A o i ai i Kalilaia, sa faamalamalama e Iesu le mafuaaga na ala ai ona le mulimuli Ona soo i tumasani faalelotu o le faamamaina o i latou lava a o lei aai. Ona ia maliu atu lea i le talafatai o Meititirane, lea na Ia faamaloloina ai le tama a se fafine o Nuuese. Ona toe foi ane ai lea o Iesu i Kalilaia, lea na ia faamaloloina ai le toatele ma fafagaina faavavega le silia ma le fa afe o tagata.
Na fesili le au tusiupu ma le au Faresaio pe aisea na le fafano ai lima o soo o Iesu a o lei aai.
Valaaulia ni tagata se toatolu e faitau leotele ia tulaga nei. Fai atu i le vasega e faalogologo mo mea e tutusa ai nei tulaga.
Ua fautuaina se tamaitai talavou e ana uo e ofu se ofu e le talafeagai i se siva a le aoga. E iloa e le tamaitai talavou e le tusa le ofu ma tulaga faatonuina a le Alii o le tausaafia, tusa lava pe e talia i lana aganuu ona faaaoga ofu faapena.
O se alii talavou o se aiga o le Au Paia o Aso e Gata Ai e fiafia lava i taaloga. A faaali mai taaloga lauiloa i le televise, ua masani lava le aiga ona tuu le tatalo faaleaiga, suesuega o tusitusiga paia, afiafi faaleaiga, ma fonotaga a le Ekalesia i Aso Sa ina ia matamata ai i taaloga.
Ua sauniuni se alii ma se tamaitai talavou e faaipoipo. E nonofo i se nofoaga e talia ai le faatino o sootaga feusuai a o lei faaipoipo. Ua ta’u atu e nisi tagata i le toalua lenei o aga la ua leva ma ua le taulia o lo la faatalitali sei faaipoipo faatoa fai ai sootaga vavalalata feusuai.
O a mea e tutusa ai nei tulaga? (O tulaga taitasi o loo aumaia ai se feteenaiga i le va o le usitaia o poloaiga a le Atua ma le faatino e tusa ai ma tu masani po o agaifanua.)
Faamatala o tu masani ma agaifanua e aofia ai talitonuga ma faiga a aganuu, nuu, aiga, po o se vaega o uo.
Fai i le vasega e ta’u mai se tu masani se tasi po o se agaifanua e mafai ona taofia ai i latou mai le usiusitai i poloaiga a le Atua. Valaaulia le vasega e vaavaai mo upumoni i le Mataio 15 ia e mafai ona fesoasoani ia i latou pe a tatau ona latou filifili i le va o le usiusitai i poloaiga a le Atua ma le auai i le faatinoina o tu masani ma agaifanua.
Valaaulia se tagata e faitau leotele le Mataio 15:1–2. Fai i le vasega e mulimuli ai, ma vaavaai mo le tu masani na fesili ai le au tusiupu ma le au Faresaio ia Iesu.
O le a le tu masani e lei mulimuli ai soo o Iesu?
Faamatala o le fafanoina o lima o loo ta’ua e le au Faresaio ma le au tusiupu e faasino i se sauniga o le mulumuluina ina ia mama faalelotu ai ae e le o faasino i le faamama mo le tumama.
Valaaulia se tagata e faitau leotele le Mataio 15:3, ma fai i le vasega e vaavaai mo le tali a Iesu i le fesili a le au tusiupu ma le au Faresaio.
O le a le fetalaiga a le Faaola i mea o loo faia e le au tusiupu ma le au Faresaio i le faatinoina o a latou tu masani?
Otooto le Mataio 15:4–6 i le faamatala atu sa faailoa mai e Iesu se faataitaiga pe na faapefea ona solia e le au tusiupu ma le au Faresaio se poloaiga a le Atua i le faatinoina o a latou uputuu. Sa latou aoao atu faapea “o le a saoloto” tagata (fuaiupu 6) mai a latou matafaioi e tausia o latou matua matutua i le faapea o loo teuina a latou tupe o se meaalofa i le Atua, po o leKopano (tagai Mareko 7:10–12). Peitai, na aoao atu Iesu o le faia o lena mea, ua latou solia ai le poloaiga ia ava i le tama ma le tina.
Vaalaulia se tagata e faitau leotele le Mataio 15:7–9, ma fai i le vasega e vaavaai po o a mea na taitai ai e le au tusiupu ma le au Faresaio ia tagata e fai e ala i le faaaogaina o a latou uputuu o se ’alofaga e le usitaia ai poloaiga a le Atua.
