faailoa maia, i le saunoga a Elder Christofferson:

Ata

Elder D. Todd Christofferson

“E ala i lenei aafiaga ma le faaaliga na oo ia Peteru, sa fetuunai ai e le Alii le faiga masani a le Ekalesia ma faaali mai ai se malamalamaaga atoatoa o le mataupu faavae i Ona so‘o. Ma o lea o le folafolaina atu o le talalelei ua faalautele atu ia aofia ai tagata uma” (“O Le Mataupu a Keriso,” Ensign po o le Liahona, May 2012, 88).

Tuu atu i le vasega se taimi e toe iloilo ai mea sa latou tusia e uiga i le auala o le a latou taliina ai le fesili a a latou uo e uiga i suiga o se faiga a le Ekalesia. Fautuaina i latou e tusi ni malamalamaaga faaopoopo sa latou maua a o suesue i le Galuega 10, ma tuu atu e latou te faasoa mai nei malamalamaaga i le vasega.

Atonu e te manaomia ona ta‘u i ai e ui atonu e fesuiai e le Atua faiga a le Ekalesia ma faaopoopo lo tatou malamalama faaleaoaoga faavae e ala i faaaliga faifaipea(tagai Mataupu Faavae o le Faatuatua 1:9), o Lona natura paia, uiga faaleatua, feagaiga, aoaoga faavae, ma le fuafuaga e le suia lava. O le iloaina o lenei mea e mafai ona fesoasoani tatou te faatuatua ai i le Atua ma mautino o le a Ia taitaia Lana Ekalesia e tusa ai ma Lona finagalo ma manaoga o Ana fanau.

Faaiu i le valaaulia o le vasega e faasoa ai a latou molimau i upumoni sa latou aoaoina.

Valaaulia le vasega e vaavaai mo tali ma mafaufau i fesili nei i le taimi o a latou lava suesuega o le Galuega 13–19: O le a le mea na fai e Paulo ia Elima le faataulaitu? O le a sou manatu o le a sau tali pe afai e talitonuina e faapea o oe o se atua? Aisea na faaviivii atu ai ia Paulo ma Panapa e faapea o ni atua? Na faapefea ona latou tali atu? O le a le faafitauli o tagata o le Ekalesia e faatatau i le peritomeina, ma aisea foi na tatau ai ona avatu le mataupu i le au Aposetolo? O le a la latou faaiuga? Ina ua asiasi atu Paulo i Atenai, sa ia folafola atu mai Areopako e uiga i le atua e le iloa. Aisea na ia aoao atu ai tagata?