O a mea na taitai e le au tusiupu ma le au Faresaio ia tagata e fai?
O le a se mataupu faavae e mafai ona tatou aoao mai i nei fuaiupu e uiga i le mea e tatau ona tatou faia ina ia tatou latalata atili atu i le Atua? (E ono faaaoga e le vasega ni upu eseese ae e ao ona faailoa mai se mataupu faavae e pei o lenei: Afai tatou te mananao e faalatalata atu i le Atua, e tatau ona tatou tuu Ana poloaiga i luga atu o soo se tatou uputuu ma agaifanua.
Valaaulia le vasega e toe faitau leotele ia tulaga mai le amataga o le lesona. A uma ona faitau tulaga taitasi, fesili:
O a mea e mafai e le tagata po o tagata i lea tulaga ona fai e usitai ai i poloaiga a le Atua?
E fesoasoani faapefea le faia o lenei mea i le tagata po o tagata ia latalata atili ai i le Atua?
A uma ona talanoaina tulaga taitasi, fesili i le vasega:
O le a se taimi na e filifili ai e usitai i poloaiga a le Atua nai lo le faatinoina o se uputuu po o se agaifanua e masani ona taliaina: Na faapefea ona fesoasoani lea mea ia te oe e te latalata atu ai i le Tama Faalelagi? (Atonu e te manao e faasoa atu sa oe lava aafiaga.)
Valaaulia le vasega e mafaufau i uputuu po o tu masani ma agaifanua sa latou ta’u maia muamua. Fautuaina i latou e filifili e usitai i poloaiga a le Atua nai lo le mulimuli i nei uputuu po o agaifanua ina ia latou latalata atili ai i le Atua.
Faamanatu i le vasega sa talitonu le au tusiupu ma le au Faresaio faapea o le aai e aunoa ma le fufuluina o lima o le a faaleagaina ai le tagata, pe le mama faaleagaga ai foi le tagata. Valaaulia se tagata e faitau leotele le Mataio 15:10–11 ma fai atu i le vasega e vaavaai mo mea na aoao mai e le Faaola e faaleagaina moni ai i tatou.
O a mea na fai mai le Faaola e faaleagaina ai i tatou?
Ta’u i ai na fetalai mai le Faaola, “O le mea e sau mai le gutu … e leaga ai le tagata” fuaiupu 11 Ina ua uma ona ta’u atu i Ona soo e aua nei popole i latou lava i le au Faresaio, o e sa tiga ona o Ana upu Mataio 15:12–16), sa Ia faamalamalama atili atu e uiga i mea e faaleagaina moni ai i tatou.
Valaaulia ni nai tagata e feauauai i le faitauina leotele mai o le Mataio 15:17–20. Fai i le vasega e mulimuli ai, ma vaavaai mo le uiga o le mea na fetalai ai le Faaola “O le mea e sau mai le gutu … e leaga ai le tagata” (verse 11).
O le a le uiga o le fetalaiga a le Faaola ina ua Ia fetalai, “O le mea e sau mai le gutu … e leaga ai le tagata”?
Ta’u i ai i tusitusiga paia, o le loto e tele ina faatusa i o tatou mafaufauga ma manaoga. Tusi le faamatalaga lenei i luga o le laupapa: Afai tatou te filifili e faafiafia ia mafaufauga ma manaoga leaga, ona …
E faapefea ona e faamaeaina le mataupu faavae lenei i aoaoga a le Faaola o loo tusia i fuaiupu 19–20? (Faaaoga upu a le vasega e faamaea ai le mataupu faavae ina ia aumaia ai le upumoni lea: Afai tatou te filifili e faafiafia mea leaga po o mafaufauga ma manaoga e le talafeagai, ona faaleagaina lea o i tatou e na mafaufauga ma manaoga.
O a ni auala e mafai ai ona faaleagaina i tatou pe le mama faaleagaga pe afai tatou te filifili e faafiafia pe talia mafaufauga ma manaoga leaga pe le talafeagai?
E faapefea e upu e sau mai o tatou gutu, faapea foi a tatou taga, ona atagia mai ai mafaufauga ma manaoga o o tatou loto?
Atonu e te manao e molimau atu i lenei mataupu faavae ma valaaulia le vasega e filifili e faatumauina mafaufauga ma manaoga mama.
Ua faamalolo e le Faaola le tama teine a se fafine o Nuuese
Fai i ni tagata e o mai i le laupapa ma lisi ai se tasi pe sili atu foi o o latou manaoga amiotonu.
Valaaulia le vasega e vaavaai mo matapu faavae i le Mataio 15 e mafai ona fesoasoani latou te malamalama ai i mea e manaomia ona latou faia e maua ai manaoga amiotonu.
Fai i le vasega e sue le Faafanua o le Tusi Paia nu. 11. “O Le Nuu Paia i Taimi o le Feagaiga Fou.” Fai i ai e sue ia aai o Turo ma Saitonu i le faafanua. Faamatala a o maliu mai Iesu mai Kalilaia i talafatai o Turo ma Saitonu, sa Ia feiloai ai i se fafine Kanana. E faapei o le toatele o isi tagata i lena itulagi, o le fafine lea o se Nuuese—o lona uiga e le o ia o se Iutaia. I le taimi lea, sa folafola atu ai e Iesu ma Ona soo le talalelei i na o tagata Iutaia a le o Nuuese (tagai Mataio 10:5–6). O le a talaia faitotoa mulimuli ane i Nuuese e maua ai le savali o le faaolataga (tagai Galuega 10).
Valaaulia le vasega e feauauai i le faitauina leotele mai le Mataio 15:21–27ma se paga. Fai atu ia i latou e vaavaai mo tali i fesili nei (atonu e te manao e tusi nei fesili i luga o le laupapa ):
O a manaoga amiotonu na i ai i le fafine Kanana?
O le a le mea na fai e le fafine na faaalia ai lona faatuatua ia Iesu Keriso?
Fai atu i tagata aoga e lipoti mai a latou tali.
Na faapefea e le tali a le fafine i lenei talafaatusa ona faaalia atili ai lona faatuatua ia Iesu Keriso?
Valaaulia se tagata e faitau leotele le Mataio 15:28, ma fai i le vasega e mulimuli ai ma vaavaai mo le mea na faia e le Faaola i lenei fafine.
O le a le mea na faia e le Faaola i lenei fafine? Aisea?
O le a le mataupu faavae e mafai ona tatou aoao mai lenei tala e uiga i le mea e mafai ona tupu pe a tatou faaaoga lo tatou faatuatua ia Iesu Keriso? (E ono faaaoga e le vasega ni upu eseese ae e tatau ona faailoa mai se mataupu faavae e pei o lenei: A o tatou faaaogaina lo tatou faatuatua ia Iesu Keriso, e mafai ona tatou maua o faamanuiaga e tusa ai ma o tatou manaoga amiotonu.
E le gata i le ole atu ma le faamaoni i le Alii e faamanuia i tatou e tusa ai ma o tatou manaoga amiotonu, o le a se isi mea e mafai ona tatou fai e faaaoga ai le faatuatua ia Iesu Keriso?
Ina ia fesoasoani i tagata o le vasega ia malamalama atili i le mea e mafai ona latou faia e faaaoga ai le faatuatua ia Iesu Keriso, fai atu i se tagata o le vasega e faitau leotele le saunoaga lenei a Elder Dallin H. Oaks o le Korama a Aposetolo e Toasefululua:
Ata
Elder Dallin H. Oaks
“A i ai lo tatou faatuatua i le Alii o Iesu Keriso, e tatau ona i ai lo tatou faatuatuaga ia te ia. E tatau ona lava lo tatou faatuatuaina o ia tatou te fiafia ai e talia lona finagalo, ma le iloa na te silafia le mea e sili mo i tatou. …
“… O le faatuatua tusa lava po o le a le malosi, e le mafai ona fua mai ai se taunuuga e ese mai le finagalo o ia e ona le mana. … E le mafai ai ona tatou maua le faatuatua moni i le Alii e aunoa ma le faalagolago atoatoa i le finagalo o le Alii ma le taimi a le Alii” (“Faatuatua i le Alii o Iesu Keriso,” Liahona, Iulai 1994, 130).
E mafai faapefea e le faamatalaga a Elder Oaks o le a le uiga o le faaaoga o le faatuatua ia Iesu Keriso ona fesoasoani ia i tatou pe a le faamanuiaina vave i tatou e le Alii e tusa ai ma o tatou manaoga amiotonu?
Valaaulia le vasega e iloilo le lisi o manaoga amiotonu o i le laupapa ma faamatala mai mea e mafai ona latou faia e faaaoga ai le faatuatua ia Iesu Keriso a o latou saili ia maua na manaoga.
O le a se taimi na e (po o se tasi e te iloa) maua ai ou manaoga amiotonu (e tusa ai ma le finagalo o le Alii ma lana taimi) a o e faaaogaina le faatuatua ia Iesu Keriso?
Valaaulia le vasega e tusi i a latou api po o api talaaga o suesuega o tusitusiga paia mea o le a latou faia a e faaaoga ai le faatuatua ia Iesu Keriso a o latou saili ia maua o latou manaoga amiotonu mai ia te Ia. Fautuaina le vasega e faatino mea sa latou tusia.
Ua fafaga e Iesu le silia ma le fa afe tagata na mulimuli atu ia te ia, i areto e fitu ma ni nai ia
Otooto le Mataio 15:29–39 i le faamatala atu sa toe foi Iesu i Kalilaia. A o i ai o Ia iina, e silia ma le fa afe tagata na faapotopoto atu ia te Ia, ma avatu ia te Ia o e sa mafatia mai ma’i ma toatuga faaletino eseee. Sa faamalolo i latou e le Faaola, ma ina ua uma aso e tolu sa latou mafuta ai ma Ia, sa Ia faatinoina se isi vavega i le fafagaina lea o i latou uma i le na o le fitu potoi areto ma ni nai i’a laiti. (Manatua: O le vavega o le fafagaina o le fa afe o le a auiliili i le lesona o le Mareko 8.)
Atonu e te manao e faaiu le lesona i le faasoa atu o lau molimau i upumoni ma mataupu faave na faailoa mai e le vasega i le Mataio 15.
Tala ma Faamatalaga o Talaaga
Mataio 15:1–9. “Se a le mea ua soli ai foi e outou le poloaiga a le Atua i a outou uputuu?
Na tuu mai e Elder Richard G. Scott o le Korama a Aposetolo e Toasefululua le fautuaga lenei ia i latou o e saili e o ese mai i uputuu po o agaifanua e taofia ai i latou mai le tapuai atoatoa atu i le Alii:
“O le suia matuia o se mamanu o le olaga e faigata tele. o uo masani e faitio, muimui, ma faatiga foi. o le faatuatua aiai i le faaola ma le usiusitai o le a taialaina oe mai nei faigata agai i faamanuiaga tetele. O loo faaali mai e tusitusiga paia o le mausali ma le faatuatua e mafai ona soloia aganuu e feteenai ma le fuafuaga a le Atua, e aumaia faamanuiaga i tagata taitoatasi, ma e faapea foi i augatupulaga o tagata. o le naunautai le faamatusalia i le mea moni ma aganuu sese sa faamanuiaina ai le tele o aiga o Aperaamo. O lona faamaoni o le a faapaleina ai i manuia e tele le au usiusitai o le aiga o Isaraelu. O se tasi faataitaiga o le aveesea mai o aganuu tuai a le au Sa Lamana fetauai ma suia i ni soo lotomaualalo o Iesu ua loto e feoti nai loo le solia o feagaiga ua osia o ni tagata o le malo. ” (“Removing Barriers to Happiness,”Liahona, July 1998, 86).
Mataio 15:21—28. “Ua aai e uli o momoi mea ua pauu i laulau a o latou matai”
O le talafaatusa a le Alii ua faatusa ai Nuuese i uli o se auala e aoao atu ai ua i ai le talalelei i se taimi sa na o le aiga o Isaraelu sa avatu i ai. O le a maua e Nuuese le savali o le faaolataga mulimuli ane, e tusa ai ma le taimi faatulagaina a le Atua (tagai Galuega 10).
Na aoao mai e Elder Bruce R. McConkie o le Korama a Aposetolo e Toasefululua faapea o le faamaloloina e Iesu o le tama teine a le fafine Kanana, o se tofotofoina o le faatuatua o le fafine ma o se faataitaiga aoga mo Ona soo:
“O le talalelei (faatasi ai ma ona mana faamalolo uma ma alofa tunoa) sa tatau ona ofoina atu muamua i Iutaia a o lei oo atu i Nuuese. O le galuega a Iesu i le olaga nei e mo Isaraelu, ae le o isi nuu. O Lana faamalologa o lenei tagata po o se isi lava o Nuuese na oo mai i se tisipenisione faapitoa ona o le faatuatua tele. I se taimi muamua na ia poloaiina ai le au aposetolo e o atu tau lava o mamoe na se o le aiga o Isaraelu ae aua nei folafolaina atu le savali o le faaolataga i Nuuese. (Mata. 10:5–6.) E manino o le ala na ia mulimulitaia i lenei mea sa aoga i ona soo, na tofotofoina ai le faatuatua o se fafine o Nuuese, aoao atu ai o le faatauanau ma le tumau ai i le tatalo o le a aumaia ai le taui, ma sa faaalia ai o le faatuatua sili atu o nisi taimi e maua ai i e faapaupau nai lo le gafa filifilia o Isaraelu”(Doctrinal New Testament Commentary, 3 vols. [1965–73], 1:371).